¹ Gumsambile guya mgimaninyi gwa ndu gyage guganine, Ugiluche bitanga bya bano batu na biliwa ulamana na uosha wa uswala wabo, wabiye na bumona umilimo gwa itanga ya mtu gegese. ² Na isengo yanyi, isengo iya ya lufeza, waibiye u anywa a itanga ya guya mnuna batu hamwechi na bumona na biliwa gyage. Guitile nahi biya bimsambile Yusufu. ³ Halwelo habuyele, babo batu bahelwe luhusa, boo na punda chabo. ⁴ Na habatoboile mmbuga, na bashi nagya koo, Yusufu gusambile guya mgimenyi gwa ndu gyage, Chuwa, ubalame baya batu, na gogwe holibabanga, ubasambile, Yulu yai mwagiwiche buube u busoga? ⁵ Wi wii! Ino isengo ishi iya yine isumwina mlumyanyi? Nage busubuwa na iyo. Mwagila bisone wa ugila bibyo. ⁶ Gubalamine, gubabangile, naubasambila biya binywa. ⁷ Bamsambile, Yulu yai mlumyanyi udogoma binywa nahi bino? ⁸ Nangu! Bacha bobe bashinagila bino; loola, buya bumona bwamumonine utunywa twa bitanga byetu, tuuhele boo iyaka uhuma nabo u giya sii gya Bakanaani. Tunaosha wi ugiba nda ndu gya mlumyobe bumona na nolo? ⁹ Gwimoneya uba nayo hawingi ha bacha bobe, na gawe, na beswe nabo tubi bacha ba mlumyanyi. ¹⁰ Mgimenyi guganine, Mndi na bibe bibyo nahi bwamwagana, Mtu gwimoneya uba nayo gubi mcha gwanyi, na benywe mubi mushi na abachi. ¹¹ Baitile abilo, basadiche bose bitanga byabo, na bose usula bitanga byabo. ¹² Nage guengile, gutulile uli mmosobu ndaa na uli mnuna batu. Isengo imoneye mmitanga ya Benjamini. ¹³ Bagulile bichwalaganywa byabo, babiile kila mtu mchigo gwage hegulu ha punda gyage, bagiwile umbuga. ¹⁴ Yuda na bashiwabo bahiile undu gya Yusufu. Nage Yusufu gubele mo mndu, nabo bamgwilile mmachwi. ¹⁵ Yusufu gubasambile, Ino iyihisho nai yamwapisha? Mushigidu ugana mtu nahi nene ninaosha ubuwa? ¹⁶ Yuda gugaile, Tumsambile ii mlumyanyi? Tuganewi! Tulihe wi kiine? Abetcha amona buube bwa bacha bobe. Loola, beswe tuli bacha ba mlumyanyi, beswe na guya mine gwamoneya ma isengo mmuboo wage. ¹⁷ Yusufu guganine, Nangu! Nishigila bibyo; mtu guya minne isengo yamoneya mmuboo wage, noo gubo mcha gwanyi. Na benywe muligile wa talala uli senyu. ¹⁸ Haho Yuda gumshenene,guganine, Ibumbu ino, mlumyanyi, mcha gobe gadogome inya imwechi mmatu ma mlumyanyi, na sungu chobe chishimlamine mcha gobe, yulu gogwe uli nahi Falao. ¹⁹ Gogwe, mlumyanyi, utubudiche beswe bacha bobe,uganine, Wi wii! Mwina senyu, na mnunenyu? ²⁰ Tuusambile, gogwe, mlumyanyi, Tuli nage setu, nage gusili mmosu, na mwaana gwa buungu bwage gwili mcho mcho, na mulwage guwile; gwahishigala gee buchimamnda gumo lya mnage, na sage gulihummunda abisa. ²¹ Utusambile beswe bacha bobe, mnunenyu muchwe nage wandi yulu meeso manyi mammone. ²² Tuusambile,mlumyetu, mmwalubaga gushinaosha ushiga sage,yulu gabemshiga sage, sage gwiiwa. ²³ Utusambile bacha bobe, Gusahuchwa mnunenyu hamwechi nanyu, mushimona yenyi yanyi iyaka. ²⁴ bibyi hatugile uli mcha gobe, setu, tumsambile binywa byobe, mlumyanyi. ²⁵ haho setu gutusambile, Guwilwe uya mutugulile biliwa bicho. ²⁶ Tuganine, Tushinagya; mnunetu gwahuba hamwechi netu, twigya, bululi tushiosha umona yenyi ya guya mtu, nambo mnunenyu gusahuba hamwechi netu. ²⁷ Mcha bobe, tata,gutusambile, Mugidi ugana mmachanyi gumbitile mwana gwa bubuili; ²⁸ Gumwe guhumine mandi, biganine, Nishi na adugwa guhagilwe, na nishimmonine iyaka utla haho. ²⁹ Na m'benguha guno nage, na gabebangwa na usona, mwisacha mbwii chanyi na asusu ndaa na usinda. ³⁰ Nambo nabegya uli mcha gobe, tata, na gugo mmwalubaga gushi hamechi netu, ugana mtima gwage guli guumbatilane hamwechi na mtima gwa mmwalubaga. ³¹ haho helimona ugana guya mmwalubaga gushiho, gwiwa; na beswe bacha bobe twisacha mbwii cha mcha gobe, setu, wa uchigililwa msinda. ³² Bululi nene mcha gobe nibiile ha ihana ya gugo mmwalubaga uli tata, niganine, Nisahumgiwicha oli, nibi na abachi uli tata masugu mose. ³³ haho, bino, nilihuutendelela, umbiye nene mcha gobe nashame, na ihana ya gugo mmwalubaga uba mcha gwa mlumyanyi; na gugu mmwalubaga gagye hamwechi na bashiwabo. ³⁴ Bululi, niusha wii ugyauli tata, na guno mmwalubaga gushiho hamwechi nanyi? Nashichwe umona buube bwine bwim'banga tata.