¹ Hanyuma Yelubaali, noo Gideoni, na batu bose bene babele hamwechi nage babyuwile halwelo pee, bagiile bitula yabo hoka na luudi Halodi; na bitula byaba Midiani bibele luubi lwabo lwa uboo uachi, hoka na loono Mole, wihongelela. ² Mlume gumsambile Gideoni, batu bano bene bali hamwechi nobe m bengi abisa ndaa na byandibabiya Bamidiani mmaboo mabo, Isilaeli bashichwe ulitona wandi boo nugana, Uboo wanyi nene nime noo wapogonona. ³ Mndi bino ugye uta mtambila u matu ma bano batu, na wagane, Mtu ge gese gulihumona booba na udanda, gagiwile, na gahume hano ha loono lwa Gileadi. Bibo batu uki maumi mopi na bopi bagiwile u bashiwabo, bashigele batu uki umi. ⁴ Mlume gumsambile Gideoni; Ata bino bano batu bili beengi abisa; ubalushe hasi wishima ya maadi, nene nibatonda uya yulu yobe; hanyuma habi guya mine gwandiusambila ugana, Gugu gwigya hamwechi nobe, noo gwigya hamwechi nobe; na mtu guya mine gwandiusambila , Gugu gushigya hamwechi nobe, haho gugo mtu gushigya. ⁵ Bibyo gubalushishe batu hasi wishima ya maadi. Mlume gumsambile Gideoni, Mtu ge gese mine gwililamba maadi nalulimi lwage, nahi biya bisulilamba aawa, byoka biya mtu ge gese mine gwibunga machwi nuunywa. ⁶ Na lubalo lwabo baya bene banywine wa ulamba-lamba, babele huhila uboo wanywa, lubele batu sambi chitatu; bibyo batu bengi abisa babungile machwi unywa maadi. ⁷ Mlume gumsambile Gideoni, Na batu bano sambi chitatu bene balambile maadi noo boligya nabo, nibahogonona, nene nibabiya Bamidiani mnda maboo mobe; alakini bano bange batu bagye lwabo, mtu ge gese wihana yage. ⁸ Bibyo babo batu baguhile biliwa byabo mmaboo mabo na tusiba twabo twa myoo; nage gubagiwiche batu bose ba Isilaeli, mtu ge gese witula yage; alakini gubachibile baya batu sambi chitatu; na bitula bya Bamidiani bibele mmihongelela, hasi hage. ⁹ M'bwingi na boka bubo busugu Mlume gumsambile Gideoni, Gimana, usale u bitula; bululu nabibiya mnda maboo mobe. ¹⁰ Alakini ushimonyi booba usala, usale hamwechi na Pula mgichi gobe uya ubitula; ¹¹ gogwe wihulicha byababi hudogoma, na hanyuma ha bibyo maboo mobe mibiwa uoma; ubesala u bitula. Bibyo gusalile hamwechi na Pula mgichi gwage ndaa na uhyila isula ya batu bene babele na tulume gela babele m'bitula. ¹² Nabo Bamidiani na Baameleki, na baana ba mlugulu babele bashame mmihongelela, ulingilishiwa na njige chiingi; na ngmia chbo chishibele na lubalo; nahi isee ya um'bega, gwa bahali wa bwingi. ¹³ Na haya helihiile Gideoni, loola, habele gumwe mtu gulihumlangulila gunge nage malo, guganine, Loola, nalota malo, na loola, mkati gwa shayili (mabele) gwagwa hawingi ha bitula bya Bamidiani, guhiile na wiimwe itula imwechi, guihulile itula yoo nuugwa, nago gugisulule, ndaa na byailalile hasi. ¹⁴ Miinage gumgaile guganine, Guno mwano gushihulwa uba ahilu a Giseoni, mwaana gwa Yoashi, mtu gwa Isilaeli. Abetcha ababiya Bamidiani na basolokoto bage bose mnda uboo wge ¹⁵ Haya helihuche mwano gwa maya malo, na milumbululo gyamo, guginamine; gugiwile u basolokoto ba Isilaeli guganine, Gimanywe, bululu Mlume gwabiya basolokoto ba Midiani mmaboo menyu. ¹⁶ Hanyuma gubabiile baya batu sambi chitatu babe ihichi bitatu, gubiile tusib m maboo ma batu bose, na tutondo tushi na maadi, babiile byaa mnda tuto tutondo. ¹⁷ Gubasambile, Ndolwe, mwaite nahi byandiita nene; lingaminywe, handihiya isula ya bitula, hene habi, byandiita nene na benywe mwaite byoka biya. ¹⁸ Handigila asiba, nene na bose bene bandibi nabo hamwechi, bibyo na benywe mwagile tusiba ngubi chose cha bitula, Mwagodowe, Yulu ya Mlume, na yulu ya Gideoni. ¹⁹ Haho Gideoni, nabaya batu sambi chitatu bene babele hamwechi nage, bahiileisula ya bitula, mkundu gya busugu, habasibele bahuhwa ugalula balochi ba mbuga; bagile tuya tusiba, babelile belile tuya totondotwine tubele mmaboo mabo. ²⁰ Biya bihichi bitatu bigilile tusiba, babelile tutondo, bawatile gyaa m maboo mabo ma uachi, na na tuya tusiba m maboo mabo ma ulume yulu ya utugila; bagodowile na mdodo, Ahilu a Mlume na a Gideoni. ²¹ Bagimanine mtu ge gese ha ihana yage uchignuuwa bitula ngubi chose; basolokoto bose basinine; nabo bagodowile na mdodo, babasininye. ²² Bagile tuya tusiba sambi chitatu, nage Mlume guitile ahilu a mtu ge gese abe hegulu ha gunge nage, nanhegulu ha basolokoto bose ba Bamidiani, basolokoto basinine ndaa na Bethshita, ugililila ndaa na Selela; ndaa na ulugumba lwa Abel-Mehola, hoka na Tabathi. ²³ Balumyana ba Isilaeli babele basumbile uhuma wa Naftali, na uhuma wa Asheli, na uhuma wa Manase bose, babalamine Bamidiani. ²⁴ Hanyuma Gideoni huhilile batu mnda sii gyose gya tubandagulu twa Eflaimu, guganine, Bino undumuwe hegulu ha Bamidiani, na umawata mamo maadi mose u mnele wabo, ndaa na Bethbala, noo ugana lulo luudi Yolodani. haho balumyana bose ba Eflaimu basumbile hamwechi, bawatile kole maadi ndaa na Bethbala, noo ugana luudi lwa Yolodani. ²⁵ Babawatile baya bahela babili ba Midiani, Ulebu na Zeebu; bammagile guya Olebu, na guya Zeebu bammagile haya ha habudengelo bwa ibugu ya Zeebu, hanyuma noo ubalaminine Bamediani; miswe gya Olebu na Zeebu bamlushishe bo, Gideoni uya m'bwala bwa bubili bwa Yolodani.