¹ Haho guya Yefta, Mgileadi, gubele ilume pambwa abisa, nage gubele m mwaana gwa mmachana sengu; Gileadi noo gubutile Yefta. ² Mmachi gwa gugo Gileadi gum'butile mwaana; na baya baana ba mmachi walwa habaomine basili baosobu bamchingile Yefta, na umsambila, Gogwe ushihyana mnda ndu gya setu; yulu gogwe uli mwaana gwa gunge mmachana. ³ Bibyo Yefta gubasinine babo bashiwabo, gushamine mnda sii gya Tobu; na batu ba buhulihuli bagile na ulilunga na Yefta, bagimanine na ugya hamwechi nage. ⁴ Bibele hanyuma, baana ba Amoni balwile bita na Isilaeli. ⁵ Hamoneye, haho baama na Amoni habalwile na Isilaeli, miungu gya Gileadi gigile umguha Yefta uya mnda sii gya Tobu; ⁶ bamsambile Yefta,Chuno gogwe wabe mswe gwetu, yulu twaoshe ulwa bita na baana ba Amoni. ⁷ Yefta gubasambile baulu ba Gileadi, Wi wii! Benywe mushikonywine nene na unyiinga nahume mnda ndu gya tata? Bino yulu yai unjwilile mengo mamli na asusu? ⁸ Baulu ba Gileadi bamsambile Yefta, Yulu ya bibyo beswe twagaluwa na uuchwila gogwe iyaka, yulu ugye hamwechi netu na ulwa na baana ba Amoni, gogwe ubi mswe gwetu hegulu ha bashami bose ba Gileadi. ⁹ Haho Yefta gubasambile baulu na Gileadi, Ugana mwangiwicha iyaka wetu yulu ya ulwa na baana ba Amoni, nage Mlume gabebahunya u mbele wanyi, wi wii! Nene nibi mswe gwenyu? ¹⁰ Baulu ba Gileadi bamsambile Yefta, Gee Mlume noo gubi mangisiyo hawingi hetu; chigilwe gyetu twiugilila ulamana na inywa yobe. ¹¹ Bibyo Yefta gugile hamwechi na baulu ba Gileadi, na babo batu bammitile uba mswe gwabo; nage Yefta gudogome binywa byage byose u mbele wa Mlume uya Mispa. ¹² Haho Yefta gutumine batu bagye na mwano uli oolo lya ba Amoni guganine, Wi wii! Gogwe uli nanyi ii, na uli huchwa ulwa na sii gyanyi? ¹³ Oolo lya baana ba Amoni gubagaile baya bagile na mwano gwa Yefta wa yulu ya Isilaeli iguhile sii ganyi, haya hene habasalile uhuma mnda sii gya Misili, uhuma Amoni ndaa na Yakobi, na ndaa na Yolodani; bino hano ugiwiche bibyo bibaloo nangu wa bita. ¹⁴ Yefta gutumine batu ba bubili na mwano bagye wa gugo oolo lya baana ba Amoni; ¹⁵ gumsambile, Yefta gugagine bino; Isilaeli gushiguhile sii gya Moabu, na ata sii gya Amoni; ¹⁶ alakini haya habasalile uhuma mnda sii gya Misili, na Isilaeli igile mnda mgala ndaa na uhyila Bahali lya Shamu, na uhyila ndaa na Kadeshi; ¹⁷ haho noo Isilaeli ihilile batu na mwano uli oolo lya Edomu, baganine, Nuhuusaba abisa uupe luhusa nahite mnda sii gyobe; alakini oolo lya Edomu lishihuliche. Noo bibyobammilile batu na mwano oolo lya Moabu; ata na gee gushigitabiche; haho noo Isilaeli haishamine Kadeshi. ¹⁸ Hanyuma bahitile mgala na ugichunguluwa sii gya Edomu, na sii gya Moabu, nabo bahitile luubi lwa mlugulu mwa sii gya Moabu,bagimiye bitula luubi lwa bubili lwa Alnoni; na bashigingile mlugumba lwa sii gya Moabu, yulu Alnoni noo lubele lugumba lwa Moabu. ¹⁹ Hanyuma Isilaeli itumine batu na mwano bagye uli Sihoni oolo lya Baamoli, oolo lya Heshboni; Isilaeli bamsambile, Tulihuusama utuheluhusa tuhita mnda sii gyobe, ndaa na ihana yanyi. ²⁰ Alakini gugo Sihoni gushi bahuliche Baisilaeli yulu bahite mnda sii gyage; bibyo Sihoni gusumbiche batu bage bose, nabo bagimiile bitula haya Yahasa, balwile bita na Isilaeli. ²¹ Mlume, Abetcha a Isilaeli, gum'biile Sihoni na batu bage bose m maboo ma Isilaeli, nabo babahagile; bibyo Isilaeli ihyilile gigyo sii gya Baamoli, bene babele hushama gigyo sii. ²² Nabo bahyilile lugumba lose lwa Baamoli, uhuma Alnoni ndaa na Yakobi, uhuma gugo mgala ndaa na Yolodani. ²³ Bino hano Mlume, Abetcha a Isilaeli, abasapile Baamoli bahume u mbele wa batu bage Isilaeli, na gogwe ulihusimba ubasape gibe gyobe? ²⁴ Wi wii! Gogwe ushihyilila iya yine gugo Kemishi abetcha obe uuhele uihyilila? Byokabiya, gwiosha byose Mlume, Abetcha etu, gumchingile uhuma u mbele wetu babo noo batwihyilila . ²⁵ Bino na gogwe wi wii! Uli msoga uhima Balaki mwana gya Sipoli, guya oolo lya Moabu, wa byo byose? Wi wii! Gee guhidane na Isilaeli ao ulwa nabo bita? ²⁶ Mengo mabele Isilaeli hushama Heshboni na maguba mage, na mnda Aloeli na maguba mage, na mnda mabuga mamo mose menemali mibamba mwa Alnoni, mengo mamyaa sambi chitatu; yulu yai benywe mushimapashile iyaka mamo mengo mose? ²⁷ Bino nene nishiugilile gogwe buubi, alakini gogwe wangilie nene ugugila wa ulwa nanyi; gee Mlume, gee Aluliya, na gabe aluliya bino hawingi ha baana ba Isilaeli na baana ba Amoni. ²⁸ Alakini oolo lya baana ba Amoni lishihuliche biya binywa bya Yefta byine byelimmilile. ²⁹ Haho luhuda lwa Mlume luchwilehegulu ha Yefta, nage guhitilehawingi ha Gileadi na Manase, guhitile na hawingi ha Mispa gya Gileadi, na uhuma haya Mispa gya Gileadi, guhitile na ubagila baana ba Amoni. ³⁰ Nage Yefta gulibindile wa Mlume, guganine, Nambo gogwe wibabiya baana ba Amoni mnda maboo manyi chigilwe. ³¹ bibyo habi ugana, iya yine yitobowa mnda mchango gwa ndu gwanyi na uchwa ungaa, hayahene handigiwila na talala uhuma u babo baana ba Amoni, iyo ibya ibi ya Mlume, nene niitangila ibe lutangi lwa uchigya. ³² Bibyo Yefta gudabuwile ubagila baana ba Amoni yulu ya ulwa nabo; nage Mlume gubahagile uhumina uboo wage. ³³ Gubahagile uhuma Aloeli ndaa na uhyilaMinithi, mabuga maumi mabili, ndaa na Abel-kelamimu, gubahagile wa ushinja wa uhima abisa. Bibyo baana ba Amoni baisilwe u mbele wa baana ba Isilaeli. ³⁴ Hanyuma Yefta guhiile Mispa u ndu gyage, na loola, msiha gwage gutobowile uchwa umgaa, na ligimbi na maina; nage gubele m yihene; gushibele na gunge mmwalubaga ao msiha, nambo ge buchima ka. ³⁵ Baho helimmonine gugulile bichwalaganywa byage, guganine, Luhanga lubi lwanyi! Msiha gwanyi, wakonona abisa,na gogwe uli gumwe gwa baya bene bali hususula; bululi nene nummuninine Mlume anywa anyi, na nene nishinagiwila u nyuma na ulibindila wanyi. ³⁶ Msiha gwage gumsambile, Tata, gogwe ungadulile Mlume anywa obe; bino wangite ulamana na biya byine bihumine mnda anywa obe; bululi gee Mlume gwugiwidicha buubi wa buubi u tumangu tobe, babo baana ba Amoni. ³⁷ Hanyuma gumsambile sage, Bino na naitilwe ino inywa; undeye nene buchima mengo ma myechi gyopi, yulu nagye u koono, na ulilila bunyundu bwanyi, nene na beenanyi. ³⁸ Yefta gumsambile, Bibyo ubegya, Gummilile koo myechi gyopi; msiha gugile lwage, gee na beenage, ulilila bunyundu bwage uya u koono. ³⁹ Bibyi isula ya giya myechi gyopi, gugiwile uli sage, gumitile ulamana na uya ulibindila wage welibele m'biye; naguya msiha gushibele namana mlumyana. Hanyuma gusibele mshaminyi mnda Isilaeli, ⁴⁰ ugana misiha gya Isilaeli babe hugya mwaa wa mwaa yulu ya ummengelecha guya msihagwa Yefta, Mgileadi, masugu mana u mwaa.