¹ Hanyuma baana ba Isilaeli baitle bya bigugiiichui u meeso ma Mlume; Mlume gugabiile mnda maboo ma ba Midiani mengu ma myaa njwii, ² Uboo wa Midiani ubele uomu hegulu ha Isilaeli; iyaka wa yulu ya ba Midiani baana ba Isilaeli balidabile biina u koono, na giya migumbo na buya bisinino. ³ bibyo habele, haya hene habele baana ba Isialeli huuna mabala, Bamidiani bagile na Baameleki, na baya baana ba mlugulu; bagile wabali. ⁴ babiile bitunga yulu ya Isialeli, na udogya biya biliwaganywa bya sii, ndaa na byabihiya Gaza, na bashishige biliwaganywa byo byose mnda Isilaeli, uba myoo uba ng'ombe, uba punda. ⁵ Bululi bagile u Baisilaeli na ng'ombe chabo na mahema mabo, bachwile bwingi nahi njige; boo na ngamiya chabo babele bashi na lubalo; nabo bagingile mnda giya sii yulu ya ugigugicha. ⁶ Isilaeli baitilwe wa uoma abisa na Bamidiani; nabo baana ba Isilaeli bamlilile Mlume. ⁷ Hanyuma habele, haya baana ba Isilaeli habamlilile Mlume, wa ibalo ya ba Midiani, ⁸ Mlume gutumine mbuwa gagye u babo baana ba Isilaeli; nage gubasambile, Mlume, gee Abetcha a Isilaeli, gwagana bino, Nene nimchwishiche benywe usala uhuma Misili, nimmuminye mnda ndu gya bucha. ⁹ Nene nimmuminye mnda maboo ma Bamisili, na mnda maboo ma bose bene babele hummonena, nene nibachingile bahume umbele wenyu, nene nimmele benywe gigyo sii; ¹⁰ Hanyuma nimsambile, Nene noo Mlume, Abetcha enyu; mushinyemya tubetcha twa Baamoli, bene bamli hushama nabo mnda sii gyabo; alakini mushihuliche liidi lyanyi. ¹¹ Malaika ma Mlume gugile naushama hasi ya mmambagwine gubele haya Ofla, gwine gubele ibya ya Yoashi, Mmabiezeli; na mwanage Gideoni gubele huhula ngano u lubuga, yulu ya ulibisa u meeso ma Bamidiani. ¹² Malaika ma Mlume mamtobwele, mamsambile,Mlume guli hamwechi nabo, Ee ilume pambwa. ¹³ Gideoni gumsambile, Ee Mlumyanyi, nambo gogwe uli hamwechi nanyi, yulu yai bino bikoko byose byatuhyila? Bili uhi bihisho byobe gya bigagicha, byabatutelele manga bamasetu, baganine, Wi wi! Gushi Mlume, gutuleshile beswe uno uhuma Misili? Alakini bino gwatutela, nage gwatubiya mnda maboo ma Bamidiani. ¹⁴ Mlume gulingamine, guganine, Ugye wa uosha obe uno, ubahogonone Isilaeli mnda uboo wa Midiani, Wi wii! Gushi gogwe gwandihilile? ¹⁵ Gumsambile, Ee Mlume, nibahogononaba Isilaeli wa ndila nayi? Loola, ibushi yanyi noo ili ya bambuchu abisa wa Manase, na nene noo mmala mnda ndu gya tata. ¹⁶ Mlume gumsambie, Chigilwe nibi hamwechi nobe, gogwe wilwa nabo ba Midiani nahi ulwa na mtu gumwechi. ¹⁷ Nage gumsambie, Nambo nahewa iuko u meeso mobe, bino umonye isaga, bululi gogwe noo ulihodogoma nanyi. ¹⁸ Ibumbu ino, ushihume hano ndaa na byandichwa, nuuhe mmaso gwanyi, na ugubiya u mbele obe. Guganine, Nuihemba ndaa na byolichwa. ¹⁹ Bino Gideoni gugingile mndu, guhagile mwana mbuchi na ugihiya, na mkati gushi gwagubiwe mshimi, na ahindi a buusu; gubiile giya nyama mnda iya ikapo, gubiile mbuchi mnd lweso, gumyiche haya hambuga mmichulichuli ya mmamba, nuumma. ²⁰ Nage malaika ma Mlume gumganine, Guha nyama na mkati gushigwagubiwe mshimi, ugubiya hegulu ha lino huo, wagugese gugo msabi. guitile bibyo. ²¹ Bibyo malaika ma Mlume gugolole songo gya luya lubango lwine lubele mmuboo wage, gugiudile giya nyama na guya mkati; aahya ahumine mnda liya huo, achigiche giya nyama na guya mkati; malaika ma Mlume mahumine u meeso mage. ²² Gudeoni gumonine ugana m malaika ma Mlume; Gideoni guganine; Luhanga lubi lwanyi, Ee Mlume Abetcha! Bululi nammona Mlume yenyi wa yenyi. ²³ Mlume gumsambile Talala gibe hamwechi nobe; ushimonyi booba; ushiwa. ²⁴ Haho Gideoni gumgimyile Mlume butambikilo haho, guhagitile haya china lyage, Yehova-Shalomu; ndaa na lino ili uya hoka na mbuga gya Ofla gya Baabiezeli. ²⁵ Habele boka bubo busugu Mlume gumsambie, Uguhe ng'ombe gya sobe, noo ng'ombe gya bubili, gya mwaa gwa njwii, wagwishe butambikilo bwa Baali, gyine gili na sobe, wagede Ashela ene ali hoka nabo; ²⁶ Wamgimyiile Mlume, Abetcha obe, butambikilo hagulu ha buno bisinino, wa ulamana nabyo; wagiguhe ng'ombe gya bubili, wagitambikile gibe lutangi lwa uchigya, hegulu ha kunyi chiya cha Ashela chine choligedile. ²⁷ Haho Gideoni gughile batu umi hamwingi ha bagichi bage, guitilenahi bimsambile Mlume, alakini yulu gubamonine booba batu ba ndu gya sage, nabatu ba mbuga gyage, gushioshiche uita bibyo mengo ma mchuba, bibyo gubiitile m'busugu. ²⁸ Haho batu ba mmbuga hababyuwile halwelo pee, loola, butambikilo bwa Baali bwabelwa na aya Ashela ene abele hoka nabo agedilwe, na giya ng'ombe gya bubili gitangilwe lutangi hegulu ha buya butambikilo bweligimiile. ²⁹ Babuchanye, M nanyi gwagilaino ikoko? Ndaa na byabaengile mwano na ubucha-bucha, baganine, m Gideoni, mwaana gwa Yoashi, noo gwagila ino ihisho. ³⁰ Haho batu ba mmbuga bamsambile Yoashi Mlushe mwanobe, gawe, wa ibalo ya gwabela butambikilo bwa Baali na wa ibalo gwageda aya Ashela ene abele hoka nabo. ³¹ Yoashi gubasambile bato bose bene babele huhimana nage, Wi wii! Mwimdogomena Baali? Ao benywe mwimmogonona? Guya gwimdogomena na gahagwe hano halwelo; nambo gee noo Abetcha, na galidogonema ichuli-chuli yage ya mwego, bululi gumwe mtu gumwechi bwabele butambikilo bwge. ³² Bibyo gumgitile Yelubaali lulo lusugui na galidiogomene gee mine ichuli-chuli yage ya mwego, bululi gwabele butambikilo bwage. ³³ Mamo mengo Bamidiani na Baameleki, nababo baana ba mlugulu basumbuile hamwechi; badabwile na ugimiya bitula byabo wihongelela ya Yezleeli. ³⁴ Alakini luhuda lwa Mlume luchwile hegulu ha Gideoni; nage gugilile asiba; na ilongo ya Abiezeli isumbile na umlama. ³⁵ Hanyuma gutumine batubagye hawingi ha Manase gyose; boo nabo basumbile hamwechi yulu ya umlama; hanyuma gutumine batu bagye wa Asheli, na wa Zabuloni, na wa Naftali; nabo bagile umgaa. ³⁶ Gideono gumsambile Abetcha, Uba gigwe wibahogonona Baisilaeli uhitila uboo wanyi, nambo wadogoma, ³⁷ loola, nibiya ibambi ya mmoo u lagala lya buhulilo; nambo habi iimee hegulu ha ibambi ka, na sii gyose gyo nuuba shee, bibyo haho noo handimana ugana wibahogonona Baisilaeli uhitila uboo wanyi, nahi byoliganine. ³⁸ Bibele bibyo; bululi gubyuwile halwelo pee, guibangile iya ibambi, gumonine iya iimee u iya ibambi, ilego igima ya maadi. ³⁹ Gideoni gumsambile Abetcha, Sungu chobe chishilame hegulu hanyi, nene nidogoma luno lwendo ka; nihuusaba, natonde wiino ibambi luno lwendo ka; bino ibambi ka noo yabe shee, naiimee yaabe hegulu ha sii gyose. ⁴⁰ Abetcha aitile bibyo buya busugu; yulu iya ibambi ka noo ibele shee, bibyo habele na iimee hegulu ha sii gyose.