¹ Mndi guya gulimnda asusu gushihulwa umona usasamuwa. Haholutangi gungile mnda sii gya Zabuloni na mnda sii gya Naftaliwa umoneya mnda ubedulwa, ha isua ya haho guitile uba ugengeda, hoka na ndila gya bahali; hawala wa Yolodani, Galilaya gya mioga. ² Baya batu bene bagyatile mnda mdoo Bamonine lwenge lwingi; Baya bene bashamine mnda sii gya ihochu ya lubu, Lwenge lwabalamyila. ³ Wabucha mmoga, walibiya saso lyabo.; Balihuseele u meeso mobe, Nahi saso lwa mengo ma usola, Nahi batu byabasuseelela habasugabula kole. ⁴ Bululi wanoga mti gw mchigo gwage, na igongo ya ombe lyage, na sangulo gyage guya mine gummonene, nahi ha masugu ma Bamidiani, ⁵ Bululi tuome tose twa mtu mine gwina aome mengo ma ihulo, na bichwalaganywa bichundilwe mmashi, bibiwa alibu na uchigiwa, chibi kinyi cha ubiwa w'ahyaa. ⁶ Bululi yulunyenyu mwaana gubushilwe, Tuhelwe mwaana gwa mlumyana; Na uosha w'atego ubi omaombe mage; Nage gwigiswa china lyage, Mmungi gwa tenene, Abetcha ene ina uoma, Tata gwa milumbu, Oolo lya talala. ⁷ Uginyuwa wa buoolo bwage na talala; Ushibi na isula ata, W'isuba ya tulimbwa twa Daudi na buoolo bwage; Ubumonya na ubugimiya; Wa uonona na wa kiine, Utula hano ndaa na milumbu. Buwa bwa MLUME gwa basolikoto noo bwigila bibyo. ⁸ Mlume gummilile Yakobo inywa, imyile Isilaeli. ⁹ Nabobato bose bimana, noo, Eflahimu naguya gulihushama Samaliya, balihudogoma wa lubedo na ulitona bichuli-chuli byabo bya mwego, ¹⁰ Biliki byagwa, bibyo beswe twigubaa na mawe ma mabachwe; bishembe byagechwa na beswe twibiya miamba hanyuma ha bishembe. ¹¹ Wa iyo ibalo MLUME gwiginuna amangu a Lesini hegulu hage, nage gwisenya tumangu twage; ¹² Baashuli lubi lwa mlugulu, na Bafilisiti lubi lwa mmanda mwage, nabo bim'ya Isilaeli waanywa ene ali hululu. Hamwechi na bibyo byose sungu chage chishigalwile koo, ata bino oboo wage ugolwile, ¹³ Ata bibyo babo batu bashimgilile MLUME guya gubahulile, na nangu ummenga ata MLUME gwa basololkoto. ¹⁴ Wa yulu ya bibyo MLUME gwigeda mnda Isilaeli mswe na mmila, nazi na nyobu, lusugu lumwechi. ¹⁵ Mmulu mine gulihunyemiwa noo mswe, na mbuwa mine gulihugigya wa lulimi noo mmila. ¹⁶ Bululi bene bali hubagolwela bano batu noo bali hubalubya, na baya bene balombwelwe na babo batu bashimiwa. ¹⁷ Wa yulu ya bibyo Mlume gushiseelela bawalubaga babo, na gushimonena mashige na bawile babo misa; bululi batu bose ii basone na buumonena, na ndimi chose chilihudogoma bya buhugi. Hamwechina bibyo byose sungu chage chishigaluwile koo, wa bibyo uboo wage ugololilwe ata ba bino. ¹⁸ Bululi usona usuchigya nahi ahyaa; uchigya byokole na miigwa, ehe, ulama nda magunji ma bisowa, nao alihuguluwa hegulu ha matimba manyemu ma mii. ¹⁹ Wa yulu ya sungu cha MLUME gwa basolokoto ino ilaboo yichigiwa abisa; bano babu nabo bali nahi kunyi chilihubiwa w'ahyaa; hashi mtu gulihumonena mshiwabo misa. ²⁰ Bali husapa iliwa uboo wa ulume, nao ulihumona ndala! Nabo baluhulila lubi lwa uboo wa uachi, nabo bashihugyuta! Biiya kila mtu nyama cha uboo wage gemine. ²¹ Manase gwamya Eflahimu, nage Eflahimu gwamya Manase; nabo bose babili balwa hegulu ha Yuda. Hamwechi na bibyo sungu cha MLUME chishigaluwa uba koo, bibyo uboo wage wagololwa ata bino.