¹ Mwano yulu ya Moabu. MLUME, gwa bilume pambwa, Abetcha a Isilaeli, gwagana bino, Luhanga luubi lwage Nebo! Wa yulu wagugila; Kiliathaimu wadambiwa mme, waguhwa; Misgabu wadambiwa mme, nagyo gyabelwa. ² Punda cha Moabu chishiho iyaka; uya Heshboni malanga bya buubi yulu yage, Biino! Chuuwe, tumsinye koo gashibe mmoga. Gogwe na gogwe, Ee Madmena, biushamya pii; ahilu iulama. ³ Liidi lya liilo uhuma Holonaimu, Lya uwaswa kole na ugugichiwa waata. ⁴ Moabu gyagugila; Banuna bage babahulicha batu balihulila. ⁵ Bululi batu habasusela uya Luhithi Bigya na bashihuleya ulila; Nabo batu habiundumuwa uya Holonaimu Bachigililwa yulu ya lilo lya ugugila wa mbuga. ⁶ Biino! Sinywe! lihugononywe bichuli-chulu byenyu bya mwego! Mwabe nahi mtu guli gee buchima. ⁷ Bululi waudagila bigilanywa byobe, nalindo lyobe, gogwe na gogwe wiwaswa; na Kemoshi gwichuwa nugya ubululwa, bibuli byage na baosobu bage hamwechi. ⁸ Na gee gwauhata kole gwichwa hegulu ha mabuga mose, nahashi mbuga gyine gyihogonowa; ibetabeta nayo yidigwa, nagyo sii gya ibandabanda gyigugichiwa; nahi biya buganine MLUME. ⁹ Mme Moabu bihwahwa, yulu gaguluwe nugya lwage; na mabuga mage mabi mauwa, mashiba na mtugumashamina. ¹⁰ Na galogwe mtu gegese mine gwigila mgilo gwa MLUME wa boonyo; na galogwe mtu guya mine gwichibila ahilu ashigese maashi. ¹¹ Moabu gulitudiche utula u buwalubaga gwage, nage gwalihocha hegulu ha bishishi byage, na gushihongololwe uhuma mmii ibiilo na ubiwa mmiinge ibiilo, na gushigile uhambwa; wa bibyo ulemba wage gwashigala nao, na ata bushio bwage busagaluwa. ¹² Bino, loolwe, masugu malihuchwa, MLUME gwagana, nimmilila gwa buhongolola, nabo bihongolola, nabo bigesa byose byine bili m'bibiilo byage, na ubela bibila byage bibaa bibaa. ¹³ Na batu ba Moabu bimona abule wa yulu ya Kemoshi, nahi ndu gya Isilaeli byelimonine abule yulu ya Betheli, maudagilo mabo. ¹⁴ Mulihudogoma wii benywe, beswe tuli bilume pambwa, tuli batu babaolobele bita. ¹⁵ Moabu gyadogiwa, ma mii gwa mabuga mage gwasela; na bawalubaga bage babasobolwe baundumuwa ugya ushinjiwa, Oolo lyadogoma, guya mine china lyage ii MLUME gwa bilume pambwa. ¹⁶ Asusu a Moabu ahuhiya hoka, Na masusu mage mahuhinga abilo wa uhiya. ¹⁷ Benywe bose bene bali bamchunguluwe, mlililwe, Na benywe bose bene ali bamane china lyage, dogomwe, Nahi biya binogeye lubango lwa buoolo, Lubango luya lwine lubele lubenju! ¹⁸ Ee msiha guli gushame Diboni, Usale uhuma ugengeda obe, ushame na yuma; Bululi mine gwawata Moabu kole gwashama hegulu hobe, Gwabela migumbo gyobe. ¹⁹ Gogwe mine ulimshame Aloeli, Ushame hibamba ha ndila udinde; Ubuche mlumyana guya gulihusina na mmachana guya gulihutolowa, gana, Yagiliya ii? ²⁰ Moabu gwadambiwa mme, bululi gwabeleya; Tewe lungu mbila na ulila; Lisambwe guno mwano uya Alnoni, Yulu ya Moabu gwasambulwa. ²¹ Na uonona wahyiila sii gya ibandabanda; hegulu ha Holoni, na hegulu ha Yasa, na hegulu ha Mefaathi; ²² na hegulu ha Diboni, na hegulu ha Nebo, na hegulu ha Beth-diblathaimu; ²³ na hegulu ha Kiliathaimu, na hegulu ha Beth-gamuli, na hegulu ha Beth-meoni; ²⁴ na hegulu ha Keliothi, nahegulu ha Bozla, na hegulu ha mabuga mose ma sii gya Moabu, menemali koo na mene mali hoka. ²⁵ Lwiga lya Moabu lwagedeya nauboo wage wanogeya, MLUME gwagana. Mmewe malwa gaolwe; bululi gwalitona yulu ya MLUME. ²⁶ na Moabu gwilibilingisha mnda biselwa byage, bimgwecha. Bululi Isilaeli, wii!Gushibele weenja oli? ²⁷ Gumoneye hawingi ha beebi? Bululi mengo momose mene mosumlumbula usumaa mswe gobe. ²⁸ Benywe bene mulihushama Moabu, shigwe mabuga, Giwe ushamwa mmiao gya mawe; Mwabe nahi akundulu alihuyenga iisa yage wibamba ya mlomo gwa iina. ²⁹ Tuhuliche mwano gwa anene a Moabu; Ugana gwina anene eengi; Buhulihuli bwage na anene age, na ulimona wage, na byeliliginune mnda mtuma gwage. ³⁰ Nigidi uhugumbilwa wage, MLUME gwagana, na uba ishiatu; ulitowa wage ushigilile inywa yoyose. ³¹ Wa yulu ya bibyo Moabu nimtela lungu mbila, ehe, niita mdodo wa yulu ya Moabu gose; nibiya mailo batu ba Kil-helesi. ³² Niulilila, Ee mzabibu gwa Sibma, wa malilo mamahita ma malilo ma Yazeli; matabi mobe matandele hegulu ya bahali, mahiile ndaa na bahali lya Yazeli; m'bwashi gwa kole gwabigwila biguma byobe bya mwngo ma kamo, na mengo ma usola zabibu chobe. ³³ Saaso na useelela byahumiwa, mnda lubala lwine lusuwata biliwa abisa, na mnda sii gya Moabu; na nene nasungya divai walisudengwa; hashi mtu mine gwihina zabibu wa useelela; useelela uya ubi ushi useelela. ³⁴ Uhuma u lilo lya Hashboni ndaa na Eleale, ehe, ndaa na Yahasa, bagabuwa madi mabo, uhuma Soali ndaa na Holonaimu, ndaa na Eglath-shelishia; bululi maadi ma Nimlimu namo mabi mauwa. ³⁵ Hamwechi na bibyo, MLUME gwagana, mnda Moabu nimsungya abisa mtu guya mine gwitambikila lutangi wihana ya hegulu, na guya mine hulihuhulidicha aswenge tubetcha twage. ³⁶ Wa yulu ya bibyo mtima gwanyi gulihugaba nahi filimbi yulu ya Moabu, na yulu ya batu ba Kil-helesi, mtima gwanyi guluhugaba nahi filimbi; yulu ya bya biingi byachimina. ³⁷ Bululi kila msweguli na ibanda, na alembe ose abegwa; maboo mose mali na mihuli gya sao, na munda chose chahwiiwa bichwalaganywa bya bilembelembe. ³⁸ Hegulu ya butato bose bwa madu ma Moabu, na umasango nandila mose, uli malilo, bihana byose, bululi mabela Moabu nahi ibya ishi ya ibenju, MLUME gwagana. ³⁹ Biya byelibeleye! Tewe lungu mbila! Biya biteile Moabu mgongo wa abule! Byoka bibyo noo bibi Moabu wa usebululwa, na ibalo ya ugagicha batu bose bene bali bamchunguluwe. ⁴⁰ Bululi MLUME gwagana bino, Loola, gwiguluwa nahi loochi, na ugolola bihwahwa byage hegulu ha Moabu. ⁴¹ Mabuga mawaswa na migumbo gyabelwa, na mitima gya bilume pambwa bya Moabu luya lusugu gibi nahi mmachana gwina busungu bwage. ⁴² Na Moabu gyidigwa, bashibe iyaka mmoga, wa yulu ya uliginina hegulu ha MLUME. ⁴³ Udidibuwa, na iina, na gochi, byachwa oli, Ee gogwe mshami gwa Moabu, MLUME gwagana bibyo. ⁴⁴ Mine gwisina udidibuwa gwigwa mmina; naguya gwihuma mmina gwiwaswa na gochi; bululibibyo byichwa weli, noo, uli Moabu, mwaa gwa uchwilwa weli, MLUME gwagana bibyo. ⁴⁵ Basina, bene bashi na nuoma Bagimana hasi ha ichuli-chuli ya Heshboni, Na aahya ahuma mnda mwa Heshboni, Na lulindi lwa aahya lwahuma Sihoni Nao ashigya meega ma Moabu, Na lubombo lwa miswe gya batu bene balihuita mdodo.. ⁴⁶ Luhanga lubi lobe! Ee Moabu, Batu ba Kemoshi bachimina; Bululi baana bobe bawaswa kole, na misiha gyobe bagya ubucha. ⁴⁷ Ata bibyo nibagiwicha batu ba Moabu masugu ma isula, MLUME gwagana. Uonona wa Moabu wahyiila haho, bubo noo bubuwa bwa Yelemia.