¹ Ino inywa noo idigimine MLUME, yulu ya mwano gwa Babeli, na yulu ya mwano gwa Bakaldayo, waanywa a mbuwa Yelemia. ² Lisambwe u moiga , Mulisambe na ugimiya bendela; Lisambwe, mushibise, dogomwe, Babeli waguhwa! Beli gwadambiwa mmee; Melodaki gwadamba mmee; Miishi gyage gyamoneya abule, tumiishi twage twadambiwa mmee. ³ Bululi uhuma luubi lwa uboo wa uachi mmoga gulihuchwa yulu yobe,lyigila sii gyage uba mauwa; na hashi na mtu mine gwishama mo; basinine, baligilile lwabo, batu na nyama nacho byoka biya. ⁴ Ha lulo lusugu, na mamo mengo, MLUME gwagana bino, baana ba Isilaeli bichwaboo na baana na yuda hamwechi; Bigya nagyata mndila gyabo balihulila, nabo bimmenga MLUME, Abetcha abo. ⁵ Bibucha mwano gwa Sayuni, na byenyi byabo bilihulola uya, babihugana, Benywe chuwe, lilungwe na MLUME, wa alago a milumbu ene ashigibililwa. ⁶ Batu banyi basili miyoo gyine gichimine, baushi bagyo bagichiminya; bagihubya m koono; gisili huhabagana-habagana uhuma u lulu loono na ugya u lulu loono, gyagibilila ihana yagyo ya ulihocha. ⁷ batu bose bene balihugimona balihugiya; tumangu ywabo tuganine,Beswe tushi na abachi, bululi boo bagilile buubi uli MLUME, guli bushamo bwa kiine, noo, MLUME maudagilo ma bamasabo. ⁸ Sinywe uhuma hawingi ha Babeli, mwahume mnda sii gya Bakaldayo, mwabe nahi malunga ma mabuchi u mbele wa bihichi. ⁹ Bululi yulu ya Babeli nibyula na ulusha sumbilo lya mioga gya gyaata, uhuma ibaloo ya lubi lwa uboo wa uachi; nabo bililongya yulu yage; uhuma uya gwigohwa; migwi gyabo gibi nahi gya ilume pambwa ili na yino; hashibi ata na mgwi gumwechi gwigiwila benene gushi guhagane. ¹⁰ Nabo Bakaldayo babi kole; bose bene bigiwata kole bigyuta, MLUME noo gwagana. ¹¹ Bululi muli na saaso, wa ibalo mwaseelela, benywe bene walihuwata kole buhyana bwanyi, bululi mwahuhanga nahi nyama gishinabuta guluhugyatila bisolwaganywa, benywe mulihulila nahi falasi chine chili na uoma. ¹² mnenyu gwimona abule abisa; guya mine gum'butile gwidamba mmee; loola, gubi mmoga gwine guli unyuma wa mioga ginge gyose, gubi mgala, na sii gya gishi na mabula, na lele. ¹³ Wa yulu ya uchigililwa wa MLUME gigyo sii gishishaminywa na mtu, bibyi gibi mauwa na hululu; kila mtu gwihita hoka na Babeli gwigagilwa, gwishiga yoga wa yulu ya bihulo byage byose. ¹⁴ Lilongamanyiwe yulu ya Babeli ngubi chose, Benywe bose bene basuhinga buta; Mulwe, mushichibile ata mgwi gumwechi wa nangu uhagana; Bululi gwamgila MLUME buubi. ¹⁵ Mummitile mdodo ngubi chose; gwalihana; Migumbo gyage gyagwa, bibambacha byage byabelwa; Bululi ii igiwidicha wa MLUME; mumgiwidiche buubi wa buubi; Nahi biya byeligilile, nage gagililwe byoka biya. ¹⁶ Mmunyi gwachingwe koo na Babeli, Nage guya guli m'bwate idabo mengo ma usola; Wa yulu ya usila ahilu ene ali humonenana, Bigaluwa kila mtu uli batu bawabo. Nabo bisinina kila mtu m sii gyage. ¹⁷ Isilaeli ii mmoo gusambalachiwe; tambwe gyamchinga koo; utula oolo lya Ashulu gwamya, na isula noo Nebukadleza gugo,oolo lya Babeli, gwam'bela mauda. ¹⁸ Bino, MLUME gwa bilume pambwa, Abetcha a Isilaeli, gwagana bino, Loola, nene nimmonona oolo lya babeli, na ibaloo yage, nahi biya gyandionone oolo lya Ashulu. ¹⁹ Nene nimmyicha Isilaeli iyaka u bulilo bwage, nage gwilila hegulu ha Kalmeli, na Bashani, na ichuli-chuli yage ya mwago yigyuta hegulu ha koono cha Eflaimu, na hegulu ha Gileadi. ²⁰ Haho maya masugo na mamo mengo, MLUME gwagana, usona wa Isilaeli wiengwa, na hashibi na usona; na buubi bwa Yuda bwiengwa, na bushimoneya; bululi nibaleelela baya bandishiga uba mihona. ²¹ Seela hegulu ya sii gya Melathaimu, ehe, hegulu hagyo, na hegulu ha baya bene balibashame Pekodi; haga, wabadiige hanyuma habo, MLUME gwagana, wagile nahi byandiulagile, byose abisa. ²² Hali lwindo lwa bita mnda gino sii, Lwindo lwa ugugicha wa waata. ²³ Bisili wii nondo gya ibaloo yose , Uchingwa koo na ubelwa? Bisili wii Babeli uba mauwa hawingi ha mioga? ²⁴ Nuuhingila gochi, Ee Babeli, na gogwe wiwaswa, na gogwe ushibele na mwano; umoneye, wawaswa, bululi uhimene na MLUME. ²⁵ MLUME gwasula wesubiila tuome twage, nage gwahutobola tuome twage gwa uchigililwa wage; bululi Mlume, MLUME gwa bilume pambwa, gwina mgilo gweligila m sii gya Bakaldayo. ²⁶ Chuwe weli uhuma ulugumba lwa koo; Sulwe tuhombo twenyu; Giiswe uba bibunduguchu na ugigugicha abisa; Mushimshigile itu yoyose. ²⁷ Mushinje bisuganywa byage byose; Na byasalile u bushinjicho; Luhanga lubi wabali! Bululi masugu mabo mahuwilila, Mengo ma uchwilwa wabo. ²⁸ Madi mabo bene balihusina na uhugonona, Uhuma mnda sii gya Babeli, Yulu ya utele sayuni mbila gya ugiwidicha wa buhushi bwa MLUME, Abetcha etu, Ugiwidicha buubi yulu ya lubunga lwage. ²⁹ Bagiswe bashi ba mata yulu ya Babeli, Ehe, bose bene basuhinga mata; Gimiwe bitula uchunguluwa ngubi chose; Bululi gashihogonowe mtu ata gmwechi gwabo; Mlipwe ulamana na mgilo gwage; Mgililwe ulamana na byose byeli mgile; Bululi gwagila bya anene uli MLUME, Yulu ya guya guli Mmaha gwa Isilaeli. ³⁰ Wa yulu ya bibyo bawalubaga bage bigwa umasango na ndila mage, nabatu bage ba bita, bose nabo, bilewa mdodo luya lusugu, MLUME gwagana. ³¹ Loola, nene nili hegulu hobe, Gogwe gwa anene, MLUME gwagana, MLUME gwa bilume pambwa; bululi lusugu lobe lwahuwilila, mengo mandiuchwila. ³² Na mine gwina anene gwilihyatala, nugwa, nahashi mtu gwimginuna; na nene nilamya aahya mnda mbuga gyage, nao ubachigya bose bene bali bamchunguluwe ngubi chose. ³³ MLUME gwa bilume pambwa gwgana bino, Baana ba Isilaeli, na baanaba Yuda, bamonenywa hamwechi; na batu bose bene babawashile kole babachunguluwa abisa; bahanya ubalecha. ³⁴ Mmogononyi gwabo gwina uoma abisa; MLUME gwa bilume pambwa noo china lyage; gee gwibadogomena wa bichigililwa, gaoshe ugibiya sii na talala, na ubahucha talala bashami ba Babeli. ³⁵ ahilu ali hegulu ha Bakaldayo, MLUME noo gwagana, na baya bali bashame Babeli, hegulu ha bauulu bage, na hegulu ha batu bage bose bene bali na lwengu. ³⁶ Ahilu ali hegulu ha bene bali hulitona, nabo babi bahugi; ahilu ali hegulu ha biluma pambwa byage, nabo bidambiwa mmee. ³⁷ Ahilu ali hegulu ha falasi chabo, nahegulu ha tubilibili twabo twa bita; nahegulu ha batubose bene balisumbaganye nabo, nabi babi nahi baachana; ahilu ali hegulu ha lindo lyage, nabyo bigibwa byose. ³⁸ Uhulwa wa mbula ubi hegulu ha maadi mage, namo migumiwa; bululi ii sii gya miishi gya ubachwa, nabo bawaswa na mnaga yulu ya miishi gyabo. ³⁹ Bino, byiila byose bya mgala, hamwechi na milunga, byishama mgigyo sii, na mbuni chishama mnda mwagyo; nagyo gishimwa na mtu milumbu; na hashi mtu gwishama uya utula ibushi ndaa na ibushi. ⁴⁰ Nahi biya bigiliya Abetcha heligwishiche Sodoma na Gomola, na mabuga mose mene mabele hoka namo, MLUME noo guganine; byoka biya hashi mtu mine gwishama mwagili gigyo sii, na hashi mtu gegese mine gwishama mo nahi mgenyi byesushama ubugenyi. ⁴¹ Lingamina, batu bichwa uhuma luubi lwa uboowa uachi; ii mmoga gwata, na maoolo meengi mibyulwa uhuma ngubi cha isula ya ibaloo. ⁴² Biwata mata na masumo; ii ba buhuli-huli abisa, bashi na misa; Madi mabo malihututa nahi bahali, Nabo babi bachine falasi chabo; Kila gumwechi mlibiya nahi guluhubya ubita, Oli gogwe, Ee msiha gwa Babeli. ⁴³ Oolo lya Babeli lyahulicha mwano gwabo, Na maboo mage magingila bugongole; Asusu ahumyila, na masumwa, nahi biya mmachana byesuba ha busungu bwage. ⁴⁴ Lingamina, gwigimana nahi tambwe uhuma mmahumbu a Yolodani uli biliwa byine bishibahonga; ata bibyo nimsinya wa um'babula gabishige; na guya mine gusobolwe nim'biya hagulu hage; bululi m nanyi guli nahi nene? Iyaka m nanyi gwingolela mengo manyi ma ushama? Iyaka ii mmushi nai mine gwigimana umbele meeso manyi? ⁴⁵ Bino, guhulichiwe mmungo gwa MLUME, Gwelihungile yulu ya Babeli; Na malanga mage mene melilangile yuluya Bakaldayo. Chigilwe bimnanana, ehe, tulela twa ihichi; Chigilwe biliwa byabo byihungulwa yulu yabo. ⁴⁶ Wa lwindo lwa uguhwa Babeli sii gyadanda, Na lilo lyabo lyahulichiwa u mioga gyose.