¹ MLUME guganine bino,Ugye u ndu gya loolo lya Yuda, wadogome ino inywa bino, ² ugana, Hulicha inywa ya MLUME, Ee loolo lya Yuda; gogwe uli mshame wiisuba ya buoolo bwa Daudi, gogwe, na bagichi bobe, na batu bobw bose bene balihugingila u gino michango; ³ MLUME gwagana bino, Gechwe milandu wa kiine, mwammogononye guya guwashilwe kole m maboo ma msapi na umonena, na mushigile buubi u bagenyi, na umashige, na ata u bawilwa, nangu ubamonena, na mushigese maashi ma mtu gushi na abachi yoyose ha ino ihana. ⁴ Nambo m'begila bino wa chigilwe, haho noo hene habigingila mnda michango gya gino ndu maoolo mene mali mashame wi isuba ya buoolo bwa Daudi, balihugyata na tubilibili, na bachinine falasi gee, na bagichi bage, na batu bage. ⁵ Bibyo nambo husihubenja uhulicha bino binywa, nene nalaha wa ichuli-chuli yanyi ya mwego, MLUME gwagana, ugana ino ndu gibi mauwa. ⁶ Bululi MLUME gwagana bino,mnda mwano gwa ndu gya oolo lya Yuda; Gogwe uli Gileadi wandi, na mswe gwa Lebanoni; Wa bibyo winene niuita uba lele, na mbuga gishi bashaminywa na batu. ⁷ Nene niubiila hooka batu bene biudogya, batu bose na tuome twabo; Nabo bigeda biamba gyobe gya gisobolwe, na ugitela waahya. ⁸ Na mioga giingi gyihita hoka na gino mbuga, nabo bidigoma mtu na m'binji nage, Bili hugana ii MLUME ugigila gino mbuga gino gya gyata bino? ⁹ Haho bigana, Ii wa ibalo baleila alago a MLUME, Abetcha abo, batambikile tunge tubetcha, na utugilila. [ miishi gya ubada]. ¹⁰ Mushi mlilile guya guwile, na ushibiya malilo mage, Bino mumlilile guya gugile koo nenyu; bululi gee gushigiwila iyaka wamli, Na gushigimona iyaka giya sii gyelibutilwe mo.[ noo ugana uwila mnda buubi, wa nangu ulibecha ]. ¹¹ Bululi MLUME gwagana bino, wa yulu ya mwano gwa Shalumu mwaana gwa Yosia, oolo lya Yuda; gwelilile hanyuma ha Yosia, sage, gee mine guhumine ha ino ihana; Gushigiwila uno iyaka. ¹² haho ha iya ihana yine yabam'bwatile kole noo weliwila, bibyo gishigimona iyaka gino sii ata. ¹³ Luhanga lubi lwage guya gwigingila mnda ndu gyage wa buubi! Na m'byumba byage wa ahyonono! Gulihuya bugichi bwa miinage wa nangu umma alambwe, Na gushi humma alambwe a myechi gyage gya mgilo; ¹⁴ Gulihugana niligubaila ndu gyata na byumba byata; Nage gusubiya madilisha; Na bibambacha gyagyo bili biuninywe na miamba, Na ushinyiwa na aula. ¹⁵ Wi wii! Wihyilila wa ibalo wa himana na batu yulu ya miamba? Sobe, Yosia, wii! Gushilile, na unywa na ugila uonona wa kiine? Haho noo hene heliginunywe. ¹⁶ Guononine binywa bya mbuchu na mtu gulihusaba; haho noo heliginunywe. Wii! Ubo usho noo uumana, MLUME gwagana? [ ugeda milandu wa nangu ugegamina na nangu umonene, ] ¹⁷ Bino meeso mobe na mtima gobe gushi na yine yolihubenja ila wa itima kaa, na ugesa maashi mene mashi na abachi, na ahyonono, na ugila wa buhulihuli. ¹⁸ Bino, MLUME gwagana bino, mnda mwano gwa Yehoyakimu, mwaana gwa Yosia, oolo lya Yuda; Bashi m'biila malilo, balihugana, Aa! mshiwetu; na Aa! Kachanyi; ata bashimlilila, balihugana, Aa! Mlumyanyi; ata, Aa! Ugengeda wanyi. ¹⁹ Gwichiwa machio ma punda, gilihubulwa, na utelwa hambuga ha michango gya Yelusalemu. ²⁰ Bino ugye Lebanoni, walile, Watembila gyobe mnda mwa Bashani; Walile uhuma u loono lwa Abalimu; Bululi magenda mobe mose b mahagwa. ²¹ Nene nidogomine nobe mengo mobe ma uginunywa; ata bibyo udogomine, Nishihubenja uhulicha. Guno noo gubele mshaminyi gobe utula buwalubaga bobe, nangu unyemya liidi lyanyi. ²² Bibyo baushi bobe bose bilishiwa mnaga, na magenda mobe mose migya uhambwa; chigilwe mamo mengo wimona abule, na unogeya mitima wa ibalo ya usona obe ose. ²³ Gogwe mshami gwa Lebanoni, Usubiya iisa yobe hegulu ha miamba, Ubi na mishaminyi gya umonenywa keene abisa, Holibi na busungu nahi bwa mmachana gulihubuta. ²⁴ Nahi byandi na mwego nene, MLUME gwagana, ata Konia, mwaana gwa Yehoyakimu, oolo lya Yuda, gwisuba lupete lwine lwina yaala m muboo wanyi wa ulume, nabauuchula gogwe haho; ²⁵ nene niubiya mnda maboo ma batu baya bene balihuenga mtuma gobe, na mnda maboo ma baya bolihumona booba, ehe, mnda mabooma Nebukadleza, oolo lya Babeli, na mnda maboo ma Bakaldayo. ²⁶ Nene niutela hambuga, gogwe na mnobe guubishile, mwagye ginge sii gyamushibutilwe mo, na benywe mwiwa uya. ²⁷ Haho sii giya gyabali hubenja ugigila, bashigigiwila ata, ²⁸ Wi wii! Konia ii yibya inenunywe, na ubelwa? Ii ibya ishibatagwa? Bululi bwai batelwa, gee na ibushi yage, na utelwa mnda sii gyabashigidi? ²⁹ Ee sii, sii, sii, ihulichiwe inywa ya MLUME. ³⁰ MLUME gwagana bino, Golwe mwano gwa guno mtu ugana gushi na baana, ugana guno mtu gushibi na yage mlulenge masugu mage mose; bululi hashibi mtu gegese mnda ibushi yage gubi na yage mlulenge, gwishama mnda isuba ya buoolo bwa Daudi, na uhyilila yaka mnda Yuda.