¹ Bino wiilindi ya shina lya Yese wimena otela, na tabi lyimene umichinga gyage lyiha biguma. ² Na mtima gwa MLUME gwishama hegulu hage, mtima gwa lwengu na gwa umana, mtima gwa mmungo na uosha, mtima gwa malango na gwa umnyemya MLUME; ³ Na saso lwage libi mnda umnyemya MLUME; ata bibyo gushionona wa ulamana na byelihumona na meeso mage, na gushilangulula wa ulamana na byelihuh8licha wa matu mage; ⁴ ubi wa kiinegwionona ba mbuchu, nage gwibalangulula bahochu ba gino sii wa kiine; nage gwiihula ibalo wa sangulo cha anywa age, na wa luhuda lwa milomo gyage gwibahaga basone. ⁵ Na kiine gibi mchingo gwa mmunda chage, na uwilila mchingo gwa ulihamba u matao. ⁶ Mlunga gwishama hamwechi na mwana-mmoo, na ngoo gyilala hamwechi na mwana-mbuchi; mwana-ng'ombe na mwana-tambwe na binonywe babi hamwechi, na mwana alela gwibiusa hamwechi, ⁷ Ng'ombe na iila chyilishiwa hamwechi; baana bacho bilala hamwechi; na tambwe gyiya byanyi nahi ng'ombe. ⁸ Na mwaana gwukoka gwishiga ha hundu lya ndowa, na mwaana gwamlewe mabele gwigiya uboo wage mpao gya suti. ⁹ Bashigugicha na bashidogya mnda loono lwanyi lwa luhaha; bululi sii gyigilula na ummana MLUME, nahi biya bisugilula madi mnda bahali. ¹⁰ Na habi ha luya lusugu, Shina lya Yese lili ligimanyu uba isagawa mioga gya batu, gee noo mine gwiengwa na mioga; na ihana yage ya ulitulidicha habi na ugengeda. ¹¹ Na habi na lulo lusugu, Mlume gwihila uboo wage lwendo lwa bubili, yulu galihe batu bage bene bashigele, uhuma Ashulu, na uhuma Misili, na uhuma Pathlosi, na uhuma Kushi, na uhuma Elamu, na uhuma Shinali, na kuhuma Hamathi, na uhuma bichiba bya bahali. ¹² Nage gwibagimyila mioga bandela, gwibasumbicha batu ba Isilaeli bene batelilwe, gwibasumbicha batu ba Yuda bene bamwagiye, uhuma mnda masunga mana ma sii. ¹³ Na buwa bwa Eflaimu bwihuma, na bene bali humdegya Yuda bichyingwa koo; Eflaimu gushimmonena Yuda, na ata Yuda gushi msusula Eflaimu. ¹⁴ Nabo bisala, biligulwila ombe lya Bafilisiti lubi lwa igolo; nabo hamwechi bibawata kole baana ba mlugulu; bigolola uboo hegulu ha Edomu na Moabu; na baana ba Amoni bibanyemya. ¹⁵ Na MLUME gwilichimya abisa sunga lya bahali lya Misili; na wa mnaga gwage gwine gusuchimya gwidigicha uboo wagehegulu ha Ludi, nage gwilugabula , lubengudi njwii, na ubadabula batu bene bali na mikalabanda gya gigumu. ¹⁶ Gibi ndila gya gyata u mihona gya batu bage bene bishuigala, bihuma Ashulu, nahi biya byabibele u Baisilaeli, nahi luya lusuga lwa bahumine mnda ibaloo ya Misili.