¹ Haya helihwile Yelemia ubasambila bibywa byose bya MLUME, Abetcha abo, byelibatumine wabali, noo, binywa biya byose. ² haho Ahazia, mwaanagwa Hoshaya, na Yohana, mwaana gwa Kalea, na nabatu bose bene bali na anene baganine, babele humsambila Yelemia, Wadogoma lulimi; MLUME, Abetcha etu, gusutuma ugane, Mushigye Misili ushama ubo; ³ mndi Baluku mwaana gwa Nelia, noo gusongamanya yulu yetu, yulu ya utubiya mnda maboo ma Bakaldayo, yulu batuhage, na utuwata kole ndaa na Babeli. ⁴ Haho Yohana, mwaana gwa Kalea, na baata bose ba basolokoto, na bato bose bashinyeminye liidi lya MLUME, ugana bashame mnda sii gya Yuda. ⁵ Haho Yohana mwaana gwa Kalea, na baata bose ba basolokoto, abaguhile batu bose ba Yuda benebashigele, bene bagiwile uhuma mnda mioga gyose wine wabachingilwe, bashame mnda sii gya Yuda. ⁶ balumyana, na baachana, na baana, na misiha gya oolo, na kila mtu mine Nebuzaladani, mmata gwa basolokoto balochi, gwelishigile hamwechi na Gedalia, mwaana gwa Ahikamu, mwaana gwa Shafani, iyaka na Yelemia, mbuwa, na Baluku, mwaanagwa Nelia; ⁷ bagingile mnda sii gya Misili; bululi bashinyeminye liidi lya MLUME; bahiile ndaa na Tahpenesi. ⁸ Haho inywa ya MLUME imchwilile Yelemiauya Tahpenesi, ugana, ⁹ Guha mawe ma mata mmaboo mobe, wamabise mnda luhemba lwa lwa mgilo gwa mabiliki, haya ha bugungililo bwa ndu gya Falao uya Tahpenesi, u meeso ma batu ba Yuda; ¹⁰ wabasambile, MLUME gwa bilume pambwa, Abetcha a Isilaeli, gwagana bino, Loola, nimmila na umguha Nebukadleza, oolo lya Babeli, mgichi gwanyi, na nene nibiya isuba yage ya buoolo hegulu ha mano mawe mandibisile; nage gwiganda hema lyage lya busoga bwage hegulu hamo. ¹¹ Nage gwichwa, na ugilwa sii gya Misili; batu baya bagolelwe uuwa biiwa, nabaya bene bagolelwe uba kole biwaswa kole, nabo bene bagolelwe utewa tuhilu bitewa tuhilu. ¹² Nene nibalisha aahya mnda ndu gya miishi gya Misili, na uguchigya, na ubawata kole; nage gwilitogola mnda sii gya Misili, nahi biya bisuchwala mmushi bichwalaganywa byage; nage gwihuma ubo wa talala. ¹³ Nage gwinoga bihanda bya Bethshemeshi, yine ili uya mnda sii gya Misili, na mnda ndu gya miishi gya Misili gwigichigya.