¹ MLUME guganine bino, Ugye wagule mtondo gwa m'bumbi, waguhe baulu batutu bagye hamwechi nobe, na bamwe bauulu ba bibuli; ² wachuwe nuugya ndaa na wibetabeta ya baana ba Hinomu ili hoka na ihana ya bugingililo bwa mchango gwa bibelela, wagye ubo ulisamba binywa byandiusambila, ³ wagane, Ihulichiwe inywa ya MLUME, benywe maoolo ma Yuda, na bashami ba Yelusalemu; MLUME gwa bilume pambwa, Abetcha a Isilaeli gwagana bino, Lingaminywe, nilusha buubi ha ino ihana, bwine mtu gegese gabehulicha mwano gwabo, matu mage michiga. ⁴ Wa bululi bashiga nene, nabo bahaita hano ha ini ihana uba hagenyi, nabo hano batambikila buswenge u tubetcha tunge twine tushibagichi, ata boo, ata bamasabo, ata maoolo ma Yuda; nabo bahagita hano ihana ya mashi ma bene bashi na abachi; ⁵ nabo bamgubaila Baali ihana yageyine ili hegulu, yulu ya ubachele mmahya baana babo, babe lutangi lwa uchigya waBaali, igilanywa yine yandishiganine nene, ata wiidogoma, na ishigingile mnda mtima gwanyi; ⁶ bino, lingaminywe, masugu mali huchwa,MLUME gwagana, ugana, ha mamo masugu ino ihana hashigiswa iyaka Tofethi, na ata ibetabeta ya baana ba Hinomu, haho higiswa ibetabeta ya Ushinjicha. ⁷ Nene nibela mihungo gya Yuda na Yelusalemu ha ino ihana; nene nibahaga wa ahilu umbele wa meeso ma tumangu twabo, na wa uboo wa batu bene balihuenga mitima gyabo; na bitumba byabo nituha tunonyi twa ha hululu na binyama bya buhuchi bya mmibaloo, bibe iliwa yabyo. ⁸ Nene niita gino mbuga uba itu ya ugagicha batu, na uzomenywa; mtu gegese mine gwihita hoka nagyo gwigagilwa, na uzomeya yulu ya bihulo byage. ⁹ Nene nibasambila baye nyama cha baana babo, na nyama cha bawamisiha gyabo, nabo biiya kila gumwechi nyama cha genda lyage, na mengo ma mishaminyi na asusu, haho tumangu twabo, na batu baya bene balihuenga mitima gyabo, bibasusula. ¹⁰ Yelemia haho noo holibele guya mtondo, u mbele wa meeso ma batu baya bene balihugyata hamwechi nobe, ¹¹ na wabasambile, MLUME gwa bilume pambwa gwagana bino, Bibyo noo byandibabele bano batu,na gino mbuga, nahi biya mtu byesubela itundu ya m'bumbi, ishinaoshiwa ulongiwa iyaka na uba kolongecho; nabo bichiya batu mnda Tofethina hashishigala ata ihana ya uchyila. ¹² Bibyo noo byandibagila hano ha ino ihana, MLUME gwagana, nabo bishama mmo, na ata ugiita gino mbuga uba nahi Tofethi; ¹³ na ndu gya Yelusalemu, na madu ma maoolo ma Yuda, mabiilwe usona, mabi nahi ihana ya Tofethi; ehe, madu mose mene hegulu ha butato bwage batambikile aswenge bibumbwa byose bya gulu, na uhongolwela tubetcha tunge lutangi lwa byine bisunyuwa. ¹⁴ Hanyuma Yelemia guhumine uya Tofethi, uya wine umtumine MLUME gabuwe bubuwa; nage gugimene mnda mwa lagala lya MLUME, gubasambile batu bose, ¹⁵ MLUME gwa bilume pambwa, Abetcha a Isilaeli, gwagana bino, Toolwe, nilusha hegulu ha gino mbuga, na hegulu ha tumabuga twage tose, bubii bose bwine bwandiganine yulu yagyo; bululi baita maoshi mabo uba magumu, ibalo bashihuliche binywa byanyi.