¹ Ino inywa noo ichwilile Yelemia, uhuma wa MLUME, haho oolo Sedekia helimmilile Pashuli, mwaana gwa Malkiya, na Sefania, mwaana gwa Maaseya, ibuli, ugana. ² Ibumbu ino utubudiche wa MLUME; Bululi Nebukadleza, oolo lya Babeli, gwalisha bita yulu yetu; hange MLUME gunatugilila ulamana na migilo gyage gyose gya bisaga, yulu gagye lwage gaatushige. ³ HahoYelemia gubasambile, Msambilwe Sadekia ino inywa, ⁴ MLUME, Abetcha a Isilaeli, gwagana bino, Lingaminywe, nigalula unyuma wa tuome twenyu twa bita twine tuli mmaboo menyu, ugana wa tuto benywe mulihulwa na oolo lya Babeli, na Bakaldayo, bene bali bamchungulubu hambuga ha bibambacha byenyu, nene nituongola hamwechi hawingi ha gino mbuga. ⁵ Na nene mine nilwa nenyu, wa uboo ugololwe nawa uboo wa uomu, ehe, wa sungu, na wa buhuchi, na wa uchigililwa wiingi. ⁶ Nene nibahula bashami ba gino mbuga, batu na nyama chose; biiwa wa bisumi bwata. ⁷ Na hanyuma ha bibyo, MLUME gwagana, nim'biya Sedekia,oolo lya Yuda na bagichi bage, na batu bose bene bashigele mnda gino mbuga, hanyuma ha bisumi biya, na ahilu, na ndala, mnda uboo wa Nebukadleza, oolo lya Babeli, na mnda maboo ma tumangu twabo, na mnda maboo ma batu baya bene balihuenga mitima gyabo; nage gwibahaga wa bwigi bwa ahilu; gushibaleya na gushibamwena misa, na gushibaleelela. ⁸ Gogwe basambile bano batu, MLUME gwagana bino, Loolwe, nabiya umbele wenyu ndila gya mwego na mndila gya luubu. ⁹ Guya gwishama mnda gino mbuga gwiwa wa ahilu, na wa ndala,na wa bisumi; mndi guya mine gwitobowa, na ulibiwa hamwechi na Bakaldayo bene bali bamchungulubu, gee gubi na mwego, na mwego gwage gubi kole weli. ¹⁰ Bululi nabiya yenyi yanyi hegulu ha gino mbuga yulu nagilushiche usona, na nashigilushiche busoga, MLUME gwagana, gyibiwa mnda uboo wa oolo lya Babeli, nage gwigichigya. ¹¹ Na wa yulu ya mwano gwa ndu gya oolo lya Yuda, ihulichiwe inywa ya MLUME, ¹² Ee ndu gya Daudi, MLUME gwagana bino, Unonywe uonona wa kiine halwelo, bahogononywe bene bawatilwe kole na uboo wage guya gumsapile, buhuchi bwanyi bushichwe umoneya nahi aahya, boo nuuchigya, gashioshe mtu gegese uachimya, wa bululi bwa usona wa bigilanywa byenyu. ¹³ Loola, nene nilichubalyobe,Gogwe ulimshame mmibetabeta, na u liwe lya mlele, MLUME gwagana benywe mulihugana, Mnanyi mine gwichwa ulwa netu? Na, Mnanyi gwigingila nda bushamo bwetu? ¹⁴ Nene nibaonona ulamana na biguma bya bigilanywa byenyu, MLUME gwagana; nene nilamya aahya mnda isowa yage, nao ichigya bitu byose byine bili bigichingulubu.