¹ Wa bibyo m'peendo iyechuli chuli ya bitu bibenju byee chwa, bishibiya bye omoneya. M'peendo nango owecha obaeta baya baleoshenena Abeca wandela kya lutambi biya bya byene bibole bakyatile uhunya kila mwao kila mwana. ² Ao wabingebyo lutambi oboa bisabaosha uhiya isula uhuma? Batambikichi, nambo beba bahaha nyendo kimwechi, bashingeba na umana waokelelela wa bobee. ³ Indaa lutambi oboo hale oengelecha bobee bwenye buitiilwe mwaa wa mwaa. ⁴ Weenene bishii wechekana mashii ya mafahari na mambuchi uhunya bobee. ⁵ Mengo Kelesitu kuchuile ono alongo, kodokome, "mushi babenje lutambi, anyuma hake, molebabeye impeele yolu kyanyi. ⁶ Mushi babenje indaa lutambi wawose ya uchikya ao lutambi yolu ya bobee. ⁷ Nedokome, "Mona, ano heleoeta benye oleotaka Abea, nahe hekwa lilwe nene indaa etabo." ⁸ Kodokome nahe bile odokomwa haya hekolu. "Mushi babenje bitabekelo na bya otambekela, ya uchikya yolu ya bobee, osammona saso indaa wake" lutambi weene uhunyiwa olamana na m'peendo. ⁹ Kodokome, "mona, nehano oeta bine oleotaka" kubile mibamba uhunya ya etangi ya bobele ikimane. ¹⁰ Indaa oeta biya male bapate ohahachwa, wa uhunyiwa impeeli wa Yesu Kelesitu nyendo kimwechi wa mengo mose. ¹¹ Nakila ebole ukimana kila lusuku oeta sombela na uhunya lutambi biya biya nyendo nyingi, yenyeyesheasha abisa uhunya bobee. ¹² Hanyuma ya Kelesitu uhunya lutambi nyendo kimwechi yolu ya bobee milombo kyose, kweshame ooboo wolume wa Abeca. ¹³ Kole ohemba amango bake babewe osee haoeta etee yolu ya makolu make. ¹⁴ Weenene wa etambekelo emwechi kolebaete baya milombo bahahachwe na Abeca. ¹⁵ Hema kwa bohaha hake kule ushuhudiya wa weenene, hanyuma aodokoma, ¹⁶ ono malagano helakaha habo hanyuma hamasu kumama, kuleodokoma ilume, nebeya m'peendo wanyi ndaa mitema mwabo ndaa malanga mwabo ne kwala bibyo koleodokoma. ¹⁷ Bobee bwabo na uwasi wabo nishii engelecha eyaka abisa. ¹⁸ Hano fashii heete ushi eyaka uhunya bitambekelo byo byose yolu ya bobee. ¹⁹ Wa bibyo benanyi tole naoma wa ikengela fashii kyaba haha oetela mashi maYesu. ²⁰ Bibyo indela kolepukule yolu kyetu kyeya, kietee, ohetela indaa pashiya yani mpeele kwake. ²¹ Wa bibyo tulee na ebole mmata yolu kyando kya Abeca. ²² Tushenene wa itema kwa kweli ndaa obeya imani oba na itema kolechunjwa bohaha uhuma bobee wa dhamiri na mpeele kwetu koleohachwa wa madee make mahaha. ²³ Toeatelele sana ohokeya na oma wa tumini wetu, nango okaluwa, wa bibyo Abeca kolekane kweete. ²⁴ Natalalane beswe haobeyana itema indaa obenjana na kelo kobenju. ²⁵ Nango ushika osombela hahe bileoeta bange. Hanyuma hake, tubeana itema mwechi kwako mwechi okeelelela wa okeelelela, nambo molee omona lusuku lwealebu. ²⁶ Weenene hambo tueta bobee yolu hanyuma hake opokela omana kweli ashii eyaka etambekelo yolu ya bobee. ²⁷ Hanyuma hake, aleomba opata otelwa moebalu yene ishika amango Abeca. ²⁸ Kekese mine kwa anya m'peenndo kya Musa owa bila keene alebo ya bashuhuda babele ao batatu. ²⁹ Momona biye? Ishii epaswe biholo byene bile byata ukelelela watu koya mine kwa myiatele mwana kwa Abeca, kekese kolemete mashii ya malagano nambo itu ishii ya bohaha, mashii yene wabo kole baete ubaa Abeca kekese mine kwetuwe itena keene? ³⁰ Wa bibyo tuleomona komwechi min kwedokome, "kisosi eyanyi, helipa". Eyaka, "ilume kwebahola batu bake". ³¹ Iyetu ya utisha itu ukwita indaa maboo ma Abeca mine kwete. ³² Molange masuku maitilo hanyuma aobewa wenyu lwenge, wabibi etonayo moweche uvumiliya lubaba lwa bweko. ³³ Mobele mwabewa hululu indaa ziake ya bituano usumbuka, mobele halebu na mwechi na baya baitiile Asosa hambo eya. ³⁴ Weenene mobele na hema otongela wabo babele bahambwe, hamopokele wa saso abihuloya aurithi wenyu, moleomana benywe bene mobele na urithi obenju hawene wetee milomba. ³⁵ Wa bibyo mushitele omaa wenyu, ole na zawadi wataa. ³⁶ Weenene mushiiotaka uvumiliya, yolu mopokele byene Abeca kolebeye, hanyuma owa oeta bine kootako. ³⁷ Wa bibyo hanyuma ohe, komwechi mine koleochwa, kwechwa kweli kushii senga. ³⁸ Mine keene wanyi kweshamate wa imani. Nambo kukiwela unyuma, nishii mpenja ke. ³⁹ Beswe tushi hahe baya bakewele nyuma wa uchinda. Hanyuma hake, beswe inji ya baya tole na imani ya olonda mitema kyetu.