¹ Haho Debola na Balaka mwaana gwa Abinoamu, bagimbile limbo ugana; ² Bululi baulu balombole u Isilaeli, Bululi wa ibalo batu balihanene bichuli-chuli byabo bya mwego wa mtia gwa uhana, mtonywe Mlume. ³ Hulichiwe menywe maolo, tegwe matu, benywe maulu; Nene ehe nene, nimgimbile Mlume; Nimginuna Mlume, abetcha a Isilaeli. ⁴ Mlume holihumine Seili, Holigile u bita uhuma m mlubala lwa Edomu, Sii gidandile, gulu nalyo linoile maadi, Ehe, matumba namo manoile maadi. ⁵ Koono chisumbuluwe, u mbele wa yenyi ya Mlume, Ehe ata Sinai luya loono u mbele wa yenyi ya Mlume, Abetcha a Isilaeli. ⁶ Ha masugu ma Shamgali, mwaana gwa Anathi, Masugu ma Yaeli masango na ndila mashibele na batu; Na bagyata madila bahitile u madila ma mibamba. ⁷ Baata ba mabuga basungile mnda Isilaeli, basungile, Ata nene Debola handiginyuwe, Handiginyuwe, nene, mmabana mnda Isilaeli. ⁸ Basobole tubetcha twa tuhya, Haho noo habele na bita u malimbwa; Wi wii! Hamoneye ngabo ao sumo, U batu uki maumi mana mnda Isilaeli? ⁹ Mtima gwanyi gulihulola baata ba mabuga ba Isilaeli, Bene balihanene bichuli-chuli byabo bya mwego boo bene hawingi ha batu; Mginunywe Mlume. ¹⁰ Telwe mwano mbila, benywe bene balihuchina punda cha chihaha, Benywe mulihushama hegulu ha mikeka gya bumona bwingi, Na benywe bene mulihuhita m ndila na magulu. ¹¹ Shamwe koo na mdodo na baya bele balihuta migwi, ha ihana ya utahila maadi, Haya habilisamba bigilanywa bya kiine bya Mlume; Ehe, bigilanywa bya kiine bya uhyilila wage mnda Isileli. Bibyo batu ba Mlume habasalile u malimbwa. ¹² Byuwa, byuwa, Debola; gimba lwimbo. Ginyuwa, Balaka, uwate kole cha tumangu twetu, Benenbuwatile kole, Ee mwanangwa Abinoamu. ¹³ Haho gidandile mihona gya baachi walwa na batu; Mlume gusalile yulu yanyi galwe na bilume pambwa. ¹⁴ Bamwe bachwile uhuma wa Eflaimu ibushi ya shina lyabo ihumine Ameleki, U nyuma obe, Benyamini, m'bwingi mwa batu bobe. Uhuma wa Makili basalile baata ba mabuga, Na uhuma wa Zabuloni m baya babawate lubango lwa mgochi. ¹⁵ Na baata ba Isakali babele hamwechi na Debola. Nahi bibele Iskali, noo bibele na Balaka. Bagingile m mihongelela wa abilo u magulu mage. U bishima bya Leubeni, Habele na malanga mata mnda mtima. ¹⁶ Yulu yai ushamine mnda liha lya myoo, Uhulicha bihonde habyigilwa yulu ya ugita bihichi? U bichiba bya Leubeni, Habele na ulangila wata mnda mtima. ¹⁷ Gileadi gushamine m'bwala mwa Yolodani, Na Dani, yulu yai gushamine mnda m'bwato? Asheli gushamine pii u m'bega gwa bahali, Gushamine mnda ileba yage. ¹⁸ Zabuloni noo batu bene badidibwile luhud lwabo ndaa na uuwa, Naftali nage noo ihana yine iginyuwe mmabala. ¹⁹ Maolo machwile na ulwa bita, Bibyo maolo ma Kanaani matulwile bita. Haya Taanaki, hoka na maadi ma Megido; Hashipashile alambwe o ose a lusuu. ²⁰ Balwile utulila ha gulu, Tumbala-mbala mnda lwendo lwato tulwile na Sisela. ²¹ Luudi luya lwa Kishoni lubaswalile, Luya luudi lwa aala, luudi lwa Kishoni. Ee luhuda lwanyi, ugye u mbele wa uoma. ²² Haho tubibi twa falasi tugyatile-gyatile; Wa ibalo ya uhubagana-hubagana, Uhubagana-hubagana wa uoma. ²³ Ulogwe Melozi, guganine malaika ma Mlume, Baligwa wa uoma bashami bage; Bululi bashichwile um'bwatilicha Mlume, Um'bwatilicha Mlume yulu ya baya bene bali na uoma. ²⁴ Gwihalilwa mihaa Yaeli uhima baachana bose; Mmchi gwa Hebeli, Mkeni, Gwihalilwa mihaa uhima baachana bose mnda bitula byabo. ²⁵ Gusabile maadi, nage nuuma mabele. Gumlushishe mauta ma nyama mmilego ya bunyemu. ²⁶ Gugolole uboo wage na uwata ihoho, Nao uboo wage wa ulume uwatile nondo gya mtumbi; Gummokomeye Sisela na gigyo nondo, gumchibule mswe gwage. Ehe, gummokomeye u buhala bwage. ²⁷ Gugimanine u magulu mage, U magulu mage guginamine, nuugwa. Haya heliginamine, noo heligwile nuuwa. ²⁸ Gulingamine u dilisha, gulilile, Mnage na Sisela gulihulilila u dilisha; Yulu yai abilibili age asinga ashinahiya? Yulu yai bichigi bya abilibili age byahusinga? ²⁹ Baachi bage Sisela bene bina lwenyi bamgaile, Ehe, gwaliha ichuli-chuli yage ya mwego mmaso. ³⁰ Wi wii! Bashipashile kole na uchigabula, Mgichi, bagichi babili ba baachana, wa mtu ge gese? Wa Sisela kole cha bichwalaganywa bya langi gya gihishane, Kole cha bichwalaganywa bya langi lya lihishanye lya malenda; Bya langi lya malenda ma mahishanye ngubi chose chibili, Hegulu ha maoshi ma babo bene bawatilwe kole. ³¹ Na baachimiwe byoka bibyo tumangu tobe tose, Ee Mlume. Bibyo babo bene balihuunda gogwe baabe nahi chuba halisutobowa na uoma wage. Bibyo sii gilitudiche myaa maumi mana, hashibe bita habele talala na pii.