² yulu ya ulubya mmengi gashihewe kiine gyage, na ubasapa bambuchu ba batu banyi kiine gyabo; yulu bawilwa babe kole chabo, na ubaita ba mashige bene bawililwe na bamanabo uba buhibi bwabo! ³ Benywe mwigila ii lusugu lwa uchwilwa, na mengo ma uchimiwa , hamichwa uhuma koo abisa? Wi wii! Mwimsinina nanyi m'be na mbatilicho? Na ugengeda wenyu mwiushiga uhi? ⁴ Biginama hasi ha bahambwa ka, bigwa hasi ha bene bawile. hamwechi na bibyo bose sungu chage chishigauwa uba koo, na uboo wage ugololwe ata bino. ⁵ Luhanga lubi uli Ashulu! Ati a sungu chanyi, igongo yine ili mmuboo wage iiuchigililwa wanyi! ⁶ Nimmila u mmoga gwine guli husebulula; nimma malagano hegulu ha batu uchigililwa wanyi, gawate kole, na uuguhakole, na umswaga nahi biswaswa bya mndila. ⁷ Na bibyo noo byeshi hulanga gee mine, na noo bishi hulanga mtima gwage ulangila udogya, Na ubahanya ba mioga, na gishi mioga gicho. ⁸ Bululi gwagana, Wi wii! Bahele banyi bashi bose maoolo. ⁹ Wi wii! Kalni gushi nahi Kalkemishi?Hamashi gushi nahi Alpadi? Salaliya gushi nahi Dameski? ¹⁰ Nahi biya uboo wanyi byauhyile maoolo ma miishi, miishi gyabo gibele gya ubachwa gibele gisoga uhima miishi gya Yelusalemu na gya Samaliya; ¹¹ wi wii! nishigigila Yelusalemu na miishi gyage byoka biya nahi byandigilile Samaliya na miishi gyage? ¹² Bino, habi, Mlume helihwa uwilicha mgilo gwage gose heguluha loono sayuni na hegulu ha Yelusalemu, nidogya biguma bya buhulihuli bwa mtima gwage oolo lya Ashulu, na ulimona wa meeso mage. ¹³ Wa bululi gwagana, Wa uoma wa uboo wanyi nagilaino igilanywa, na wa lwengu lwanyi; yulu nene ina lwenyi; nene nahunya ng'umba cha batu, nawata kole tuhwaba twabo, nibagwishiche bene balibashame u bisuba bya buoolo nahi bisugila ilume pambwa. ¹⁴ Na uboo wanyi wabuhunya bumona bwamioga nahi mmiisa ya anonyi; na nahi biyabatu byabasuongola magi ma mashigwe, noo byandiongole sii gyose; na hashi ata gumwechi gudigiche bihwahwa byage, na ata ugadula anywa age na ata uosha ulila. ¹⁵ Wi wii! temo lilitone yulu yage guya mine gulihugila nalyo? Wi wii! Mgechi gwa wino galitone yulu ya guya gulihugeda nago? Byisuba ugana abango anabadigicha bene bali huaginuna, na lubango lwagamginunagee nine gushi mti. ¹⁶ Wa bibyo Mlume, MLUME gwa basolokoto, gwibahilila ugonda batu bage bene bali bahemu; na habisuba na ugengeda wage bilamiwa na ushigiwa nahi uchigiwa wa ahyaa. ¹⁷ Na lwenge lwqa Isilaeli lubi noo ahyaa, na Mmaha gwage gubi lulindi lwa ahyaa; nao ichigya na ulamba byookole byage na miigwa gwage gose lusugu lumwechi. ¹⁸ Nage gwichigya ugengeda wa bisowa byage, na wa biliwa bya lubala lwage lwa luseulilwe, utula ichuli-chuli ya mwego ndaa na nyama cha m'bili, bibi nahi biya mtu gwawa na lubaba. ¹⁹ Na miti gya bisowa byage gyine gyishigala gibi gicho ata mwana alela gunaosha ugibala. ²⁰ Itaka bibi luya lusugu mihona gya Isilaeli, na baya bahogonywine na ndu gya Yakobo, bashi mgegamina guya mine gulwile nabo, haho bimgegamina MLUME, Mmaha gwa Isilaeli, wa chigilwe. ²¹ Mihona, nagyo ii mihona gya Yakobo, bimgiwilila Abetcha, ene alim na uoma. ²² Bululi batu bobe Ee Isilaeli, inangwa bali bangi nahi isee ya wibega, ii mihona ka gyine gyigiwila; uchimiwa noo wine uli ubiwe, ulihutupuwa wa kiine. ²³ Wa bululi Mlume, MLUME gwa basolokoto, gwiwilicha uchimiwa abisa wine uli ubiilwe ibaloo yose. ²⁴ Wabibyo Mlume, MLUME gwa basolokoto gwagana bino, Benywe batu banyi bene bali bashame mnda mwa Sayuni, nangu umona Ashulu booba, inangwa wa uhuula wa sangulo, na uginuna igongo yage hegulu hobe, nahi wa mlingilisho gwa Bamisili. ²⁵ Bululi hanyuma na mengo macho ka bichigililwa byihwa, na sungu chanyi chibagalwila na ubachimya. ²⁶ Na MLUME gwa basolokoto gwiginuna mzeleti hegulu hage, nahi biya byelilwile na Bamidiani hoka na mmao gwa Olebu; na igongo yage ibi hegulu ha bahali, nage gwiginuna wa mlingilisho gwa Bamisili. ²⁷ Iyaka habi mnda maya masugu mchigo gwage gwihuma uombe lyobe, na guya mti gwa uhambilwa gwinogwa, wa yulu ya ubiwa mauta. ²⁸ Gwahiya Ayathi; gwahita hawingi ha Migloni; gwabiya mochigo gyage uya Mikmashi; ²⁹ badabuwa yabu; bagya ulala Geba; Lama gyadanda; Gibeya gya Sauli gyasina. ³⁰ Ulile abisaEe msiha gwa Galimu; hulicha, Ee Laisha; luhanga lubi oli gogwe, mbuchu Anahtothi! ³¹ Madmana ii msinyi; mshami gwa Gebimu balisumbicha basine; ³² lusugo luno lwa lino gwigimana ubo Nobu; gwidigicha uboo wage hegulu ha loono lwa misiha gya Sayuni, loono lwa Yelusalemu. ³³ Lingaminywe, Mlume, MLUME gwa bilume pambwa, gwigeda matabi wa uoma wa udanja; nabo bene bali balahu bichuli bigechwa; na baya bene baliginune bigwishiwa hasi; ³⁴ nage gwigeda ihanda ya mmiisowa wa igela, na Lebanoni gwiigwa wa uboo wage guya mine gwina uoma.