¹ Inywa ya MLUME imchwilile Yelemia yulu ya mwano gwa uhulwa wa mabula. ² Yuda ili mmalilo, Na michango gyage gyalebela; Bashamine hasi bachwale anyiki; Na lilo lya Yelusalemu lyahiya hegulu. ³ Na bahele babo basuhila baana babo u maadi; Nabo basuhiya u bishima bashimone maadi; Basugiwila na byombo byabo bili hululu; Balihumona abule na unogeya mitima Na ugiwila miswe gyabo. ⁴ Wa ibalo ya gigyo sii gyine gigumine na ugaduwa mitanji, bululi mbula gishinyene mnda gigyo sii, Balimi badambile mmee, Na uunina miswe gyabo. ⁵ Ehe, kulungu nagyo gyabuta mlubugu, Gyashiga mwanage bululi hashi maadi. ⁶ Na pende chagimana u masongo ma koono, Huuhemena nahi mibwabwa; Meeso macho mashihumona bisoga, yulu hashi byaanyi. ⁷ Inangwa buubi bwetu buli hutubangisiya, haho gogwe ugile ulamana na china lyobe, Ee MLUME, bululi ugiwila unyuma wetu ii wiingi; tuugila buubi. ⁸ Gogwe mine uli maudagilo ma Isilaeli, gogwe uli mmogononyi gwage mengo ma asusu, yulu yai gogwe usili nahi mtu gulimshame mnda sii gya bugenyi, na nahi mtu guli na lwendo, gulihuligalula lwendo lumwechi kaa na busugu nuuya? ⁹ Bululi bwai gogwe usili nahi mtu gwababuwa, nahi ilume pambwa yine ishihuosha uhugonona? Bino gogwe, MLUME, uli hawingi hetu, na beswe tulihugiswa wa china lyobe; ushitutele. ¹⁰ MLUME gwasambila bano batu bino, Bibyo noo buyabaundile ulugila-lugila; bashichibile magulumabo; bino, MLUME bashihugitabicha; mndi MLUME gwiuengelecha usona wabo, gwihugumbila buubi bwabo. ¹¹ Nage MLUME gusambile, Ushibasabile bano batu bale na luhanga lusoga. ¹² Habihamba nangu uya iliwa, nene nishihulicha lilo lyabo; na habitangila lutangi lwa uchigya nalutangi lwa buusu, nishibibenja; bino nibachimya wa ahilu, na wa ndala, na wa bisumi. ¹³ Haho niganine, Aa, MLUME, ABETCHA! Loola, bambuwa bali hubasambila, Mushimona ahilu, na mushibi na ndala; bibyo nibaha talala gya ugililila ha ino ihana. ¹⁴ Haho MLUME gusambile, Babo ba mbuwa balihubuwa lulimi wa china lyanyi nene; nene nisabahila, na nisabasambila, na nisadogoma nabo; bamma bubuwa bwa malo ma lulimi, na ubuwa, na inywa ya usona, na malanga ma mitima gyabo. ¹⁵ Bino, wa bibyo MLUME gwagana bino, Wa mwano gwa ba mbuwa bene balihubuwa wa china lyanyi, na nene nisabatuma, haho balihugana ahilu na ndala bishibi ho mnda gino sii; Wa ahilu na wa ndala babo ba mbuwa bihagwa. ¹⁶ Na babo babo, bene bahelwe bubuwa nabo, bitelwa hambuga u masango na ndila ma Yelusalemu wa yulu ya ahilu na ndala; ata bibyo bashibi namtu gubachiya, boo na baachi babo na bawalubaga babo na bawamisiha gyabo; bululi hihongolola usona wabo hegulu habo. ¹⁷ Gogwe wibasambila ino inywa, Meeso manyi na masuwe luhanga, busugu na chuba, na lushisunge; bululi inyundu msiha gya batu banyi, gwanogeya unogeya wa wata, wa lase lishibahona. ¹⁸ Nabegimana ugya ulubala, loola, bali uya bene bahagilwe wa ahilu! Nambo nabegingila mmbuga, loola, balimo bene balihusumwa ibalo ya ndala! Bululi mbuwa na ibuli, bose babili, balihugya ubo na ubo mnda sii, na bashi ata na malango. ¹⁹ Wi wii! Wammanya Yuda abisa? Mtima gogwe gwaonywa Sayuni? Yulu yai wtuhula, tushibe na buganga bwa utuhonya? Tulolele talala, ata bibyo hashichwile busoga bobose, tulolele mengo ma uhona, na loola, unogeya mitima kaa! ²⁰ Ee MLUME, twalibecha buubi bwetu oli, na usona wa bamasetu; bululi tuugila buubi. ²¹ Ushituonywe, wa yulu ya china lyobe; ushyidambye mme iti yobe ya buulo ya ugengeda obe, engelecha, ushibele alago ulibiile netu. ²² Wi wii! Mnda bitu bya ugilwa bunene bya mioga, hali itu yoyose inaosha ulusha mbula? Wi wii! Gulu linaosha unoya buhembu-hembu? Wi wii! Gushi gogwe, Ee MLUME, Abetcha etu? Wa yulu ya bibyo twiuhemba; bululi gogwe noo ubiitile bino bitu byose byine biliho.