¹ Ino inywa noo imchilile Yelemia, uhuma wa MLUME, ugana. ² Gimana, wasale ndaa na ndu gya m'bumbi, na ubo niuhulidicha binywa byanyi. ³ haho nisalile ndaa na undu gya m'bumbina loola, gubele hugila mgilo gwage gya bichigi. ⁴ Na iya itundu, yelibele huswaga, haidogile mmuboo wage guya m'bumbi, guiitile iyaka uba inge itundu, nahi byelimonine bisoga guya m'bumbi wiibumba. ⁵ Haho inywa ya MLUME injwilile, ugana, ⁶ Ee ndu gya Isilaeli, wi wii! nishinaosha nene umgilila benywe byoka biya nahi guno m'bumbi byeligile? MLUME gwagana. Loolwe, nahi biya bili bitete mmaboo ma m'bumbi, noo byamli benywe mnda maboo manyi, Ee ndu gya Isilaeli. ⁷ Mengo momose mandilisamba mwano gwa mmoga, namwano gwa buoolo, ubuchula, na ubunoga, na ubudiga; ⁸ uba mmoga guya gwandilumbule, gwigaluwa, na uleya buubi bwage nileelela, nishigila iyaka buyabuubi bwandilangile ubagila. ⁹ Na mengo momose mene mandihana mwano gwa mmoga, na mwano gwa buoolo, ubugubaa na ubuuna, ¹⁰ uba bigila buubi umbele wa meeso manyi, basahunyemya liidi lyanyi, bino, nileelela, nishigila buya buubi byine bwandilangile ubagila. ¹¹ Bibyo! Bino, wabasambile batu ba Yuda na bashami ba m Yelusalemu, wagane, MLUME gwagana bino, Loola, nilihuswaga buubi yulu yenyu, na ulanga malanga yulu yenyu; giwilwe hano,mtu gegese nagaleye ndila gyage giibi; longiwwe madila menyu, na bigilanywa byenyu. ¹² Mndi boo bagana, Hashi maudagilo momose; bululi benswe twilama malanga metu beswe bene, beswe twigila kila gumwechi gwetu waulamana na ugumagala wa mtima gwage gubii. ¹³ Bino, wa yulu ya bibyo, MLUME gwagana bino, Buchiwe hano u mioga, mnanyi gumwe gwabo guhwile uhulicha mwano gwa bihisho naho bino; inyundu ya Isilaeli yahisha ihisho ya uchigilicha abisa. ¹⁴ Wi wii! Imundi-mundi ya Lebanoni yihuma mnda liwe lya mlubala? Nambo wi wii! Maadi ma peho mugela uhuma koo miama? ¹⁵ Bululibatu banyi bangibilila, batambikila buswenge u bya bunene; nabo babalunga mnda madila mabo, mnda mahitilo ma aala, yulu bahite u madila ma mibamba, mda ndila gisi gyagilongye. ¹⁶ yulu ya uita sii gyabo uba itu ya ugagicha, naya ushigwa yoga masugu mose; mtu gegese mine gwihita hoka nagyo gwigagilwa, na udigicha mswe gwage. ¹⁷ Nene nubasala u mbele wa meesoma tumangu, nahi wa mnaga gwa mlugulu; nene nilola u kungu chabo, na bishi byenyi byabo, lusugu lwa asusu abo. ¹⁸ Haho noo habadogomine, Chuwe tuiswe mmungu yulu ya Yelemia; bululi m'bindo gushimchimina ibuli, na mmungo gushimchimina gwina lwengu, na ata inywa ishimchimina mbuwa. Chuwe, na tummule wa ndimi chetu, na tushilochi binywa byage byobyose. ¹⁹ Undole, Ee MLUME, wahuliche madi mabo bene balihuhimana nanyi. ²⁰ Wi wii! Buubi bugiwichiwe hanyuma ha busoga? Bululi baidabila ichuli-chuli yanyi ya mwego iina. Engelecha byandigimene u mbele obe, bululi nadogome bisoga yulu yobe, nigalulile uchigililwa ubo ushibe hegulu habo. ²¹ Wa iyo ibalo, ubahunye baana bano bamone ndala, ubahunye wa bwigi bwa ahilu abahage; baachi babo bawilwe na baana babo, na uwilwa na balume babo; balumyana babo bahagwe, na bawalubaga babo bahagwe wa ahilu u bita. ²² Lilo na lihulichiwe ngubi chose mnda madu mabo, haho holichwisha basolokoto yulu yabo wa ubabulwa; wa bululi bandabila iina bambwate, nabo babisila magulu manyi magochi. ²³ Mndi gogwe, MLUME, ugidi mihungo gyabo gyose yulu yanyi, ma upaga; ushibaleelele buubi bwabo, na ushichime buubi bwabo umbele wa meeso mobe; yulu bachigilwe yulu yobe; ubagilile bihisho mengo ma sungu chobe.