¹ Guya myaa guwile oolo Uzia nimmonine MLUME mshame witi ya buoolo, yine ili hegulu abisa na uginunywa abisa, na pindo cha bichwalaganywa byage bigiluche lubunga . ² Hegulu hage hagimene ba maselafi; kila gumwechi gubele na bihwahwa mtuba; wa bibili guunine yenyi yage; na wa bibili guunine magulu mage; na wa bibili guguliwile nabyo. ³ Bagitene gumwe wa gungenage, baganine, Mmaha, Mmaha, Mmaha, noo MLUME gwa basolokoto; sii gyose gyagilula na ugengeda wage. ⁴ Na mishingi gya biikwa nuudigila wa yulu ya lidi lyage guya gulilile, nagyo ndu nuugilula mii. ⁵ Haho niganine, Luhanganlubi wandi! Bululi nachimina; wa ibalo nene nili mtu gwa milomo gibi, na nene nilimshame hawingi ha batu bene bali na milomo gibi; na meeso manyi mamona Oolo, MLUME gwa basolokoto. ⁶ Hanyuma gumwechi gwa baya bamasilafi gujwilile; nage gubelena aala lya ahyaa mmuboo wage, lyine lyebele mguhe na lumano hegulu ha butambikilo; ⁷ Gukudile uanywa anyi wa lilyo aala, gusambile , Loola, lino lyuuda u milomo gyobe, na usona abe wahunyiwa, na buube bobe bwauninywa. ⁸ Hanyuma nihulicha lidi lya MLUME gulihudogoma, Namtume nanyi, nage mnanyi gwigya yulu yetu? haho noo handiganine, Nene guno, ubetuma nene. ⁹ Nage gusambile, Ubegya ubasambila bano batu, Gilililwe na uhulicha, ata bibyo mushinamna; Gilililwe nuulola, ata bibyo mushimona. ¹⁰ Ugichiminye malanga mitima gya bano batu, uabiya buhula matu mabo, ubabumbe meeso mabo; na hulicha wa matu mabo, na umana wa mitima gyabo, na ugiwila na uhonyiwa. ¹¹ Haho noo handibudiche, Ee MLUME ata mengo nai? Nage gubgaile, Ndaa na mengo mene mabi mabuga hululu, mashi na bushama, na madu hamabi mashi na batu, na gino sii hagibi mauwa abisa; ¹² Ata MLUME helibulula batu bagye koo abisa, na ubuluwa haubi wingi mnda sii hano na haya. ¹³ Na inangwa hinashigala ihana imwechi mnda bihana umi byage, yiliwa iyo nayo; nahi mibande na myaloni, inanga shina lyage libeshiugala; inangwa gwagechwa; byoka biya matete mahaha noo shina lyage