¹ Hanyuma baana ba Eflaimu basambane hamwechi na uhita na ugya luubi lwa ubo wa uachi; bamsambile Yefta, Yulu yai gogwe udabuwa na ugya ulwa na baanaba Amoni, na gogwe ushitugitile beswe tugye hamwechi nobe? Twichigya ndu gyobe na gogwe ulimo. ² Yefta gubasambile, Nene na batu banyi tubele na mishenge gingi na baana ba Amoni; na nene haya handimgitile benywe, mushichwile upogonona na maboo mabo. ³ Nene handimonine ugana benywe musapogonona, nibiile mwego gwanyi mmahunago, haho nidabuwe na ulwa na baana ba Amoni, Mlume nage noo ubabiya mnda uboo wanyi; yulu yai na benywe unjila lino usimba ulwa nanyi? ⁴ Haho Yefta gusumbiche batu bose ba Gileadi, na ulwa na Eflaimu; na babo batu ba Gileadi babalwile batu ba Eflaimu, bululi baganine, Benywe Bagileadi muli basinyi bene batolowile Eflaimu, muli hushama hawingi ha Eflsimu na hawingi ha Manase. ⁵ Nabo Bagileadi bawatile byabu byose bya Yolodani pinda piswa gya Baeflaimu; hanyuma bibele, haya baana bene batolowile Eflaimu gumwe gwabo heliganine, Ndeye nadabuwe, baya batu ba Gileadi bamsambile, Wi wii! Gogwe uli Mmeflaimu? Yulu guganine, Nangu; ⁶ haho bamsambile, Bino, tonda ugana ino inywa, Shibolethi; nage guganine, Sibolethi; bululi gushioshiche uita milomo gyage ugana iyo inywa bisoga; bibyo bam'bwatile, na ummaga haya ha byabu bya Yolodani; bibyo bawile mamo mengo batu ba Eflaimu maumi mana na balili uki. ⁷ Gugo Yefta nuuba aluliya a Isilaeli myaa mtuba. Bibyo Yefta guwule, Mgileadi, guchiilwe hawingi ha gimwe mbuga gya Gileadi. ⁸ Hanyumahage gugo, Ibzani gwa Bethlehemu gee nuba aluliya a Isilaeli. ⁹ Gubele na bawalubaga maumi matatu gubahilile bagye linge huguma, hanyuma gulushishe baachana maumi matatu uhuma inge ihana yulu ya babo bawalubaga bage. Gee nuuba aluliya a Isilaeli mengo ma myaa njwii. ¹⁰ Gugo Ibzani nuuwa, nuuchiwa uya Bethlehemu. ¹¹ Hanyuma hage gugo, Eloni, Mzabuloni, nuuba aluliya a Isilaeli, gubaluliye Baisilaeli mengo ma myaa umi. ¹² Gugo Eloni, Mzabuloni, nuuwa, guchiilwe uya Aiyaloni mnda sii gya Zabuloni. ¹³ Hanyuma ha gugo, Abdoni mwaana gwa Hileli, Mpilathoni, nuuba aluliya a Isilaeli. ¹⁴ Nage gubele na bawalubaga maumi mana, na beedulu maumi matatu, babele huchina baana ba punda maumi njwii; nage gubele aluliya a Isilaeli mengo ma myaa inana. ¹⁵ Gugo Abdoni mwaana gwa Hileli, Mpilathoni, nuuwa, guchiilwe uya Pilathoni mnda sii gya Eflaimu, mnda sii ga tubandagulu twa Baameleki.