¹ Haho Yusufu gushioshiche ulichibila u mbele wa bose bene babele bagimanyu alibu nage. Wa lidi mbila, guganine, Bahunyiwe batu boseu meeso manyi. Na hashigimene mtu hamwechi nage, Yusufu helilimaninye u bashiwabo. ² Wa lidi lyage lyata nuulila, nabo Bamisili boo nuhulicha. Batu ba mndu gya Falao nabo nuhulicha. ³ Yusufu gusambile bashiwabo, Nene noo Yusufu; tata gwili na mwego ka? Ata bashiwabo bashioshiche umgaa, bululi bagingilwe na iduba u mbele wage. ⁴ Yusufu gusambile bashiwabo, Alibu wanyi; haho bahiile wage. Guganine, Nene noo Yusufu mshiwenyu, mine gwamugudiche ugya Misili. ⁵ Haho bino, mushuchigililwe, na nangu uuziki m'bichuli-chuli byenyu bya mwego, yulu ya uungucha uno; Abetcha apilile uba hambele henyu yulu ya ubisa mwego gwa batu. ⁶ Bululi myaa gino gibili ndala gisili mnda ibaloo, nahaliiyaka myaa gitano gishi gya ulima na usola. ⁷ Abetcha apilike hambele henyu yulu ya um'bisila byushigala mnda ibalo, na uumogononya benywe wa uhugonona wata. ⁸ Bino bashi benywe mupilile uno, ii Abetcha ka; nage gwambiya nahi sege gwa Falao, na nahi mlume mnda ndu gyage gyose, na mmyilichi mnda ibaloo yose ya Misili. ⁹ Iswe abilo abisa ugya uli tata, mugye umsambila, Bino noo bilihudogoma mwanobe Yusufu, Abetcha ambiya uba mlume mnda ibaloo yose ya Misili, hano hoka uchwe na ushisinge. ¹⁰ Gogwe wishama mnda ibalo ya Gosheni, ubi hoka nanyi, gogwe na baana bobe, na bedulu bobe, na nyama chobe, ng'ombe chobe, na byose byoli nabyo. Na nene niulisha uya; ¹¹ bululi gyili gishigachi myaa gitano gya ndala; ushichwe uba mtu gwa usaba, gogwe, na ndu gyobe, na byose byoli nabyo. ¹² Na loola, meeso menyu malihumona na meeso ma mnunanyi Benjamini , ugana iyi anywa anyi nene noo alihudogoma nenyu. ¹³ Na benywe mwimsambila tata mwano gwanyi na ugengeda wanyi ose mnda ibaloo ya Misili, na wa byose byine byamwamona; mwite abila uchwa na tata uno. ¹⁴ Gumgwilile mnunage Benjamini, mioshi nuulila; Benjamini nage nuulila mioshi mwa mmulwage. ¹⁵ Gubaumbatile bashiwabo bose, gulile nabo, hanyuma ha bibyo, bashiwabo bagombole nage. ¹⁶ Mwano guhulichiwa u ndu gya Falao ugana, Bashiwabo na Yusufu bachwa. Bibele bisoga u meeso ma Falao, na u meeso ma bacha bage. ¹⁷ Falao gumsambile Yusufu, Ubasambile bashiwenyu, Muite bino; muswiye nyama chenyu michigo, bachuwe bagya ibaloo ya Bakanaani; ¹⁸ hanyuma mwamguhe senyu, na batu bose ba mmadu menyu, mwachwe, Nene nimma busoga bwa ibaloo ya Misili, na benywe wiya manona ma ibaloo. ¹⁹ Na benywe mwasambilwa, gilwe bino, muguhe tubilibili mnda sii gya Misili yulu ya baana benyu ba bacho bacho na baachi benyu, mumguhe senyu muchwe. ²⁰ Na mushibilochi bidagulanywa byenyu, bululi busoga bwa ibalo ya Misili ii bwenyu. ²¹ Noo byabagili baana ba Isilaeli. Yusufu gubahele tubilibili nahi biganine Falao, gubahele na pamba gya mndila. ²² Gubahele bose bichwalaganywa bya ugalula mndila; haho Yusufu gummele Benjamini bumona sambi chitatuna bichwalaganywa bitano bya ugalula. ²³ Na sage gummilile nahi bino;punda umi chiswalile busoga bwa Misili, na punda cha maota umi chiswalile biliwa, na mikati, na biliwa bwa sage byabuya mndila. ²⁴ Gulagene na bashiwabo, boo nugya, nage gubasambile, Mushigumane mndila. ²⁵ Bachuwile uhuma Misili, boo nuuhiya Kanaani wa Yakobo, sabo. ²⁶ Bammele Yakobo mwano, baganine, Yusufu gwili poo; nage noo gulihihyililaibalo yose ya Misili. Mtima gwa Yakobo gushiminye umana, bululi bushi bagitabidiche. ²⁷ Bamsambile binywa byose bya Yusufu, byelibasambile; na helimonime tubilibili twelihilile Yusufu, yulu ya uuswala, mtima gwa Yakobo guchuwile uhuma usinda. ²⁸ Isilaeli guganine, Byawilila! Yusufu mwananyi gwili na mwego; nigya, nammone hambele ha nene uwa.