¹ Ino inywa noo injwilile Yelemia, yulu ya mwano gwa batu bose ba Yuda; ha mwaa gwa buna gwa uhyilila wa Yehoyakimu, mwaana gwa Yosia, loolo lya ba Yuda guya mwaa noo mwaa gwa gutangi gwa Nebukadleza, oolo lya Babeli; ² yine Yelemia, mbuwa, yelisambile batu bose ba Yuda, na bashami bose ba Yelusalemu, ugana, ³ Utula mwaa gwa umi na butatu gwa uhyilila wage Yosia, mwaana gwa Amoni, oolo lya Yuda, ndaa na lusugu luno lwa lino, myaa gino maumi mopi na gitatu, Inywa ya MLUME injwilile, nene nidogomone nenyu, nibele hubyuwa umayaya na ugana; ata bibyo benywe ushihuliche. ⁴ Nage MLUME gutumine wamli bagichi bage bose, babo ba mbuwa, gubele hubyuwa u mayaya na ubahila, ata bibyo bunywe mushihuliche, na mushitegile matu menyu, muhuliche. ⁵ Guganine, Giwilwe hano, mtu gegese na galeye ndila gyage giibi; leewe usona wa bigilanywa byenyu, shamwe mnda sii gyine MLUME gyelimmele, benywe na bamasenyu, utula aala mganda ndaa na milumbu; ⁶ na ushitulame tunge tubetcha, yulu ya utugilila na ututambikila, na mushinjigiliche wa mgilo gwa maboo menyu; bino, nene nishimchwila wa mtongo gogose, ⁷ Mndi benywe mushipuliche, MLUME gwagana; yulu munjigiliche wa mgilo gwa maboo menyu, na ulisumya bichuli-chuli byenyu bya mwego benywe bene. ⁸ Bino MLUME gwa bilume pambwa gwagana bino, Bululi mushihuliche binywa byanyi. ⁹ lingaminywe, nihila batu ba uguha milongo gyose gya lubi lwa uboo wa uachi, MLUME noo gwagana, na nene nihila mwano wa Nebukadleza, oolo lya Babeli, mgichi gwanyi, na nene nibahila hegulu ha gino sii, na bene bali bagishamine, na hegulu ha mioga gino gyose gili ngubi chose; nene nibadiga abisa, na ubaita uba itu ya ugagicha , na uba itu ya ushigwa yoga, na uba mauwa na masugu mose. ¹⁰ Iyaka nbahuminya liidi lya aseo na saaso, liidi lya mlume gwa buwa, na lyammachi gwa buwa, liidi lya mawe ma uhelela, na lwenge lwa aswenge. ¹¹ Na sii gono gyose gibi mauwa kaa, na uba itu ya ugagicha; nagyo gino mioga gyimgilila oolo lya Babeli myaa maumi njwii. ¹² Na habibi gigyo myaa maumi njwii hagyiwilila, niambila oolo lya Babeli, na guya mmoga, MLUME gwagana, wa yulu ya usona wabo, nagyo sii gya Bakaldayo byoka biya; nigiita ubamauwa ma milumbu. ¹³ Nene nilusha hegulu ha giya sii binywa byose byine byandidogomone yulu yagyo, ehe, byose byine bigolilwe mnda ino itabo, byose bibuwile Yelemia yulu ya mioga gino gyose. ¹⁴ Bululi mioga giingi na maoolo mamata bimgicha wa uoma ; ehe, babo nabo; nene nibagiwidicha ulamana na bigilanywa byabo, na wa ulamana na mgilo gwa maboo mabo. ¹⁵ Bululi MLUME, Abetcha a Isilaeli asambila bino, Guha isengo ya divai ya buhuchi buno mnda uboo wanyi, uginywishe mioga gyose, baya bene bandiuhila wabali. ¹⁶ boo binywa na uolwa olwa, na uba na miishi, wa ibalo ya ahilu ene andihila hawingi habo abahage. ¹⁷ Haho noo hene handigaileiya isengo mmuboo wa MLUME, nibanywishiche ba mioga gyose, baya bene bapilile MLUME wabali; ¹⁸ noo; Yelusalemu, na mabuga ma Yuda, na maoolo mage, na bahele bage,yulu ya ubaita babe mauwa, na bisage, na ushigwa yoga, na ulogwa; byoka biya nahi byabili lino. ¹⁹ Falao oolo lya Misili, na bagichi bage na baosobu bage na batu bage bose, ²⁰ na batu bose bene balisumbiche hamwechi, na maoolo mose ma sii gya Uzi, na maoolo mosema sii gya Bafilisti, na Ashkeloni na Gaza, na Ekloni, na bene bashigele ba Ashdodi; ²¹ Edomu, na Moabu, na baana ba Amoni; ²² na maoolo mose na Sidoni, na maoolo mose ma ichiba yine ilim'bwala mwa bahali; ²³ Dedani, na Tema, na Buzi, na batu bose bene balihugeda alembe na ushiga a wigulu wa mlomo; ²⁴ na maoolo mose ma Alabuni, na maoolo mose ma batu bene balisumbiche balibashame mlwanaganywa; ²⁵ na maoolo mose ma ba Elamu, na maoolo mose ma Bamedi; ²⁶ na maoolo mose ma luubi lwa uboo wa uachi, mene mali koo na mene mali hoka, bose hamwechi; na moolo mose ma gino sii, bene bali bashame hegulu ha gino sii; na oolo lya Shesheki gwinywa hanyuma habo. ²⁷ Gogwe wabasambile bino, MLUME gwa bilume pambwa, Abetcha a Isilaeli gwagana bino, Nyuwe, na uolwa, na usela, na ugwa mushigimane iyaka, wa yulu ya ahilu ene andihila hawingi henyu. ²⁸ Iyaka habi, nambo bihanya uigaa isengo iya mmuboo obe, banywe, haho noo holibasambila, MLUME gwa bilume pambwa gwagana bino, utaga na ushutaga mwinywa. ²⁹ Bululi lingaminywe, nihutula ugila bibii mnda mbuga giya gilihugiswa wa china lyanyi, wii! Benywe mwilewa mushisusulwe? Mushilewa mushisusulwe; bululi niabiya ahilu aya abahage bose bene bali bashame mnda ibaloo yose, MLUME gwa bilume pambwa noo gwagana bibyo. ³⁰ Bino, gogwe ubebuwa bino binywa byose yulu yabo, na ubasambila ugana MLUME gwihugumba uhunina hegulu, Nage gwidogoma wa liidi lyata uhuma ha ihana yage ya ihaha; Gwihugumba abisayulu ya liha lyage; Gwiita mdodo nahi mtu gulihuhula zabibu, hegulu ha batu bose bene bali bashame heguluha ibaloo yose. ³¹ Lwindo lwage lwihiya ndaa na isula ya ibaloo; Bululi MLUME gwina uhimana na mioga, Gwigumana na batu bose bene bali na m'bili; Na basone gwibahunya bahagwe na ahilu; MLUME noo gwgana. ³² MLUME gwa bilume pambwa gwagana bino, Loola, usona wihuma mmoga ndaa na u mmoga, na isukishi ya yata yiginunywa uhumangubi cha isula ya ibaloo. ³³ Na bene bahagilwe na MLUME babi haya luya lusugu, utula luubi lumwechi lwa ibaloo ndaa na luubi lwa bubili; bashilililwa,ata usumbichiwa, na bashichiwa; babi unaga hegulu ha bitete. ³⁴ Liilwe wa usaba uwatilichiwa, benywe baushi, na ulila; na ulibulaganya mnda mto, benywe bene muli na uoma mnda ihichi; bululi masugu menyu ma uhagwa mahuwilila abisa, nene nimnoga bihindi bihindi, benywe mwigwa nahi itundu ya umonena saaso. ³⁵ Na baushi babi bashi na ihana ya usinina, na bene bali na uoma mnda ihichi bashihogononywa. ³⁶ Liidi lya lilo lya baushi, na liidi lya ulila uasaba uwatilichiwa wabo bene bali na uoma mnda ihichi, bululi MLUME gwadogya ihana ulishiwa. ³⁷ Na maliha mene mali na talala mashamiwa pii, wa yulu ya sungu cha buhuchi bwa MLUME. ³⁸ Gwashiga ihana yage ya ulibisa, nahi tambwe; wa bululi sii gyabo gisili itu ya ugagicha, wa ibalo ya bwigi bwa ahilu a umonena, na wa yulu ya sungu cha buhuchi bwage.