¹ Hanyuma malaika ma Mlume guselile hegulu uhuma Gileadi ugya Bokimu. Guganine, Nene nimlushishe benywe usela uhuma sii gya Misili, nana namlusha ndaa na sii gyandimlahile pa bamasenyu; Nene niganine, Nene milumbu nishibele malagano manyi madilagene nenyu. ² na benywe mushibiya malagano mo mose hamwechi na bashami ba gino sii; gwishiwe hasi butambikilo bwbo; ata bibyo mushihuliche liidi lyanyi; wi wii! Mwaita bibyo yulu yai? ³ Bino wa yulu ya bibyo nene niganine abisa, Nene nishibachina bahume u mbele wenyu; alakini babinahi miigwa m mbachu chenyu, na tubetcha twabo tubi agochogochi u magulu menyu, ⁴ Haho guya malaika ma Mlume helidogomine biya binywa, ubasambila baana ba Isilaeli bose; haho noo babo batu baggabuwe wa madi mabo na ulila. ⁵ Nabo bagitile china lya iya ihana Bokimu; nabo bamshinjiche Mlume lutangi haya. ⁶ Bibyo haho Yoshua helibahele batu luhusa bagye lwabo, baana ba Isilaeli bagile mtu ge gese ugya u buhyana bwage, yulu ya ugihyilila gigyo sii. ⁷ Babo batu bamgilile Mlume migilo masugu mose ma Yoshua, na masugu mose ma babo baulu bene bagililile masugu ma hanyuma ha Yoshua,baya bene bamonine guya mgilo gwata gyose gwa Mlume, gyelibele mgile Mlume wa yulu ya Isilaeli. ⁸ Hanyuma Yoshua mwaana gwa Nuni, mgichi gwa Mlume, nuuwa, nage gubele na myaa gya ubuswa sambi na umi. ⁹ Nabo nuumchiya u lugumba lwa buhyana bwage uya Timnath-helesi, mnda sii gya tubandagulu twa Eflaimu, luubi lwa uboo uachi wa loono lwa Gaashi. ¹⁰ Iyaka batu bose ba ibushi iyo nabo basumbichiwe na ugya wine ugile bamasabo; haginyuwe inge ibushi hanyuma habo, yine ishimmanine Mlume, na bashimanine giya migilo gyine gigilile Mlume yulu ya Isilaeli. ¹¹ Baana ba Isilaeli gagilile gya bisone u meeso ma Mlume, nabo bagilile migilo yulu ya Baali. ¹² Bamleile Mlume, Abetcha a bamasabo, mine gubalushishe uhuma mnda sii gya Misili, boo nuulama tunge tubetcha, tumwe tubetcha twa babo batu bene babele hushama hoka nabo ngubi chose, baliginaminye u mbele gyato; bamchigiliche Mlume, guchigililwe. ¹³ Bamleile Mlume, bagilile migilo gya Baali na Baashtolethi. ¹⁴ Sungu cha Mlume chilamine hegulu ha Isilaeli, nage bubabiile mmabo ma batu bene babawatille kole, gubagudiche na ubabiya m maboo ma tumangu twabo ngubi chose; na bashibele huosha iyakaugimanau mbele wa tumangu twabo. ¹⁵ O ose wine wabagile uboo wa Mlume ubelehegulu habo wa ubagila bisone, nahi Mlume byeliganine, nahi Mlume byelibalahile pa; nabo badidibuwe abisa. ¹⁶ Hanyuma Mlume gubaginune ba tululiya, bene babahogonone m maboo ma batu bene babawatile kole. ¹⁷ Alakini ata bibyo bashibahuliche babo ba tululiya babo, yulu baitile masei wa ulama tunge tubetcha, baginamine u mbele wato; bagalwile abilo, na ugileya ndila giya gigilile bamasabo, bene banyeminye alago a Mlume alakini boo bashigilile bibyo. ¹⁸ Mlume mengo melibaginunine tululiya, haho Mlue gubele hamwechi na ao aluliya, abahogonone na maboo ma tumangu twabo masugu mage mose ma ao aluliya; bululi Mlume gugaluwile yulu ya ulila wabo wa ibalo ya babo batu bene babamonene na ubasusula. ¹⁹ Alakini habele, mengo meliwile guya aluliya, bagiwile inyuma nyuma baitile bisone uhima bamasabo, wa ulama tunge tubetcha yulu ya utugilile migilo, na ugimana u mbele wato; bashileile bigilanywa byabo, na madila mabo ma buhulihuli. ²⁰ Haho sungu cha Mlume chilamine hegulu ha Isilaeli, nage guganine, Bululi guno mmoga gwagugicha malagano manyi madisambile bamasabo, na bashihuliche liidi lyanyi. ²¹ na Nene utulahano nishiguchinga mmoga ata gumwechi gwa baya bene bashigilwe na Yoshua heliwile; ²² yulu ya ndila gya bibyo naoshe ubatonda ba Isilaeli, wa ugana nambo biusa ndila gya Mlume ugyata mnda gigyo ndila, ao nangu. ²³ Bibyo Mlume gugileile gigyo mioga, na gushigichingile wa abilo, na gushigibiile mnda maboo ma Yoshua.