¹ Inywa ichwilile Yelemia, yulu ya mwano gwa Bayahudi babele bashame mnda sii gya Misili, bashame Migdoli, na Tahpanesi, na Nofu, na mnda sii gya Pathlosi, ugana, ² MLUME gwa bilime pabwa, Abetcha a Isilaeli, gwagana bino, Benywe mwamona buubi bose bwine bwandgilila Yelusaemu, na yulu ya mabugamose na Yuda; na loola, lino mali mauwa kaa, na mashi namtumine gulihushama mo; ³ wa yulu ya usona wabo, wabangilile yulu ya unjigilicha, bululi bagile uhulilicha aswenge, na utugilila tunge yubetcha, twine tushibamanine, boo, na atabenywe, ata bamasenyu. ⁴ Iyaka nihilile bagichi banyi bose wamli, bambuwa, nibele hubyuwa u mayaya na ubatuma, nibele hugana, Bino, benywe mushigile bya uchigilicha uno unjigiliche. ⁵ Ata bibyo bashihuliche, na bashitegile matu mabo, yulu bagaluwe nauleya usona wabo, bashihulile buswenge tunge tubetcha. ⁶ Wa iyo ibalo uchigililwa wanyi, na sungu chanyi, chihongolowe, nacho chilamine yulu ya mabuga ma Yuda, na mnda masango na ndila ma Yelusalemu, na mabuga mamo mashigwa mauwa, na ubelwa, nahi byagili lino. ⁷ Bino, hano, MLUME, Abetcha a bilume pambwa, Abetcha a Isilaeli, gwagana bino, Bululi byai mwagila usona uno wata yulu ya bichuli-chuli byenu bya mwego benywe bene, ulibagula koo malumyana, na baachana, na baana batulela na guukoka, muhume hawingi ha Yuda, mushishige mtu gashishigale mo. ⁸ yulu mwanjigilicha wa bigilanywa bya maboo menyu, mulihuhulilicha buswenge u tubetcha tunge mnda sii gya Misili, wamugile ushama u bugenyi; yulu mwahanyiwe, na uba buloga, na abule, hawingi hamioga gyose gya ibaloo? ⁹ Wi wii! Maugibilila usona wa bamasenyu, nausona wa maoolo ma ba Yuda, na usona wa baachi babo, na usona wenyu benywe bene, na usona wa baachi benyu, wabagilile mnda mnda sii gya Yuda, na umasangu nandila ma Yelusalemu? ¹⁰ Bashinalisache ndaa na lino, na bashibamone booba,na bashi bagyate mnda m'bindo gwanyi, ata mnda alago anyi, andibiile umbele wenyu, na umbele wa bamasenyu. ¹¹ Bino, wayulu ya bibyo MLUME gwa bilume pambwa Abetcha a Isilaeli, gwagana bino, Toolo, nihugulula yenyu yanyi hegulu henyu, yulu namlushishe buubi, na ata ubachinga ba Yuda bose koo. ¹² Nene niguha mihona gyose gya Yuda, bagimiye byenyi byabo ugingila mnda sii gya Misili, baashame uya, nabo bihagwa bose abisa; biigwa mnda sii gya Misili; bihagwa wa ahilu,na wa ndala; biiwa, utula baana ndaa na bausobu, wa ahilu, na wa ndala; nabo babi uambilwa, na bisage, na ulogwa,na abule, ¹³ Wabululi nibaonona bose bene bali bashame mnda sii gya Misili, nahi byandi onone Yelusalemu, wa ahilu, na wa ndla,na wa bisumi; ¹⁴ ata wa batu baya ba Yuda bene bashigele, bene bagile sii gya Misiliyulu bashame uya, hashibi ata na mtu mine gwihona, na ata mine gwishigala, na gaagiwile mnda sii gya Yuda, gyine gyabalihuudagila bagiwile wagili na ushama moo; bululi hashi gwigiwila, nambo baya bene bihona. ¹⁵ Haho baya benebamanine ugana baachi babo bahuliliche aswenge u tubetcha tunge, na baachana bose bene bagimene hoka, sumbilo lyata, noo, batu bose nenebashamine mnda sii gya Misili, haya Pithlosi, bamgaile Yelemia, baganine, ¹⁶ Iya inywa yolitusambile wa china lya MLUME, beswe tushiuuhulicha. ¹⁷ Bino hashi adugwa twiwilicha kila unywa yine ihumine mnda tunywa twetu, umulilicha aswende mmaoolo gya hegulu, na umwongolwela lutangi lwa byunywa, nahi byatugilile beswe, na bamasetu, na maoolo metu, na baosobu betu, mnda mabugama Yuda, na umasango na ndila ma Yelusalemu; bululimamo mengo tubele na biliwa bee, na uginunywa, natushimonine usona o ose. ¹⁸ Haho hatuleile umulilicha aswenge mmaoolo gwa hegulu, na umwongolwela bya unywa, twahungwilwa na bitundu byose; nauhagywa wa ahilu, nawa ndala. ¹⁹ Beswe hatummuliliche aswenge mmaoolo gwa hegulu, na umwongolwela lutangi lwa bya unywa, wi! Tumchelele mikati, yulu tumtangile, na umwongolwela bihongololwa, balumyetu bashibele hoo? ²⁰ Haho Yelemia gubasambile batu bose, malumyana na baachana, noo, ugana bato bose bene bamgaile, guganine, ²¹ Busenge bwine bwamuhuliliche mnda mabuga ma Yuda, na umasango na ndila ma Yelusalemu, benywe na bamasenyu, maoolo menyu, na baosobu benyu, na batu ba gino sii, wi wii! MLUME gushibaengeleche baya batu? Wi wii!Ino ihisho ishigingile mnda mtima gwage? ²² Na ata MLUME gushinaosha ulitolelecha iyaka, wa yulu ya usona wa bigilanywa byenyu, na wa yulu ya uchigilicha wamugilile; bululi bwa gino sii gisili mauwa, nabisaga, na ulogwa, gishishaminywe na mtu nahi byagili lino. ²³ Bululi mwahulilicha aswenge, na yulu mwagila buubi uli MLUME, namushinyeminye liidilya MLUME, namushiwashiche m'bindo gwage, na ata alago age,na ata ubangisiya wage; noo yulu buno buubi bwampata ndaa na byalili lino. ²⁴ IyakaYelemia gubasambile batu bose, na baachana bose, Ihulichiwe inywa ino ya MLUME, benywe bose ba Yuda, bene bali mno m'siigya Misili; ²⁵ MLUME, basolokoto Abetcha a Isilaeli, gwagana bino, Benywe na baachi benyu mwadogoma na tunywa twenyu, na uwilicha wa maboo menyu, muganine, Tushi ata na adugwa twiwilicha ulibindila wetu watubiile, na umulilicha aswenge mmaoolo gwa hegulu, na umwongolwela lutangi lwa byunywa; bino, m'beomonywa hululu ulibindila wenyu, wilichiwe ulibindila wenyu. ²⁶ Bino, bululi bwa bibyo ihulichiwe inywa ya MLUME, benywe bose ba Yuda, bene bali hushama mnda sii gya Misili,Loolwe nalaha wa china lyanyi lyata, MLUME gwagana, ugana, china lyanyi lisilumbulwa iyaka mmanywa a mtu gegese gwa Yuda, na mnda sii gyose gya Misili, gulihugana, Nahi bili MLUME Abetcha byeli na mwego! ²⁷ Loolwe, nilihuloola namchishiche usona, na bushi busoga, nabo batu bose ba Yuda, bali hano mnda sii gya Misili, bihagwa wa ahilu, na wa ndala, na ubasungya abisa. ²⁸ Nabo bene bisina ahilu, buhuma mnda sii gya Misili, naugingila mnda sii gya Yuda, batu bachoo abisa; na batu bose ba Yuda bene bashigele, bagile mnda sii gya Misili yulu ya usha uya, bimana ii inywa ya nanyi yine yigimana, inywa yanyi ao inywa yabo. ²⁹ Na ino noo ibi isaga wenyu, MLUME gwagana, ugana, nene nimmonona benywe ha ino ihana, bululi mwamane ugana binywa byanyi byigimana hegulu henyu, umlushicha usona hashi ata adugwa. ³⁰ MLUME gwagana bino, Loolwe, nim'biya Falao Hofla, oolo lya Misili, mnda maboo ma tumangu twage, na mnda mabii ma baya bene balihuenga mtima gwage; nahi biya byandim'biile Sedekia, oolo lya ba Yuda, mnda mabii ma Nebukadleza, oolo lya Babeli, amangu age ene aengile mtima gwage.