¹ Uununilwa hegulu ha Babeli; malo ma mtima mamonine Isaya, mwaana gwa Amozi. ² Bino! Hegulu ha loono lwine lishi na miti ginunywe bendela, batelwe mbila gyenyu, bapepewe oboo, yulu bagingile mnda mchango gwa bahela. ³ Nene mine nibasambile batu banyi bene babiilwe uba banyi, ehe, nababiya batu bene bali na uoma wa yulu ya sungu chanyi, batu banyi bene bali huwasha binywa byanyi. ⁴ Mdodo u koono nahi mdodo gwa batu beengi abisa, mdodo gwa maoolo ma mioga gisumbile hamwechi; MLUME gwa bilume pambwa gwabiya basolokoto yulu ya bita. ⁵ batu bahumine ibaloo ya koo, utula luubi lwa isula ya gulu; ehe, MLUME na tuhilu twage twa uchigililwa, bululi bachimye sii gyose. ⁶ Iswe mdodo gwa booba; yulu lusugu lwa MLUME luli hoka; bwinya nahi uchimiwa wa uhuma wa Abectha Dambe. ⁷ Yulu ya iyo ibalo maboo mose milebela, na mtima gwa mtu gegese gwisumbuluwa. ⁸ Nabo bidamba mmee; biwaswa na busungu bwa usumwa; babi ba busungu nahi mmachana gusili hoka na ubuta; biunjulilana meeso; byenyi byabo bibi byenyi bya ahyaa. ⁹ Loola lusugu lwa MLUME lwahuchwa, lusugu lwa buhuchi, lwa sungu na uchigililwa abisa, yulu luite ibaloo uba na mauwa, na ubahaga batu bayo, bangila bibe, bashishame mnda mwayo. ¹⁰ Bululi tumbalambala na ihichi yose ya hegulu bishihunya lwenge lwage; chuba libi mdo mengo mage ma busugu uya, na mwechi gwileya lwenge lwage lushimoneye. ¹¹ Nene nisusula batu bululi bwa usona wabo, na bangila bibe ibalo ya abachi abo; nene nisungya ugengeda wabo bene bali na unenuna; nene nigwisha hasi ulimona wabo bene bali na buhuchi; ¹² niita batu umoneya bacho uhima nolo cha chihaha, na batu uhima nolo cha Ofili. ¹³ Wa bibyo nidanja gulu, na sii gyidanjwa uhuma ha ihana yage, wa yulu ya uchigililwa wa MLUME gwa basolokoto, na wa yulu ya lusugu lwa sungu chage buhuchi. ¹⁴ Bino, lubi nahi biya kulungu gyababulwa, na nahi biya miyoo gishi na mtu gwa ugiusa; kila mtu gwigalwila batu bage; nabo bisina, kila mtu gwigya wibaloo yage gee buchima. ¹⁵ Mtu gegese mine gwimoneya gwihunyiwa malahambuga, na mtu mine gwiwaswa gwihagwa wa ahilu. ¹⁶ Na baana babo ba tulela binogwa-nogwa umbele wa meeso mabo, madu mabo miwaswa kole, na baachi babo bigililwa bya buhulihuli. ¹⁷ Loola, nibabyula Baamedi hegulu habo, bene bashi humona bumona uba iyatu, na bashi huseelela nolo. ¹⁸ Na mata migwisha bawalubaga babo; na bashimonena baana ba mmagumo yano; liiso lyabo lishimonena baana misa. ¹⁹ Na Babeli, uba ugengeda wa buoolo, buhungwe bwa buhulihuli bwa Bakaldayo, ubi nahi Sodoma na Gomola haya hene abetcha helichiminye. ²⁰ Gishishaminywa na batu iyaka abisa, na ata batu bashishama mo iyaka utula ibushi ndaa na ibushi. Mwalabu gushigimiya itula yage uya, na ata baushi bashilacha bihichi byabo iyaka uya. ²¹ Haho ubo wilala byila bya buhuchi bya mgala; na nyumbu chabo chigilula maswiswi; magomba mishama ubo; na manuchi mishiga ubo. ²² Na milunga gyiduga mnda miao gyagyo; na mibwabwa gyishama mnda mabibi magyo ma usona; na mengo mage masili hoka na uhiya, na masugu mage mashibuchiwa.