¹ Luhanga lubi uli baushi, balihudigya miyoo gya ulisha wanyi na ugisambalacha! MLUME Gwagana. ² Wa bululi bwa bibyo MLUME, Abetcha a Isilaeli, gwagana bino, yulu ya baushi bene balihulisha batu banyi, mwasambalacha ihichi yanyi, na ubachinga, na mushigile ubalola; lingaminywe, nichigililwa yulu ya usona wa bigilanywa byenyu, MLUME gwagana. ³ Nene nisumbicha mihona gya ihichi yanyi, mnda bibaloo biya byose byandichingile mwa bili, nene nibahyiicha iyaka mnda lihaa lyabo; nabo bibuta na ubula. ⁴ Nene nibiya iyaka baushi hegulu habo bene bibalisha; na bashimona iduba iyaka, na unogeya mitima, na bashichinina ata gumwe gwabo gumwechi. ⁵ Loola masugu malihuchwa MLUME gwagana, nimmenenya Daudi buhuhu bya kiine; nage gwihyilila oolo, gwigila wa lwengu, nage gwigila uonona wa kiine mnda sii. ⁶ Mnda masugu mage Yuda gwihogononywa, na Isilaeli gwishama kolongecho, na china lyage lweligiswa libi lino, MLUME noo kiine gyetu. ⁷ Wa bibyo, lingamina, masugu malihuchwa, MLUME gwagana, hene habashigana iyaka, MLUME byeli na mwego, gubahuminye baana ba Isilaeli mnda sii gya Misili; ⁸ wa bibyo, MLUME byeli na mwego, gubahiminye na ubagolwela ibushi ya ndu gya Isilaeli uhuma mnda sii gya lubi lwa uboo wa uachi, na uhuma mnda sii gyandibachingile; nabo bishama mnda sii gyabo boo bene, noo Kanaani sii gyabo gya malagano ma Abetcha na bamasabo. ⁹ Wa mwano gwa ba mbuwa. Mtima gwanyi mnda mwanyi gwanogeya, Mauda manyi mose madigila. Nibele nahi mtu guli mmolwa, Na nahi mtu gwahimwa na divai; malwa, wa yulu ya MLUME, na wa yulu ya binywa byage bya bihaha. ¹⁰ Bululi sii gyagilula na ba maseli; na wa yulu ya ulaha sii gili namalilo; bulisicho bwa mgala bwaguma; migyatichi gyabo gili gisone, na uoma wabo ushi wa kiine. ¹¹ Bululi mbuwa na ibuli bose babili basebulula; ehe, mnda ndu gyanyi namona usona wabo, MLUME gwagana, ¹² Wa yulu ya bibyo ndila gyabo bili nahi ihana ya buushe mengo ma mdoo; bisachiwa na ugwa haho; bululi nilusha usona hegulu habo, ehe,mwaa gwabo gwa uchwilwa, MLUME gwagana. ¹³ Nene namona buhugi mnda mwa ba mbuwa ba Samalia; babuwile wa Baali, babalubiche batu banyi Isiaeli. ¹⁴ Mnda bambuwa ba Yelusalemunimonine inywa ya uchigilicha abisa; uita masei; basudogoma binywa bya lulimi, basubiya uoma mnda maboo ma bangila biibe, ata bibyo hashi humineya mtu gugiwila na uleya usona wage; bose hamwechi basili nahi Sodoma wandi, na bashami bage nahi Gomola. ¹⁵ Bino MLUME gwa bulime pambwa gwagana bino, yulu yamwano gwa bambuwa, Loola, nibalisha bya bululu, nibanywisha maadi ma bululu; wa yulu uhuma wa bambuwa babo ba Yelusalemu, usebulula wagingila mnda sii gyose. ¹⁶ MLUME gwa bilule pambwa gwagana bino, Mushihuliche binywa bya ba mbuwa byabali hubabuwila; balihumgigya bya bunene; udogoma malo ma mitima gyabo boo bene; bishihuhuma mnda anywa a MLUME. ¹⁷ Masugu mose basumsambila bya unenuna nene, MLUME gwagana, Mubi na talala; nabo basumsambila mtu gegese mine gusugyata mnda anene a mtima gwage, hashibi itu yoyose ya iibi wamli. ¹⁸ Bululi mnanyi gugimene u magogo ma MLUME, ata uimana inywa yage na uihulicha? Mnanyi guibiile mnda mtima inywa yanyi, na uihulicha? ¹⁹ Loola, imbi luudi ya MLUME, noo ugana buhuchi bwage, bwahuchwa; mnaga gwa isukishi; gwibeleya na ubagwila basone u miswee. ²⁰ Sungu cha MLUME chishigiwila, ndaa na byeliwilicha malanga ma mtima gwage; u masugu ma isula mwiimana ino inywa abisa. ²¹ Nene isabatuma babo ba mbuwa, ata bibyo bagile abilo; nishidogomine nabo, ila babuwile. ²² Nambo babagimana mnda magogo manyi, haho noo hababa bahulidicha batu banyi binywa byanyi, na ubagalula bayele madila mabo masone, nausona wa bigilanywa byabo. ²³ Nene nili Abetcha ali hoka, MLUME gwagana, nene nisi Abetcha ali koo. ²⁴ Wi wii! mtu gegese gunaosha ulibisa ha ihana ya bubisa, nashimmone? MLUME gwagana. Wi wii! Gulu na sii bishigiluchiwe na nene? MLUME gwagana. ²⁵ Nihuliche bidogomine ba mbuwa bwababuwile lulimi wa china lyanyi, baganine, Nalota malo; namona malo; ²⁶ Wi wii! Bibyo bihisho bibi mnda mitima gya ba mbuwa bene balihubuwa wa lulimi ndaa na mengo nai, babo ba mbuwa bene bali hubichana mndamitima gyabo bo bene? ²⁷ Balihulanga nambo bibagibilicha batu banyi chila lyanyi na malo mabo, mabalihulangulila mtu na m'binji nage, nahi biya bamasabo byabaligibilile china lyanyi, wa yuluya Baali. ²⁸ Mbuwa guli na malo,na gadogome malo mage, na guya guli na inywa yanyi, na gadogome inywa yanyi wa uwilila. Bihupu ii itu nai uli ngano? MLUME gwagana. ²⁹ Wi wii! Inywa yanyi ishi nahi aahya? MLUME gwagana; na nahi nondo gisubele mawe bibaa bibaa? ³⁰ Bino wa yulu ya bibyo nene nili hegulu ha babo ba mbuwa, MLUME gwagana, byabali humsapa mtu gegese na m'binji nage binywa byanyi. ³¹ Loola, nana nili hegulu ha ba mbuwa, MLUME gwagana, balihuita ndimi chabo na ugana, Gee gwagana. ³² Loola, nene nili hegulu ha babo bene bali hubuwa malo ma lulimi, MLUME gwagana, na umagana, na ubalubya batu banyi wa lulimi lwabo, na wa ulimona wabo wa lubedo, na nene nisabatuma, na nisabaha m'bindo; na bashi babagigye bano batu ata hacho, MLUME gwagana. ³³ Na bano batu, uba mbuwa uba ibuli, heliubucha, gabegana, Mchigo gwa MLUME iyii? Haho noo holibasambila, Mchigi nai? MLUME gwagana bino, nibatela koo. ³⁴ Na wa yulu ya mwano gwa mbuwa, na ibuli, na batu, bena bigana , Mchigo gwa MLUME, nene nimmonona guya mtu, na ndu gyage byose. ³⁵ Mwigana bino kila mtu na m'binji nage, MLUME gwagaa ii? Na, MLUME gwadogoma wi? ³⁶ na mchigo gwa MLUME mushi gulumbula iyaka; bululi inywa ya mtu gegese noo gubi mchigo gwage; bululi benywe mwahugulula binywa bya Abetcha ali na mwego, bya MLUME gwa bilume pambwa, Abetcha etu. ³⁷ Na gogwe wimsambila mbuwa bino, MLUME gugaa wii? Na MLUME gwadogoma wii? ³⁸ Nambo m'begana, Mchigo gwa MLUME, bino, MLUME gwagana bino, Wa bululi mwagana ino inywa, Mchigo gwa MLUME; nene nahila mtu wamli ugana, Mushigane, Mchigo gwa MLUME; ³⁹ bino, wa bibyo lingaminywe, nishimgibilila benywe abiusa, nene nimtele benywe koo, hamwechi nagino mbuga gyandimmele benywe na bamasenyu, muhume umbele wa yenyi yanyi; ⁴⁰ nene nilusha yulu yenyi abule a mulimbu, na mme gwa masugu mose, gwine gushigibililwa.