¹ Baana ba Isilaeli bagilile iyaka bya biibe u mbele wa meeso ma Mlume, Mlume gubabiile mnda maboo ma Bafilisti, mengo ma myaa maumi mana. ² Habele gumwe mtu gwa Sola, gwa ilongo ya Badani; china lyage Manoa; na mmachage gubele igumba, gushibutile mwaana. ³ Malaika ma Mlume mamtobwele gugo mmachana, mamsambile, Loola, gogwe mine wili igumba; ushibabuta, alakini wiswala gumo, na gogwe wibuta mwaana gwa mlumyana. ⁴ Bino hano, lihengye, nilihuusaba, ushinywe ibugu ao malwa, na ushiye yo yose ili na bunyenye. ⁵ yulu loola, wiswala gumo, gogwe wibuta mwaana gwa mlumyana; abego ashihite u mswe gwage; bululi gugo mwaana gubi mlibindilwa gwa Abetcha utula mgumo mobe; nage noo gwitula ubahogonona ba Isilaeli na maboo ma Bafilisti. ⁶ Haho guya mmachana gugile umsambile mlumyage, guganine, Mtu gwa Abetcha gwanjwila, na yenyi yage yaba nahi yenyi ya malaika ma Abetcha, gwa luteshi abisa; nene nisam'bucha, Wahuma uhi? Nage gusambila chinalyage; ⁷ alakini gwasambila, Loola, wiswala gumo, na gogwe wibuta mwana gwa mlumyana; bino hano, ushinywe ibugu ao malwa, na ushiye yo yose yine ili na bunyenye. Bululu gugo mwaana gubi Mlibingilwa gwa Abetcha utula mgumo mobe, ndaa na lusugu lwage lwa uuwa. ⁹ Abetcha ahuliche liidi lya Manoa; nage malaika na Abetcha gugile iyaka uli guya mmachana helibele mshame mlubala; alakini mlumyage, Manoa, gushibele hamwechi nage. ¹⁰ Bibyo gugo mmachana gugile abilo, guhingile abilo, na umsambila mlumyage, guganine, Looa, gugo mtu gwahutobwela iyaka, guya mine gunjilile luya lusugu. ¹¹ Bibyo Manoa gugimanine, gumlamine mmachage, na umyila gugo mtu, gum'bidiche, Wi wii! Gogwe noo guya mtu mine gudogomine na guno mmachana? Guganine, Ehe, m nene. ¹² Manoa guganine, Bino hano, bibyo binywa byobe habyiwilila, wi wii! Gugo mwaana gubi gwa wii, na mgilo gwage gubi gwa bihi? ¹³ Malaika ma Abetcha mamsambile Manoa, U bibyo byose byine byandimsambile gugo mmachana galihengye. ¹⁴ Gashiye yo yose yine ilihuhuma u mzabibu, ao gashinywe ibugu, ao malwa, na gashiye yo yose yine ili na bunyenye; bibyo byose byandimsambile na gabyuse. ¹⁵ Hanyuma Manoa gumsambile gugo malaika ma Mlume, Nilihuusaba, tuuchibele hacho, yulu tugye uhaga mwana mbuchi na tuuhile. ¹⁶ Alakini malaika ma Mlume gumsambila Manoa, Inangwa wachibila, nishiya mkati gobe; na ugana ulihusimba uita lutangi lwa uchigya, byulingye umtambikila Mlume. Bululi Manoa gushibele humana ugana guya m malaika ma Mlume. ¹⁷ Manoa gumsambile guya malaika ma Mlume, china lyobe uli nanyi, bululi haya hene bibyo binywa byobe habyiwilila naoshe uuginuna? ¹⁸ Gugo malaika ma Mlume gumsambile, Yulu yai gogwe ulihumbucha chinalyanyi, yulu lilyo china mlya migodogolo? ¹⁹ Haho Manoa guguhile guya mwaana mbuchi, hamwechi na lutangi lwa buusu, gumtangile Mlume hegulu ha huo; gugo malaika gugilile ya bisaga; Manoa na mmachage balingamine. ²⁰ Bululi, bibele, haya luya lulindi lwa aahya halugulume ha guluuhuma haya ha butambikilo, guya malaika ma Mlume guselile mnda luyalulindi lwa aahya a butambikilo; nabo Manoa na mmachage balingamine; baginyiye byenyi hasi. ²¹ Alakini malaika ma Mlume mashimtobwele Manoa iyaka, ata na mmachage, Bibyo Manoa noo helimanine ugana m malaika ma Mlume. ²² Manoa gumsambile mmachage, Winene gyetu twiiwa beswe, yulu twammona Abetcha. ²³ Alakini mmachage gumsambile, Nambo Mlume gwabaunda utuhaga, gusabagaa lutangi lwa uchigya, ata lutangi lwa buusu, uhuma m maboo metu, na gusaba tumonya bikoko bibyo byose, na gusabatusambila bihisho nahi bibyo mano mengo. ²⁴ Bibyo gugo mmachana gubutilwa mwaana gwa mlumyana gumgitile china lyage Samsoni, gugo mwana guulile, Mlume gummalile mihaa. Luhuda lwa Mlume lutulile gee uhulwa na talala uya Mahane-dani,hawingi ha Sola na Eshtaoli.