¹ Hanyuma hage Abimeleki, guginywine Tola mwaana gwa Pua, mwaana gwa Dodo, gwa ilongo ya Isakali, ubahogonona Baisilaeli; nage gubelehushama Shamili, mnda sii gya tubandagulu twa Eflaimu. ² Gugo gubele aluliya a Isilaeli wa mengo ma myaa maumi mopi na gitatu, gee nuuwa, guchiilwe uya Shamili. ³ Hanyuma hage gugo haginywile Yaili, Mgileadi; nage gubele aluliya a Baisilaeli mrngo ma myaa maumi mabili na gibili. ⁴ Gugo gubele na baana maumi matatu bachinyi pa punda maumi matatu, nabo bebele na mabuga maumi matatu, mabele hugiswa Hawoth-yaili ndaa na bino lino, namo mali mnda sii gya Gileadi. ⁵ Yaili nuuwa, guchiilwe uya Kamoni. ⁶ Hanyuma baana ba Isilaeli baitile iyaka bya bigugichu u mbele wa meeso ma Mlume, Bagilile Mabali migilo, na Maashtolethi, na tubetcha twa Shamu, na tubetcha twa Sidoni, na tubetcha twa Moabu, na tubetcha twa baana ba Amoni, na tubetcha twa Bafilisti; nabo bamleile Mlume, na bashimgilele Mlume mgilo. ⁷ Sungu cha Mlume chilamine hegulu ha Isilaeli, gubagudiche na ubahaga m maboo ma Bafilisti, na m maboo ma baana ba Amoni. ⁸ Nabo babadegiche na ubamonena baana ba Isilaeli gugo mwaa; babaonene baana ba Isilaeli bene babele m'bwala bwa bubili bwa Yolodani mnda sii gya Baamoli, gyine gili uya Gileadi, mengo ma myaa umi na inana. ⁹ Baana ba Amoni nabo badabuwile Yolodani yulu ya ulwa bita na Yuda, na ulwa na Benyamini, na ndu gya Eflaimu; bibyo Isilaeli ibele hudegiwa abisa. ¹⁰ Bibyo baana ba Isilaeli bamlilile Mlume, baganine, Beswe tuugila buubi, wa ibalo twamshiga Abetcha etu, na ugilila Mabaali migilo. ¹¹ Nage Mlume gubasambile baana ba Isilaeli, Wi wii! Nishimmogonone benywe na baya Bamisili, na Baamoli, na baana ba Amini, na Bafilisti? ¹² Babo Basidoni, na Baameleki, na Bamaoni, bammonene, na benywe mundililile, nene nimmogonone na maboo mabo. ¹³ Alakini mwashiga nene, na ugilila migilo tunge tubetcha; bino yulu ya bibyo nene nishimmogonona iyaka. ¹⁴ Bino giwe ulilile tuya tubetcha twamusobole; na tuto tummogonone mengo ma ususulwa wenyu. ¹⁵ Baana ba Isilaeli bamsambile Mlume Twagila buubi; utuitile byose byine byolimona uba bisoga; alakini utuhogonone, tuutendelela, lusugu luno lwa lino, bino ka. ¹⁶ Nabo nuuhunya tuya tunge tubetcha twa tugenyi twine tubele hamwingi habo, nabo nuumgilila Mlume migilo; na luhuda lwage lumyowile yulu ya asusu a Isilaeli. ¹⁷ Mamo mengobaana ba Amoni basumbile hamwechi, babiile bushamo uya Gileadi. Baana ba Isilaeli nabo balisumbiche bagimiile bushamo Mispa. ¹⁸ Na babo batu, bahele ba Gileadi, basambilene boo wa boo, Wi wii! M nanyi gwa mtu mine gwitula ulwa na baana ba Amoni? Guya gubi mswe hegulu ha bashami bose ba Gileadi.