¹ MLUME gumsambile Noa, Gingila gogwe na ibushi yobe yose mnda bwato; bululi nuumona gogwe uba mtu m'bwilile u meeso manyi mmino ibushi. ² U nyama chose cha chibenju waguhe njwii njwii, mlume na ota; na nyama chishi chisoga uguhe chibili chibili, mlume na ota. ³ Iyaka tunonyi twa ha hululu njwii njwii, mlume na ota; yulu ya ushiga mbuto byina bili na mwego mgino sii. ⁴ Bululi hanyuma ha masugu njwii nihila mbula ginye hegulu ha ibaloo yose, masugu maumi mana chuba na busugu; Na yoyose yine yina mwego yandibumbile hegulu ha sii niichiminya abisa. ⁵ Noa guitile nahi biya bimsambile MLUME. ⁶ Nage Noa gusibele mtu gwa myaa sambi mtuba haho hene hachwile imbi ludi hegulu ha sii. ⁷ Noa gugingile mnda bwato, gee, na baana bage, na mmachage, na baachi ba baana bage hamwechi nage; yulu ya madi ma imbi ludi. ⁸ Na nyama cha chisoga, na nyama chishi cha chisoga, na tunonyi, na byose bilihugandala hegulu sii. ⁹ bigingile mnda bwayo muli Noa, bibili bibili, mlume na ota, nahi biya bimsambile Abetcha. ¹⁰ Haho hanyuma ha mamo masugu njwii, Madi ma imbi ludi magilule hegulu ha ibaloo. ¹¹ Ha mwaa gwa sambi mtuba gwa mwego gwa Noa, mwechi gwa bulili, lusugu lwa umi na njwii lwa mwechi, luya lusugu misula gyose na mabenga mataa magilule wa uoma madilisha ma gulu mabuguwile. ¹² Mbula ginyene hegulu ha sii, masugu maumi mana chuba na busugu. ¹³ Lusugu loka luya Noa gugingile mnda bwato, gee, na Shemu na Hamu na Yafeti, baana ba Noa, na mmachi gwa Noa, na baachi ba baana bage hamwechi nage; ¹⁴ boo na nyama chose cha mgala ulamana na mioga gyacho, na nyama chose cha usugwa ulamana na mioga gyacho, na byose byugandala hegulu ha sii ulamana na mioga gyacho, na byose byuguluwa ha hululu ha ibaloo na tunonyi tose ulamana na mioga gyato. ¹⁵ Bigingile mnda bwatu muli Noa, bibili bibili, byose byine byina mibili, yina luhuda lwa mwego mnda mwayo. ¹⁶ Na byine bigingile bigingile mlume na ota bya mioga gyose gyina mibili, nahi biya bimsambile Abetcha; MLUME gummambile mchango. ¹⁷ Iya imbi ludi ibele masugu maumi mana hegulu ha ibaloo; namo madi magililile, masediche bwato, buselile hagulu ha ibaloo, ¹⁸ Madi maselile abisa, mabulile abisa hegulu ha sii, na buya bwato buselile abisa hegulu ha madi. ¹⁹ Maji mapashila uoma abisa abisa hegulu ha sii; na koono chose cha chilahu chine chibele hasi ha gulu chiuninywe. ²⁰ Madi mapashile uoma, na uunina koono alibu maboo umi na matano ²¹ Bawile bose bene bali na mibili balihugyata hegulu ha sii, na tunonyi, na nyama cha usugwa, na nyama chose cha mgala, na byose byugandala chine chili hugandala hegulu ha sii, na batu bose; ²² na byose byine byina luhuda lwa mtima lwa mwego mmihyembe mwagyo yonuuwa, yoyose yine ibele hegulu ha ibaloo. ²³ Yoyose yine yina mwego hegulu ha sii ichiminyiwe koo utula mtu na myama cha usugwa, na byugandala, na tunonyi twa ha hululu; bichiminyiwe koo na ibaloo, gushigele Noa kaa, na baya bali hamwechi nage nda bwato. ²⁴ Madi mashamine hegulu ha sii masugu sambi na maumi matano.