² Bino, wa iyo ibalo, loola, masugu mali huchwa, MLUME gwagana, nibahulidicha lwindo lwa bita hegulu ha Laba, mbuga gya Amoni, nagyo gibi ibunduguchu ya mauwa, na misiha gyage gichigiwa na aahya; haho noo Isilaeli gwibahyilila baya bene babele babahyilile, MLUME gwagana bibyo. ³ Ta lungo mbila, Ee Heshboni, Bululi Ai gyachigiwa; Liilwe benywe misiha gya Laba, Lichwiiwe bichwalaganywa bya bilembelemne; Biwe malilo, na uhingwa abilo ubo na ubo hawingi ha migumbo; Bululi Malkamu gyigya ubululwa, Bibuli byage na baosobu bage hamwechi. ⁴ Yulu yai ulihulitona yulu ya bibetabeta, ibetabeta yobe yine ili na bishima bya maadi, Ee misiha gwina lubengo? Usuudagila ma lindo mobe, uganine gwihuma uhi mine gwinjwila? ⁵ Loola, nilusha oli udidibuwa, MLUME gwagana, MLUME gwa bilume pambwa, yine yihuma u bose bene bali bauchunguluwe; benywe mwichingwa hambuga, kila mtu koo abidsa,na hashi mtu gubasumbicha baya bene bali bashiminyu. ⁶ Haho hanyuma ha bibyo nibagiwicha baana ba Amoni bene bali ubucha. ⁷ Mwano gwa Edomu. MLUME gwa bilume pambwa gwagana bino, Wi wii! hashi iyake mine gwina lwengu mnda Temani? Mihungo gyabachimina bene bali na lwenyi? Wi wii! Lwengu lwabo lwaguluwa? ⁸ Sinywe, giwilwe unyuma, shamwe hasi abisa, benywe bene mulibashame Dedani; bululi nichwisha asusu a Esau hegulu hage, mengo mandi mmonona. ⁹ Wi wii! nambo bahombi ba zabibu babauchwila, basabaleya zabibu chitolwe? Nambo babachwa beebi m'busugu, basabadogya ndaa na hene habaongola bya biingi? ¹⁰ Ata bibyo namleya Edomu gusha na atu, nahaununa ha ihanayage ya bubisa, na gishiosha ulibisa; ibushi yage yadigwa, na bashiwabo, na babinji nage, na gee mine gushihoo. ¹¹ Baleye baana bobe bashi na sabo, nene bibausa babe na mwego, na bawilwa bobe bakudagile nene buchima. ¹² Bululi MLUME gwagaba bino, Loola, baya bene bashi bagolelwe unywa isengo, biinywa,ii chigilwe; na gogwe wii! Uli mtu guya mine gushiononywa abisa? Hange wiononywa, ehe, unywa winywa. ¹³ Bululi nalaha wa ichuli-chuli yanyi ya mwego, MLUME gwagana, Bozla ubi bisaga, na abule, na mauwa na buloga; namabuga mage mose mabi mauwa masugu mose. ¹⁴ Nihelwe mwano uhuma wa MLUME, na Mmichi gwahilwa hawingi ha mioga, Guganine, Lisumbichiwe, mwagichwile, Mwagimane na ugya ubita. ¹⁵ Bululi nuita uba mcho hawingi ha moiga, na unenunywa u batu. ¹⁶ Yulu ya mwano gwa ubiyana booba bobe, Anene a mtima gobe ubicha, gogwe ulimshame mnda mgumbo gwa mawe, usuhulicha mdodo gwa koono; Inangwa unabiya iisa yobe hegulu abisa nahiya loochi,Niusacha na uuhunya ubo oli, MLUME gwagana. ¹⁷ Edomu gubi bisaga; kila mtu mine gwihita gwigagilwa, na ushiga yoga, wa yulu ya bihulo byage byose byelihulilwe. ¹⁸ Nahi biya byine bigiliye ha ugwishiwa wa Sodoma na Gomola, na mabuga mose menemabele hoka namo, MLUME gwagana, hashimtu gwisha ubo, nahashi mtu gwishama uya nahi mgenyi byesushama. ¹⁹ Lingamina, gwitobowa nahi tambwe uhuma mmahumbo a Yolodani u bulilo bwine bushibahonga; ata bibyo nimchinga wa um'babula gabishige; nagee guya mine guli msobolwe nim'biyahagulu habyo; bululi ii nanyi guli nahi nene? Iyaka ii nanyi mine gwingolela mengo mu shama hano hamgala? Iyaka ii mmushi nai mine gwigimana u mbele wanyi? ²⁰ Bino, hulichiwe mmungo gwa MLUME; Gweliitile yulu ya Edomu; Na malanga mage mene melilangile, Yulu yabo bene bali bashame Temani; Chigilwe bibabula, ehe, bamilongo ba ihichi; Chigilwe biliwa byabo bihunguwe wa yulu yabo. ²¹ Sii gyadanda yulu ya llidi lya ugwa obe; Hali lilo, naliidi lyage lyahulichiwa u bahali lya Shamu. ²² Loola, gwichina nauguluwa nahi loochi, na uganda bihwahwa byage hegulu ha Bozla; na mitima gya bilume pambwa bya Edomu lulo lusugu gibi nahi mmachana guli nabusungu bwage bwa ubuta. ²³ Mwano gwa Dameski. Hamathi wadamba mme, na Alpadi nage; Bululi bahulicha mwano gubii; uchigililwa uli m'bahali. ²⁴ Dameski gyahulwa talala; Waligalula usina; udanda wagiwata; Asusu na uchigililwa byagiwata, Nahi bya mmachana ha busungu bwage. ²⁵ Bisili wii mbuga gya punda gisashigwa, mbuga gya saaso lyanyi? ²⁶ Wa bibyo bawalubaga bage bigwa u masango nandila magyo, na batu bose ba bita bishamiwa pii lulo lusugu, MLUME gwa bilume pambwa gwagana. ²⁷ Nene nilamya aahya wibambacha ya Dameski, nao uchigya madu ma Ben-hadadi. ²⁸ Mwano gwa Kedali, na gwa maoolo ma Hazoli, mene oolo lya Babeli melilwile. MLUME gwagana bino, Gimanywe, giwe ndaa na Kedali, mwabawate kole batu ba lubii lwa uboo wa uachi. ²⁹ Bitula byabo na bihichi byabo bibiguha; biguha ma pashiya mabo wa alambwe abo boo bene, na bitundu byabo byose, na ngamia chabo; nabo bibaitila mdodo bali hudogoma, Booba buli ngubi chose. ³⁰ Benywe sinywe, giwe koo muli huhabagana-habagana, shamwe hasi abusa, benywe bane mulihushama Hazoli, MLUME gwagana; bululi Nebukadleza, oolo lya Babeli, gwaita mmungo yulu yenyu, nagegwahunga mmungo yulu yenyu. ³¹ Gimanywe, giwe ndaa na moga gwine guli na ulihocha, guligushame gushi na uhubagana, MLUME gwagana; bashi na michango na bashi na biikwa, bali bashame boo buchima. ³² Na ngamia chabo chiwaswa kole, na bihichi byabo biingi bibi kole; nene nimsala ndaa na mnaga gose batu baya balihubega alembe a ushiga a wigulu; nene nilusha masusu mabo uhuma ngubi chabo chose, MLUME noo gwagana bibyo. ³³ Na Hazoli bubi bushamo bwa mibwabwa; mauwa milumbu; hashibi na mtu mine gwishama ubo, na hashina nanmtu mine gwishama uya nahi bisushama mgenyi ubugenyi. ³⁴ Inywa ya MLUME ichwilile Yelemia mbuwa, yulu ya Elamu, helitulile Sedekia uhyilila, oolo lya ba Yuda, ugana, ³⁵ MLUME gwa bilume pambwa gwagana bino, Loola, ninoga buta bwa Elamu, bwine buli bwata na maudagilo ma uoma wabo. ³⁶ Na hegulu ha Elamu nihila mnaga guna, uhuma masunga mana ma gulu, na nene nibasala ndaa na mnaga guna gose, na hashi mmoga gwine gwabashihyiila babo batu ba elamu bene bachingilwe uhuma mnda sii gyabo. ³⁷ Nene nibadambya mme batu ba Elamu u mbele wa tumangu twabo, na umbele wa baya bene balihuenga mitima gyabo; nene nilusha usona, ehe, sungu chanyi cha buhuchi, MLUME gwagana; nene nihila ahilu abalaminine, ndaa na hene handibadiga; ³⁸ nene nibiya isuba yanyi ya buoolo ubo elamu, nene nibagugicha, oolo na baosobu, baahume ubo, MLUME gwagana. ³⁹ Haho hahabi, mnda mwa masugu ma isula, nibagiwicha bahambwa ba Elamu, MLUME noo gwagana bibyo.