¹ Bino gino noo mioga Mlume gyeshigile, yulu gabatonde Baisilaeli wa gigyo, noo; gabatonde baya bose bene bashimanine bita byose bya Kanaani; ² yulu yugana bibushi byose bya baana ba Isilaeli baoshe umana na ubagigya bita, asa baya bene bashimanine bita hambele ha maya mengo. ³ gubashigile bahele batano ba Bafilisti, na Bakanaani bose, na Basidoni, na Bahivi bene babele bashame u loono lwa Lebanoni, utula u loono lwa Baal-helmoni ndaa na ugingila Hamathi. ⁴ Nage gubashigile yulu gatonde Isilaeli wa babo, gaoshe umana ugana bihulicha alago a Mlume, elibsambile bamasabo, uhitilauboo wa Musa. ⁵ Bibyo baana ba Isilaeli bashamine hawingi ha Bakanaani na Bahiti, na babo Baamoli, na babo Bapelizi, na babo ba Bahivi, na babo Bayebusi; ⁶ babagondile misiha gyabo, na misiha gyabo boo nabo babagonjiche u baana babo ba balumyana, na utugilila tubetcha twabo. ⁷ Banaa na Isilaeli baitile bya bisone u meeso ma Mlume, nabo bamgibilile Mlume, Abetcha abo, nabo bagilile migilo yulu ya Babaali na Baashtolethi. ⁸ Yulu ya bibyo sungu ccha Mlume chilamine hegulu ha Isilaeli, nage gubaguchiche m maboo ma Kushan-lishathaimu oolo lya Mesopotamia; na baana ba Isilaeli bamgilile migilo gugo Kushan-lishathaimu mengo ma myaa inana. ⁹ Hanyuma baana ba Isilaeli habamnyeminye Mlume, Mlume gubaginunine mmogonochi, mine gubahogonone, noo, Othnieli mwaana gwa Kenazi, mmunage gwa Kalebu. ¹⁰ Luhuda lwa Mlume luchwile hegulu hage, nage nuuba aluliya a baana ba Isilaeli; guchuwile na ugya u bita , nage Mlume gum'biile guya Kushan-lishathaimu oolo lya Mesopotamia m muboo wage; na uboo wage ummimine Kushan-lishathaimu. ¹¹ Nagyo sii gibele na talala mengo ma myaa maumi mana. Hanyuma ha Othnieli mwaana gwa Kenazi, nuuwa. ¹² Bibyo baana ba Isilaeli baitile iyaka bisone u meeso ma Mlume; nage Mlume gum'biile Egloni oolo lya Moabu uoma yulu ya Isilaeli, wa ibalo babele hugilabisone u mbele wa meeso ma Mlume. ¹³ Gugo Egloni guongole wage baana ba Amoni na Ameleki; gugile ubalwa ba Isilaeli, nabo bagiwatile giya mbuga gya tusugwe. ¹⁴ Baana ba Isilaeli bagimgilile Egloni oolo lya Moabu migilo mengo ma myaa umi na inana. ¹⁵ Alakini baana ba Isilaeli habamlilile Mlume, Mlume gubaginunine gunge mmogonochi, Ehudi, mwaana gwa Gela, M'benjamini, mtu mine gubele na mboso; nabo baana ba Isilaeli bammilile Egloni oolo lya Moabu mmaso m muboo wa gugo Ehudi. ¹⁶ Ehudi gulinonenye aele ene abele na bwigi ubili, ubaha wago ubele na uboo umwechi; guahambile ao aele mnda bisanjwa byage ha mwanauboo wage wa ulume. ¹⁷ hanyume gumshenene Egloni oolo lya Moabu, gugo mmaso; bobyo Agloni gubele mtu mmangu abisa. ¹⁸ Nage Ehudi haya helibele humshenyenya mmaso, gubasambile batu baya bene babele baswale mmaso, baligile lwabo. ¹⁹ Alakini gee mine gugaluwile uhuma uya wine ubele miishi gya mawe gibele hoka na Gigali, guganine, Nene nina mwano gwa bubisa gobe gogwe, Ee oolo. Nage guganine, Shamwe pii. Batu bose bene babele bagimanyu hoka nage batobowile na umshiga. ²⁰ Haho Ehudi gumshenene; nage gubele mshame gee buchima m yumba yage ya peho. Ehudi guganine, Nene nina mwano gwuhuma wa Abetcha obe gogwe. Haho guginyuwe wisuba yage. ²¹ Ehudi gugolole uboo wage wa uachi, guhulule aya aele uahulula haya ha mwana uboo wage wa ulume nuasosa mgumo lyage; ²² guya mminyi nago nuugingila mnda hamwechi na aele oene; namo mauta malihambile iyaka hegulu ha aele, yulu gushiahuminye aele mgumo; nao utobowe unyuma. ²³ Haho Ehudi gutobowile hambuga u balacha, gum'bugalile mchango gwa iyo yumba na uguhamba na ahongolo. ²⁴ Bibyo helihwile utobowa hambuga, baya bagichi bage bagile; bamonine, na loola, gigyo michango gya yumba gibele bigugale na ahongolo; nabo baganine, Hashi ibalo gwalihupa na umagulu mage mnda yumba ya peho. ²⁵ Bahembile na byabagagilwe; na loola, gushigibugule michango gya yumba; bibyo baguhile ahongolo na uasula; na loola, mlumyabo gubele mgube hasi, nage m gwa mmube. ²⁶ Nage Ehudi gusinine haya hene hababele hummemba, guhitileuya wine ubele miishi, na usinina Seila. ²⁷ Hasibele haya, helihiile tugilile asiba mnda sii gya tubandagulu twa Eflaimu, haho baana ba Isilaeli baundumuwe hamwechi nage uhuma ubo u koono, nage gubalombwele. ²⁸ Gubasambile, Ndamwe nene; bululi Mlume gwatubiya tumangu twetu, Bamoabi, mmaboo menyu. Haho baundumuwe na umlama, babiwatile byabu bya Yolodani pinda piswa gya Bamoabi, na bashileile mtu udabuwa luudi Yolodani. ²⁹ Mamo mengo bahagile Bamoabi matu ba balumyana nahi uki umi, bene babele bose bahangu, na bose bilume pambwa; hashihonine ata mtu gumwechi. ³⁰ Biyo Moabu giisilwe lulo lusugu hasi ha maboo ma Isilaeli. Nagyo sii gibele na talala mengo ma myaa maumi inana. ³¹ Iyaka hanyuma hage habele guya Shimgali mwaana gwa Anathi, mine guhagile Bafilisti batu sambi mtuba na uda lya mmele lya ng'ombe; gee nage guhogonone Baisilaeli.