¹ Isilaeli gugile, hamwechi na byose byelibele nabyo, guhiile Beel-sheba, gushinjiche lutangi lwa Abetcha a sagi Isaka. ² Abetcha adogomine na Isilaeli u malo ma m'busugu, guganune, Yakobo, Yakobo. Gugaile, Nene guno. ³ Guganine, Nene noo Abetcha, Abetcha a sobe, nangu umona booba ugya Misili; bululi niuita ube mmoga gwata ubo. ⁴ Nene nigya nobe hamwechi mpaga Misili; na nene niugiwicha iyaka hashi adugwa; na Yusufu gwibiya uboo wage hegulu ha meeso mobe. ⁵ Yakobo guchuwile uhuma Beel-sheba; baana ba Isilaeli bamswalile sabo na baana babo ba bacho bacho, na baachi babo hegulu ha tubilibili tuya tuhilile Falao yulu ya umswala . ⁶ Baguhila na nyama chabo, na bitundu byabo byose byine byababele nabyo mnda sii gya Bakanaani, bahiile Misili, Yakobo na ibushi yage hamwechi nage. ⁷ Baana bage, na bedulu bage, hamwechi nage,misiha gyage na misiha gya baana babge, na ibushi yage yose, gulule nayo ndaa na Misili. ⁸ Mano noo machina ma baana ba Isilaeli bene bagingile Misili, Yakobo na baana bage; Leubeni, bubele bwa Yakobo, ⁹ Na baana ba Leubeni; Hanoki, na Palu, na Hesloni, na Kalmi. ¹⁰ Na baana ba Simeoni; Yemueli, na Yamini, na Ohadi, na Yakini, na Sohali, na Shauli, mwana gwa mmachana gwa Mkanaani. ¹¹ Na baana ba Lawi; Gelshoni, na Kohathi, na Melali. ¹² Na baana ba Yuda; Eli, na Onani, na Shela, na Pelesi, na Zela; mndi Eli na Onani bawile mnda sii gya Bakanaani. Na baana ba Pelesi, ii Hesloni,, na Hamuli. ¹³ Na baaba ba Isakali; Yola, na Puva, na Yashubu, na Shimloni. ¹⁴ Na baana ba Zabuloni; Seledi, na Eloni, na Yaleeli. ¹⁵ babo noo baana ba Leya, belim'butile Yakobo uya Padan-alamu, na Dina, msiha gwage, Bichuli-chuli byoe bya mwego bya bawalubaga na bawamisiha gyage babele maumi matatu na batatu. ¹⁶ Na baana ba Gadi; Sefoni, na Hagi, na Shuni, na Esboni, na Eli, na Alodi, na Aleli. ¹⁷ Na baana ba Asheli; Imna, na Ishva, na Ishvi, na Belia, na Sela, kachabo. Na baana ba Belia noo Hebeli, na Malkieli. ¹⁸ Babo noo baana ba Zilpa, mine Labani gwelihele Leya, msiha gwage, nage gum'butile Yakobo bibyo bichuli-chuli umi na mtuba. ¹⁹ Baana ba Laeli, mmachi gwa Yakobo noo Yusufu na Benjamini. ²⁰ Uya mnda sii gya Misili Yusufu gubushile, Manase na Eflahimu, Asenathi msiha gwa Potifala belim'butile Yusufu, ibuli ya Oni. ²¹ Na baana ba Benjamini; Bela, na Bekeli, na Ashbeli, na Gela, na Naamani, na Ehi, na Loshi, na Mupimu, na Hupimu, na Aldi. ²² Babo noo baana ba Laeli, belibutile Yakobo, bichuli-chuli- bya mwego umi na bana. ²³ Na baana ba Dani; Hushimu. ²⁴ Na baana ba Naftali; Yaseeli, na Guni, na Yaseli, na Shilemu. ²⁵ Na babo noo baana ba Bilha, mine Labani gwelihele Laeli, msiha gwage, nage gum'bitile Yakobo bibyo; bichuli-chuli bya mwego bibele njwii. ²⁶ Bichuli-chuli bya mwego bichile hamwechi na Yakobo ndaa na Misili bihumine mlubunda lwage, nangu na baachi ba baana ba Yakobo, bichuli-chuli byose bibele maumi mtuba na mtuba. ²⁷ Na nbaana ba Yusufu belibutile uya Misili bibele bichuli-chuli bya mwego byopi. Bichuli-chuli byose bya mwego byine bingile Misili bibele maumi njwii. ²⁸ Yakobo gummilele Yuda uli Yusufu lutangi, yulu gamlombwele ndila gya ugya Gosheni. Bahiile ibalo ya Gosheni. ²⁹ Yusufu gugandile abilibili age, gugile umgaa Isilaeli, sage, uya Gosheni; gulimoninywe weli, gumgwilile mioshi mwa Isilaeli, gulile mioshi mwage ihindi ilaila. ³⁰ Isilaeli gumsambile Yusufu, Bino nabewa hano, bululi naumona yenyi yobe, ugana wili na mwego. ³¹ Yusufu gusambile bashiwabo na batu ba mndu gya sage, Nigya umsambila Falao mwano; niimsambila, Bashiwetu na batu ba mndu gya tata, bene babele mnda ibalo ya Bakanaani bahunjwila. ³² Na babo batu m'basugi, bululi basushama batu ba uusa nyama, nabo bachwa na miyoo gyabo na ng'ombe chabo na byose byabali nabyo. ³³ Byahabi Falao helimgita, na um'bucha mgilo bwenyu iyii? ³⁴ Mwagane, Bacha bobe tuli baushi ba nyama utula buwalubaga bwetu, na ata lino, beswe, na setu; haho noo hamwihewa ibalo ya Gosheni; bululi gegese bwa uusa nyama ii byuchigilicha u Bamisili.