¹ MLUME gumoninye, na loola, bikapo bibili bya tini, bibiilwe umbele wa lubunga lwa MLUME, hanyuma ha Nebukadleza, oolo lya Babeli, um'bwata kole Yekonia, mwaana gwa Yehoyakimu, oolo lya ba Yuda, na bauulu bose ba Yuda, hamwechi na beeno na buusula bigela, ubahumya Yelusalemu na ubahyicha Babeli. ² Ikapo imwechi ibele na tini chibenju abisa, nahi biya tini lyine litulile ugela; na ikapo ya bubili ibele na tini cha chibochu abisa chishinaoshiwa uliwa, bululi chibele chibochu abisa. ³ Haho MLUME gumbudiche, wamona ii Yelemia? Niganine, Namona tini; tini chili chisoga abisa; na tini cha chibochu abisa, chinaoshiwa uliwa, bululi ii chibochu abisa. ⁴ Hanyuma inywa ya MLUME injilile, ugana, ⁵ MLUME, Abetcha a Isilaeli, gwagana bino, Nahi bili chiya tini cha chisoga, bibyo noo byandilola kole cha Yuda, bandihuminye ha ino ihana, bagye ndaa na sii gya Bakaldayo, baabe na talala. ⁶ Wa bululi meeso manyi mimlola, mube na misa gyanyi, nene nimgingicha mnda gino sii iyaka; nene nimgubaa, na nishim'bele; nimmuna na nishimchula; ⁷ Nene nibaha mitima, bamane ugana nene nili MLUME; nabo babi batu banyi, na nene nibi Abetcha abo; bululi bingiwilila wa mtima gwabo gose. ⁸ Na mwano gwa tini chiya cha chibochu, chishinaoshiwa uliwa, bululi ii chibochu abisa; winene MLUME, gwagana, bibyo noo byandimmunya Sedekia, oolo lya Yuda, na bauulu bage, na mihona gya Yelusalemu, gishigele mnda gino sii, na baya bene bali bashame mnda sii gya Misili. ⁹ Ehe, nibahumya baatelwe ubo na uya mnda buoolo bose bwa ibaloo, baamone busone; baabe itu ya uambilwa, na manga, na weenja, na ulogwa, mnda bihana byose byandichanga na ubasala. ¹⁰ Nene nihila ahilu, na ndala, na bisumi, hawingi habo, na bichiminina koo na sii giya gyandibahele, boo na bamasabo.