¹ Hawingi ha masugu ma Ahazi mwana gwa Yothamu, mwana gwa Uzia, oolo lya Yuda, Lesini, oolo lya Shamu, na Peka, mwana gwa Lemalia, oolo lya Isilaeli, bahungile bagile Yelusalemu yulu ya ulwa nabo bita, mndi bashioshiche ugihima. ² Hanyuma batu ba ndu gya Daudi basambilwe ugana Shamu bahunga na uhulichana na Eflaimu. Na mtima gwage guchigililwe, na mitima gya batu bage,nahi miti gya mgala byagisudigila na mnaga. ³ Haho MLUME gumsambile Isaya, Bino, chuwa, Umgae Ahazi, gogwe na Sheal-yashubu mwanobe, uya wisula ya mdabwa gwa ishima ya hegulu, mnda ndila gya gyata wilagala ya dobi; ⁴ wamsambile, lingamina, washame pii; ushimone booba na nangu uwa mtima, wa ibalo ino miila gibili na bisisa bibili byine bilihuhuma mii; wa yulu ya sungu cha Lesini na Shamu, na mwana gwa Lemalia. ⁵ Wa yulu Shamu gwahungila buube yulu yobe, hamwechi na Eflaimu na mwana gwa Lemalia, baganine, ⁶ Bino, tugye ulwa bita na Yuda na ubahabaganywa, twabele hamwe twagingile, na ummonya oolo mnda mwage, gugo mwana gwa Tabeeli. ⁷ MLUME Abetcha gwagana bino, Ino inywa ishigimana na isihwila. ⁸ Wa bululi mswe gya Shamu ii Dameski, na mswe gwa Dameshi ii Lesini; na wa myaa maumi mtuba na gitano Eflaimu gwinugeya bihindi bihindi, gashibe iyaka mmoga gwa babtu; ⁹ uyaka mswe gwa Eflaimu ii Samalia, na mswe gwa Samalia ii mwana gwa Lemalia. Uba mushihubenja uwasha, hashi adugwa mushishigala na mwego. ¹⁰ Itaka MLUME gwagana na Ahazi guganine, ¹¹ Usabe ihwicho wa MLUME , Abetcha obe; uisabe ha ihana yine ili ha hasi abisa, anbe ata ha ihana yine ili ya hegulu abisa. ¹² Bibyo Ahazi guganine, nishiisaba, na nishimtonda MLUME. ¹³ Na Isaya guganine, M'behulicha hano,gyenywe ndu gya Daudi; Wi wii! Iyinywa icho wenyu ya ubaimya batu, na mulihubenja ummimya Abetcha anyi byoka biya? ¹⁴ Wa bibyo Mlume gemine gwibaha bisaga, Loola inyundu yiswala gumo, gwibuta mwana gwa mlumyana, nage gwigiswa china lwage Immanueli. ¹⁵ Mauta muhuma umabe ma ng'ombe na bui gwiya, mengo melimana uhanya busone na usobola bisoga. ¹⁶ Bululi hambele gugo mwana gushinama uhanya usona na usobola busoga, sii giya, gyolihuonywa gogwe maoolo mage mabili, mishigala mauwa. ¹⁷ MLUME gwihila hegulu hobe, na hegulu ha bato bobe, na hegulu ha ndu gya sobe, masugu mene mashi nachwa, utulila luya lusugu lwine luhumine Eflaimu ulibagula na Yuda; noo, oolo lya Ashulu. ¹⁸ Iyaka habi luya lusugu MLUME gwitela agundu igida yine ili lubi lwa isula lwa ngudi cha Misili, na ludiwi luli mnda sii gya Ashuli, ¹⁹ Nabyo byichwa na usala u bibetabeta bili mauwa, na mnda migumbo gya miao gya mawe, na hegulu ha byookole byose na hegulu ha byanyi byose bisuya nyama. ²⁰ Wa lulo lusugu MLUME gwibega mswe gwa isada ya mmagulu, wa abego ene asabilwe uhuma m'bwala mwa Ludi, noo, wa oolo lya Ashulu, nao uhwa alembe nao. ²¹ Wa lulo lusugu bibi mtu gwilisha mwana ng'ombe gwa ota gukoka na miyoo gyage gibili. ²² na bibi, wa ibalo chicho nyama chihunya mabeme meengi, noo yulu bwiya mauta ma uhuma u ng'ombe, na bululi mtu gegese mine gwishigala mnda gino sii gwiya mauta ma uhuma u ng'ombe na bui. ²³ Iyaka habi ha luya lusugu ihana yoyose yine habele na mizabibu uki, gibele hulusha bumona uki, habi ihana ya tusemege na migwa ka. ²⁴ Mtu gwigya uya gwigya na migwi na buta; yulu sii gyose gibi na tusemege na migwa ka. ²⁵ Na tuono tose tubele hulimwa na kasu, bashihiya oo yulu ya umona booba bwa tusemege na miigwa, mndi haho habi ihana ya uhila ng'ombe, ihana ya ugyatilwa na miyoo.