¹ Hene hatulile batu ubula hano ha sii na bawa misiha babushilwe wabali, ² baana na Abetcha babamonine bawa misiha ba batu uba mmahungwe; baliguhile baachibobose bene babalisobwele. ³ MLUME guganine, Mtima gwanyi gushihimana na mtu milumbu, bululi gee nage ii nyama; mndi masugu mage mabi myaa sambi na maumi mopi. ⁴ Nabo Banefili babele hano ha siimaya masugu, hanyuma na bibyo, baana ba Abetcha habagingile u bawa misiha gya batu, babushile nabo baana; babo noo babele batu bauoma haya halaa, batu ba punda chingi. ⁵ MLUME gumonine buube bwa batu m'bwingi mmibaloo na ugana ibalo yose yelihulanga mnda mtima gwage mmabee masugu mose. ⁶ MLUME gulibediche yulu guitile mtu hano hamgala, guchigililwe mnda mtima. ⁷ MLUME guganine, Nichima abisa mtu gwandibumbile hegulu ha sii; mtu na nyama, na byulibula na tunonyi twa ha hululu; bululi nalibecha ugana nimitile mtu. ⁸ Haho Noa guhelwe keene u meeso ma Abetcha. ⁹ Bino noo bibushi bya Noa. Noa gubele mtu gwina kiine, m'bwilile mnda bibushi byage; Noa gugile hamwechi na Abetcha. ¹⁰ Noa gubushile bawa lubaga batatu, Shemu, na Hamu, na Yafeti. ¹¹ Sii gidogile u meeso ma Abetcha, sii gigilule na umonenana. ¹² Abetcha aimonine ibaloo, na loola, yadoga; bululi gegese mine gwina m'bili gwalidogecha ndila gyage hano ha sii. ¹³ Abetcha gumsambile Noa, Isula ya mine gwina m'bili yahuhiya u mbele gyanyi; bululi bagilucha ibaloo na msapwe yungwe, bino nibadogya hamwechi na ibaloo. ¹⁴ Ulilongeche bwato bwa mti gwa msese; walingye na byumba mnda bwato, wabumbe mnda na hambuga na butongu. ¹⁵ Bibyo noo byolibuita; maboo sambi chitatu ulaha wa bwato, na maboo maumi matano mmahinda mwage, na maboo maumi matatu ugimana ugya hegulu hage. ¹⁶ Waite bwato uba na lwenge, na waunine hegulu hage nahi na uboo umwechi; wabiya na mchango gwa bwato mlubachu mwage; babiye na butato butatu, bwa butangi, na bwa bubili, na bwa butatu. ¹⁷ Na loola, nihila imbi ludi ya madi hegulu ha ibaloo, nadigye byose byine bili na mibili na luhuda lwa mwego, ishiba iyaka hasi ha gulu; yose ili mmibaloo yiwaa. ¹⁸ Bino niita malagano manyi noobe, mabe maomu; na gogwe wigingila mnda bwato, gowe na baana bobe na mmachobe, na baachi ba baana bobe. ¹⁹ Na yoyose yine ili na mwego yina m'bili, bilili bya mioga gyose wibigingicha mnda bwato, wibiya bibe na mwego hamwechi nobe; bibe mlume na ota. ²⁰ Na ata biya bilihuguluwa ulamana na mioga byabyo, na nyama chose ulamana na mioga gyacho, na byose bilihigandala hegulu ha ibaloo ulamana na mioga gyabyo, bibili bibili byichwa oli bululi ubibiye na mwego . ²¹ Waliguhile biliwa bya mioga gyose binaliwa, waongole , nayo ibi iliwa yenyu na yabo. ²² Noo byeliitile Noa, ulamana na biya bimsambile Abetcha, bibyo noo byeligilile.