¹ Bino Pashuli, mwaanagwa Imeli, ibuli,gubele mgimaninyi mmata mnda ndu gya MLUME, gummuliche Yelemia helibele hubuwa bibyo binywa. ² Haho Pishuli gummulile Yelemia, mbuwa, gum'biile mnda ihambo ya magulu, yine ibele haya ha mchango gwa hegulu gwa Benyamini, gwine gubele u ndu gya MLUME. ³ Na hasibele halwelo, gugo Pashuli gummuminye Yelemia mnda iya ihambo ya magulu. Haho Yelemia gumsambile, MLUME gushiugitile chinalyobe Pashuli, mndi Magol-misabibu. ⁴ Bululi MLUME gwagana bino, Looa, niuita uba boofo bwata mnda ichuli-chuli yobe ya mwego, na u magenda mobe mose; nabo biiwa u ahilu a tumangu twabo, na meeso mobe mimona bibyo; nene nibiya Yuda yose mnda maboo ma oolo lya Babeli, nage gwim'bwata kole ndaa na Babeli, na ummaga wa ahilu. ⁵ Iyaka bitundu byose bya gino mbuga, na bibya byose, na bitu byage bya bumona bwiingi byose nabyo, ehe, pinda chise cha maoolo ma Yuda, nibibiya mnda maboo ma tumangu twabo, bene babawata kole, na um'bwata na uumila ndaa na Babeli. ⁶ Na gogwe, Pashuli, na batu bose bene balihushama mnda ndu gyobe, mwigya u bucha; na gogwe wihiya Babeli, na uya noo oliwila, na ubo wichiwa, na magenda mobe mose, molibuwile binywa bya lulimi. ⁷ Ee MLUME, wambicha, nene nabichiwa; gogwe uli na uoma upima nene, wahima; nibele itu ya usewa, mengo mose ma mchuba; mtu gegese gususebulula. ⁸ Bululi hohose hene handisudogoma nisuita mdodo, nihulila, Umonenywa na udoga! Bululi inywa ya MLUME yaiswa uba uambilwa wandi, na usebululwa chuba lyose. ⁹ Nene nabedogoma, Nishimlumbula, nishigana iyaka china lyage; bino, mnda mtima gwanyi mubele nahi aahya aalamu, ahambilwe mnda mauda manyi, nene nahuima na ulitolelecha, na nishinaosha ulichibila. ¹⁰ Bululi nihuliche umonenywa na batu beengi; iduba ili ngubi chose. Magenda manyi mose, bene balihupembela hange, balihugana, Gushitaki, beswe twimshitaki, hange gwibichiwa, na beswe twimmima, twimgiwidicha buubi wa buubi bwage. ¹¹ Mndi MLUME guli hamwechi nanyi, mlingilisho gwa ilume pambwa yine ili hudanja; wa bibyo babo bene balihumonena bilihyatala, na bashihima ata; bimona abule abisa. wa ibalo bashigilile wa lwenyi, bimona abule a milumbu, ene ashigibililwa masugu mose. ¹² Bibyo, Ee MLUME gwa bilime pambwa, gogwe usubatonda bene bali nakiine, usumona munda na mitima, ungitile naamone ugiwidicha buubi wa buubi bobeyulu yabo; wa bululi nuununina gogwe injwa yanyi. ¹³ Mgimbilwe MLUME; mtonywe MLUME; Wa bululi guhuninye mtima gwa msabi Mnda maboo ma batu bangila biibe. ¹⁴ Na lulogwe lusugu lwandibu shilwe; lushihalilwe mihaa lusugu lwelimbushile mago. ¹⁵ Na galogwe mtu guya mine guhyiche mwano uli tata, ugana, Wabutilwa mwaana gwa mlumyana; gwa useelelcha. ¹⁶ Gugo mtu gabe nahi maya mabuga, baya bene badigilwe na MLUME, gashilibeche; na gashihuliche lilo halwelo, na mdodo gwa alugi mengo ma kunyiya meeno; ¹⁷ wa ibalo bushipagile handihumine mnda mwage; na bibyo mago gwisuba sinda lyanyi, na gumo lyage masugu mose lili bushoto. ¹⁸ Nitoboile mgumo bululi bwai, umona asusu na uchigililwa, ata masugu manyi magugile mnda abule?