¹ Bululi MLUME gwimonena Yakobo misa, gwimguha Isilaeli iyaka, nage gwibabiya mnda sii gyabo bo bene; na mgenyi gwililunga nabo, nabo bililunga na ndu gya Yakobo. ² Na gigyo mioga bibaguha na ubahyiicha wihana yabo bo bene, na ndu gya Isilaeli gyibahyilila, na ubaita uba bagichi ba balumyana na ba baachana mnda sii gya MLUME; nabo bibaguha bahambwa baya batu bene bahambilwe boo, nabo bibahyilila baya batu bene babamonene. ³ Iyaka habi ha luya lusugu, lwine MLUME gwiuha tolelecho hanyuma ha uchigililwa obe, na hanyuma ha asusu obe, na hanyumaha bugichi buya bugumu bwa bugidiche; ⁴ wita ino ida uli oolo lya Babeli, na ugana, Nahi byelisungile mine guli humonena; Nahi byagisungile mbuga gya buhulihuli! ⁵ MLUME gwanoga igongo ya babii, Lubango lwabo lwa buoolo lwa bene bali huhyilila. ⁶ Gee mine guhulile mioga wa uchigililwa, Wa bihulo byine bishihusunga; Mine guhyilile mioga wa sungu, Gwaononywa gashichibile mtu. ⁷ Sii gyose gyalitucha na gili talala; Na ata utucha ugimba. ⁸ Ehe, na migunga gyi uuseelela, Na miamba gya Lebanoni, gibedogoma, Utula mengo molilachiwe hasi gogwe, Hashi mgechi gwa mitiu mine gutuchi.ile. ⁹ Usinda hasi ushi na talala yulu yobe; yulu ya ugaa holichwa; Usubabyula yulu yobe, Ehe, bene bali bato bose ba ibaloo; Ubaginuna bamaoolo bose ba mioga, Bachuwe bose u bisuba byabo bya buoolo. ¹⁰ babo bose bigaa na uusambila, Wi wii! Gogwe na gogwe usili alema nahi beswe! Na Gogwe usili nahi beswe! ¹¹ Ugengeda obe wasachiwa ndaa na usinda, Na lidi lya milimba-limba gyobe; Byolo byaganjwa hasi hobe, Na bichimu byuwila. ¹² Nahi byolisalile uhuma hegulu, Gogwe ambalambala u ulwelo, mwaana gwa halwelo! Nahi byoligedilwe abisa, Gogwe mine ugwishiche mioga! ¹³ Gogwe udogomina mnda mtima gobe, Nichina ndaa na hegulu, Niiginuna isuba yanyi hegulu uhima tumbalambala twa Abetcha; Na nene nishama hegulu ha loono lwa sumbilo, Mnda lubi lwa isula ya uboo wa uachi. ¹⁴ Nisela abisa uhima bichuli bya matimba. ¹⁵ Mndi wa bibyo wisachiwa ndaa na usinda; Ndaa na lubi lwa isula ya iina. ¹⁶ Nabo bene biumona biulola na meeso ma chungu chungu, Biulingamina abaisa, na bidogoma, Wi wii! Guno noo gudandiche sii, Guno noo gudigiche maoolo; ¹⁷ Guitile ibaloo uba mauwa, gugalulile mabuga ma ibaloo; Gushibsula bahambwa bage bagye wabo? ¹⁸ Maoolo mose ma mioga bachiilwe bose wa unyemiwa; mtu gegese mndu gyage gee buchima; ¹⁹ Wa bibyo gogwe watelwa koo na sinda lyobe, Wa otela lyine lichigiliche abisa; Nahi ichalaganywa ya baya bene bahagilwe, Baya bene bahagilwe wa ugechwa na tuhilu, Baya bene balihusala ndaa na isula ya iina; Nahi biya itumba ihyililwe hasi ha magulu. ²⁰ Ishi sumbichia hamwechi nabo mengo ma machio, Bululi waidogya ibaloo yobe, Wabahaga batu bobe; Ibushi yabo bangila biibe ishilumbulwa iyaka milumbu. ²¹ Iswe abilo ushinja baana babo. Wa yulu ya buubi bwa bamasabo; Bashichwe ugunyuwa na ushama mmino ibaloo, Na bashichwe ugilucha iyaka mabuga mnda ibaloo. ²² Nene niginyuwa yulu nahimane nabo; gwagana MLUME gwa bilume pambwa; na mnda Babeli nichula china lya mihona, mwaana na midulu; gwagana MLUME. ²³ Iyaka niita gigyo sii uba bushamo bwa byulungu, na bishiba bya madi; na nene nimahyagila koo wa yelo ya udogya, gwagana MLUME gwa basolokoto. ²⁴ MLUME gwa bilume pambwa gwalaha, Wa chigilwe gyanyi nahi biya byandilangile; noo byabibi; na nahi byandiganine, noo byabigiliya; ²⁵ ugana nimnoga gugo Mmashuli bihindi bihindi mnda sii gyanyi, na hegulu ha loono lwanyi nimyilila hasi ha magulu manyi; haho mti gwa uhamba hamwechi hagwihunyiwa, na mchigo gwage gwihuma u maombe mabo. ²⁶ Iyo noo ibalo ibiilwe mnda ibaloo yose, na ubo noo ubo ugololwe hegulu ha mioga gyose. ²⁷ Bululi MLUME gwa basolokoto gwalanga, nage ii nanyi gunaosha uugalula? Na uboo wage wine ugololwe, mnanyi gunaosha uumyona unyuma? ²⁸ Uununywa uno uchile mwaa guya guwile oolo Ahazi. ²⁹ Ushiseelele, Ee Ubafilisiti, na bose, Wa yulu sangulo giya giuhulule gyanogeya; Bululi mnda shina lya ndowa yitobowa iloba, Na ibushi yage ii ndowa gya ahyaa gya uguluwa. ³⁰ Nabo bene bali bambuchu abisa bilisha miyoo gyabo, Na basabi bililacha bisoga; Na nene nibiya shina wa ndala, Na mihona gyobe gyihagwa. ³¹ Liila luhanga , Ee mchango, lila, Ee gogwe mbuga; Ee Bufulisiti, na bose, wasumbuluwa abisa; Bululi mii gwachwa uhuma lubi lwa uboo wa uachi, Na hashi ata gumwechi gwichwelewa hawingi ha basolokoto gabe. ³² Batumwa ba mmoga gugo bagawe bihi? Ugana MLUME gwabiya mishingi gya Sayuni, na mnda giya mbuga baya bene bamonenywe bimona businino