¹ Na helihwile uuwa Ehudi, baana ba Isilaeli balubile iyaka u mbele wa meeso ma Mlume. ² Mlume gubagudiche na ubabiya mnda uboo wa Yabini, oolo lya Kanaani, mine guhyilile uya Hazoli; na Sisela, gubele hushama Haloshethi gya Mioga, gubelemmata gwa basolokoto bage. ³ Baana ba Isilaeli bamlilile Mlume; yulu Sisela gubele na tubilibili twa bigela sambi yahabula; nage gubamonene baana ba Isilaeli wa uoma wa mengo ma myaa maumi mabili. ⁴ Haho Debola, mbuwa gyachi, mmachi gwa Lapidothi, noo gubele aluliya a Isilaeli maya mengo. ⁵ Nage gushamine hasi ha igachi, igitilwe igachi ya Debola, hawingi ha Lama na Betheli, mnda sii gya tubandagulu twa Eflaimu; baana ba Isilaeli bagile weli yulu gabaluliye. ⁶ Gugo gutumine mtu gabagite ba Balaka na Abinoamu uchwa uhuma Kadesh-Naftali, gubasambile, Wi wii! Mlume, Abetcha a Isilaeli, gushihanene alago, ugana Ugye, wabagite obe, uya u loono lwa Taboli, batu uki umi ba baana ba Naftali, na baana ba Zabuloni? ⁷ Na nene niugitila Sisela, Ilume pambwa yage Yabini, ndaa na luudi lwa Kishoni, hamwechi na tubilibili twage, na batu bage beengi, nene ninabiya mnda uboo obe. ⁸ Balaka gumsambile, nambo wigya hamwechi nanyi na nene nigya; bino nambo ushigya hamwechi nanyi na nene nishigya. ⁹ Haho gubanine, Winene nigya hamwecho nobe, alakini lwendo lolihugila lushiuha gogwe bunyemu; bululi Mlume gwimgucha Sisela mnda uboo wa mmachana, Debola gugimene, gugile hamechi na Balaka ndaa na Kadeshi. ¹⁰ Balaka gusumbiche Naftali na Zabuloni bagye Kadeshi bagile batu uki umi bene bamlamine; Debola nage gugile hamwechi nage. ¹¹ Bibyo Hebeli, Mkeni, gubele mlibagula na Bakeni, noo, baana ba Hobabu, ngoba gyage Musa gugimiye itula yage koo na mti gwa msese gubele haya Saanaimu, hoka na Kadeshi. ¹² Batu bamsambie Sisela ugana Balaka, mwaana gwa Abinoamu guselile ugya u loono lwa Taboli. ¹³ Sisela gungole tubilibili twage tose, ehe, tubilibili twa bigela smbi yahabula, na batu bose bene babele hamwechi nage, uhuma Haloshethi gya Mioga ndaa na u luudi lwa Kishoni. ¹⁴ Debola gumsambile Balaka, Bino! Gimana; bululi lusugu luno noo lusugu lwine Mlume gwam'biya Sisela mnda uboo obe. Yulu yai! Mlume gusulombwela hambele hobe? Bibyo Balaka gusalile uhuma u loono lwa Taboli, na batu uki umi bamlamine. ¹⁵ Mlume gumdodobule Sisela na tubilibili twage tose, na basolokoto bage bose, wa bwigi bwa ahilu, u mbele wa Balaka; haho Sisela gusalile u abilibili age, na usina abilo na magulu. ¹⁶ Alakini Balaka gutulamine tubilibili, na basolokoto, ndaa na Haloshethi gya Mioga; na babo basolokoto bose ba Sisela bahagilwe wa bwigi bwa ahilu; hashishigele ata mtu gumwechi. ¹⁷ Alakini Sisela gusinine wa uhinga abilo na magulu, guhyile itula ya Yaeli, mmachi gwa Hebeli, Mkeni; bululu hable talala hawingi ha Yabini, oolo lya Hazoli, na ndu gya Hebeli, Mkeni. ¹⁸ Yaeli gutobowile ugya umgaa Sisela, gumsambile, Walubuwa Mlumyanyi, walubuwa wanyi; ushimonyi booba, gugingile mnda itula yage, nage gum'bwilile na anyiki. ¹⁹ Gumsambile, Ibumbu ino pee maadi machoo nanywe; yulu nina yuma. Gusulile mdibi gwa mabele, gummele ganywe na um'bwila. ²⁰ Nage gumsambile, Ugimane ha mchngo gwa itula yobe; nambo hichwa mtu ge gese uubucha, gabegana, Wi wii! Hano hali mtu, bibyo wamgae, Pande, hashi. ²¹ Bibyo Yaeli, mmachi gwa Habeli, guguhile ihoho ya hema, guguhila na nondo m muboo wage, gugile weli lembalenba; gum'biile iya ihoho u buhala bwage, nayo ihengile, igingile ndaa na m misee; yulu tulo twa tunyemu tubele tum'bwate; hanyuma guchiminye malanga na uuwa. ²² Na loola, Balaka helibele humlama Sisela; Yaeli gutobowile yulu ya umgaa, gumsambile, Chuno, nene niumonya guya mtu mine goli huenga. Haho gumlamine, na loola, Sisela mlachu mo, gwammube, na iya ihoho ibele u pala gyage. ²³ Haho gugo Abetcha gummimineYabini, oolo lya Kanaani u mbele wa baana ba Isilaeli lulo lusugu. ²⁴ Uboo wa Isilaeli ugililile uba na uoma hegulu ha Yabini, oolo lya Kanaani, ndaa na byabahwile ubachimya Yabini, oolo lya Kanaani.