¹ Hano imani iweenene ya bitu byenye byechwa, ibitu byenye bishii hamoneya. ² Weenene wa bibyo miongo kyetu baleushuhudiwa. ³ Wa imani tuleomana kwa bomba lungo wa binywa bya Abeca, ata bitu bileomoneya bishi bilongye uhumona na bitu byene bibele omoneya. ⁴ Yebele yolu ya imani habili kwetoleye Abeca lutangi ya ebenju oheta Kaini, ebele iyolu oo weene kwetonywe oba mine keene. Abeca kwetone wa yolu ya lutangi koleilele. yolu ya bibyo, habili ota imubu koleodokoma. ⁵ wa imani Enoka kokele hekelu kushi monine lubu. " Kushi moneye, yolu Abeca kweswale" Wabiya, koledokomwe hekulu hake obaa kopenjiche Abeca hanyuma ake ukya ekolu. ⁶ Namba ashi imani tushiweche openja Abeca, weenene itu mine koleokekela Abeca lazima nine koleoamini okana Abeca kwetu na obaha baya baleomenga. ⁷ Wa imani nuhu, uhuma omonywa na Abeca kweyenge bisaba omoneya, bonyemmbwa Abeca kwenyenge bwato yolu kahonye lubato lwake. waoeta bibyo, kole uonona lungo hakobele mrithi wa keene mine ohetela imani. ⁸ Wa imani Iblahimu, kukishilwe kukitabowe obekya fashii yene wepata urithi kuhumine nanga omana kokyahe. ⁹ Yebele iwa imani yene imitile kashame esee ya ngwa hahe ikee hyi. koshamine indaa mahena hamwechi na Isaka na Yakobo, warithi benake wa urithi eya eya. ¹⁰ Weenene yolu kwaba ohemba oopataa mboka yene kemine kuubuni hamine kwaa yenga wake kwa bashama Abeca. ¹¹ Wa imani Sara kemine, kopashile uomaa wa oswala kumo kobel mmomu sana, wabiya komonine Abeca obaa mwaminifu, yene kalekane opata mwana. ¹² Wa bibyo eyaka indaa wa itu komwechi mine kobele alebu lubu kubushile bana bengi bashi na hesabo. ¹³ Babo bose bawile indaa imani, bashii bapokele ahadi babele babimonine na obiselela wa mbale, bakanine babele bakenyi na oheta yolu ya esee. ¹⁴ Weenene baya bale bakane binywa biya balebabeye hulolo baleoenga esee yabo bobene. ¹⁵ Wa kweli, nambo bangeleshana olanga esee yne bale bahume, bangeleshama na fashii ya okewela. ¹⁶ Hano, baleoenja esee yene yeeenju, yene ya hekolu. Wa bibyo Abea kushii omona abole ukitwa Abeca, wabo wa bibyo kaleobalongecha mboka yolu kyabo. ¹⁷ Wa imani Iblahimu kwatondwa uhunya Isaka kabe lutangi ke kwepokele eya ahadi kubele kuhunyinye mwanake. ¹⁸ Wene yolu yake kodokomwe, "indaa isaka luboto abee wikiswa." ¹⁹ Iblahimu komanine Abeca kobele na uosha ochulaa Isaka uhuma indaa lubu, hawa odokoma wafano kolepoke eyaka. ²⁰ Wa imani Isaka kwe baliki Yakobo na Esau olamana nabitu byechwa. ²¹ Wa imani yene Yakobo kobele alebu wuwa, kwe baliki kila komwechi banaa ba Yusufu. Yakobo kwa kutambekele wa seke mine lubango lwake. ²² Wa imani yene Yusufu mengo wake wa isula obele we olobo, kolesambe yolu ya uhuma wa bana baisilaeli mauda make. ²³ Musa, kubushilwe, balebapise wa mwechi ketatuna babushi bake yolu kobele inene eyaka mpenju, bashi batishwe ha mnano ya oloo. ²⁴ Wa imani Musa, kobele itu abisa, kohanyinye ukita mwana kwa mmachana Farao. ²⁵ hanyuma hake, kasokole oba na asoso hamwechi na batu ba Abeca hanyuma ya sasa yabobee wa etambo. ²⁶ Kolange abole aolama Kelesitu obaa itajili mmata ohet kesee ya ishili wa bibyo kwelole sana meso make indaa alambwe ya mengo mechwa. ²⁷ Wa imani yene Musa kuhumine mishili, kushi ogope asira ya oloo, wa bibyo weenene kwe vumiliye wa omona kushii moneye. ²⁸ wa Imani kuitile Pasaka, naoya ushunda mashii, koyamine kasohaka kashii baomebo. ²⁹ Wa imani wakyatile indaa bahole ya shamu nambo esee ya okoma, bamishili babenjile oheta bo nouchundwa. ³⁰ Wa imani ebambacha ya Yeliko ikwilee, yene yechungulwile masuku njwe. ³¹ Wa imani Rohabu koya sengo kushii hakilwe hamwechi na baya ba asi, yolu kolebapokele bapelezi wa talala. ³² na bene hakane eyaka eeh? maana mengo ushii uhuma oleta mwano wa Gideoni, na Baraka, na Samsoni, na Yefuta, na Daudi, na Samweli, na Mbuwa. ³³ Ohetela imani bashindile maolo, baitile keene, na bapatile biya basambilwe bachibele binywa bya tambwe, ³⁴ bachimya uoma wa ahyaa, bakwepile lupanga, bahanyenye uhuma bisumi, babele boomu ubita, baitile basolokoto babakenyi osena. ³⁵ Baochana bapokele uhuma obabu. Inji yepate asoso, bashii kitabolwe ushikwa halalo yolu bapate ochulwa wene we bibenju. ³⁶ Bange batondilwe wa oselelwa na biholo, naam ya ohambwe na obewa mehambo. ³⁷ Bahulilwe na mawe bakedilwe na sii bawile n lupangaa bakeele baleochwala ebambe ya moo na ya mbuchi bale obenja baendeleyo indaa lubaba na oba etela bobee. ³⁸ Yene lungo ishiibenjiche oba naboo, bachongo luwe chongolowe indaa ikala, na kono, indaa lupango na indaa bina ya etete. ³⁹ Na batu babo bose bakitabowe na Abeca yolu ya imani yabo, bashibapate yene Abeca kulesambe yolu kyabo. ⁴⁰ Abeca kuhiitile mbele otuhaa etu yele ebenju okeelelela, yolu ohetela beswe boo bashiibete.