¹ Ndala gibele giingi mnda ibaloo. ² Haho habahwile uya biya biliwa byabaleshile uhuma Misili, sabo gubasambile, Giwilwe iyaka uya mtugulile biliwa ata bichoo. ³ Yuda gumsambile guganine, Guya mtu gutulagile abisa guganine, Mushimona yenyi yanyi nambo guya mnunenyu gusahuba hamwechi nenyu. ⁴ Ubemmila mnunetu hamwechi neyu, twigya na uugulila biliwa. ⁵ Nambo usahummila, tushigya, bululiguya mtu gutusambile, Mushimona yenyi yanyi mnunenyu gusahuba hamwechi nenyu. ⁶ Isilaeli guganine, yulu yai mwangile bisone na uhiya uusambila guya mtu ugana mwina gunge mnunenyu? ⁷ Baganine, guya mtu gutubudiche abisa mwano gwetu na gwa ibushi yetu, guganine, Senyu gwili na mwego? Mwina gunge mnunenyu? Na beswe tumgaile ulamana na ubucha wage. Wi wii! Tumanine ugana gwigana, Mwachwe na mnunenyu? ⁸ Yuda gumsambile sage Isilaeli, Ummile mmwalubaga hamwechi nayi, tuchuwe, tuligile, yulu tube na mwego, na tushiwe, beswe na gogwe na baana betu. ⁹ Nene nibi pahali page, wamsabe mmaboo manyi. Nisahumgiwicha iyaka oli, na um'biya mmaboo mobe,hahu nibi na abachi oli milumbu; ¹⁰ bululi nambo tusabasinga, chigilwe twisoba twahugiwila lwendo lwa bubili. ¹¹ Sabo Isilaeli, gubasambile,Nambo noo bibyo, iswe bino, guhwe mmaso gwa ino ibaloo mnda tuhwaba twenyu, mumswalile guya mtu gugo mmaso, butongu bucho bwa uhahacha noli (zeli), na bui bocho, buswenge, na malashina na bitu byopi bya mmoga gumwechi na migimba. ¹² Muguhe bumona nyendo chopi mmaboo menyu, na buya bumona bwine bubiilwe mtunywa twa ngamiya chenyu bugiwichiwe mmaboo menyu; hange bugibililwe. ¹³ Mumguhe mnunenyu, muchuwe na mugye uliguya mtu. ¹⁴ Abetcha Dambe na amme uleelelwa u meeso ma guya mtu yulu gamsulile guya gunge mshiwenyu, na Benjamini, Nene nabiwilwa na baana banyi, nawilwa. ¹⁵ Haho babo batu baguhile guya mmasobaguhile na bumona nyndo chopi mmaboo mabo, na Benjamini; bachuwile na bagile ndaa na Misili, bagimene umbele wa Yusufu. ¹⁶ Nage Yusufu helimmonine Banjamini hamwechi nabo, gumsambile mgimaninyi gwa ndu gyage, ubagingiche bano batu mndu, ushinje, na uhiya yulu bano batu biya hamwechi nanyi gino kunyiya meno. ¹⁷ Guya mtu gugilile nahi biya bimsambile Yusufu, Nage gubahyiche babo batu mndu gya Yusufu. ¹⁸ Haho babo batu bamonine booba bululi bahiichiwa mndu gya Yusufu, baganine, Yulu ya buya bomona bwine bugiwichiwe mnda bitanga byetu lwendo lwa lutangi twahuhiichiwa mno, bululi gatushitaki, gatuguhe, gatuguhe tube bacha bage na punda chetu. ¹⁹ Bahyile uli guya mgimaninyi gwa ndu gya Yusufu, badogonine nage ha mchango gwa ndu. ²⁰ Bamsambile, Loola, mlume, tuchwile lwendo lutangi yulu tugule biliwa. ²¹ Mengo, matuhyile undu gya bagenyi, tususile bitanga byetu, mndi! bumona bwa mtu gegese buli mnda bitanga, bumona nahi bya bubele bose; bibyo na beswe twachwa nabo mmabo metu. ²² Na beswe twachwa na bunge bumona mmaboo metuyulu tugule biliwa; tushimanine ii nanyi gubiile bumona mnda bitanga byetu. ²³ Gubasambile, Talala, gibe wa mli,mishimone booba, Abetcha enyu, nao noo Abetcha a senyu, gummele lindo mnda bitanga byenyu; bumona bwenyu bumgiwilile. Hanyuma gubahele Simeoni. ²⁴ Guya mtu gubahyiche mndu mwa Yusufu, gubahele madi, baligogile magulu, guhele punda chabo biliwa. ²⁵ Babiile alibu guya mmaso mpage bihiila Yusufu ha kunyiya meno, bululi bahuliche ugana biya biliwa uya. ²⁶ Halihiile Yusufu mndu mwage, bammele guya mihaso gyine bibele mmaboo mabo mnda ndu gyage, bamginamine moaga hasi. ²⁷ Gubabudiche mwano gwa mwego gwabo, guganine, Wi wii! Senyu guya gwamuganine, guli poo? Gwili na mwego? ²⁸ Baganine, Mcha gobe setu guli poo, gwili na mwego; baginamine, babungile machwii. ²⁹ Yusufu guginunine meeso mage, gumonine Benjamini mnunage, mwaana gwa mnage, guganine, Guno noo mnunenyu gwamusambile mwano gwage? Gumganine Abetcha amonye yano yage oli, mwananyi. ³⁰ Yusufu guitile abilo, bululi mtima gwage gummonene keene mnunage, guengile ihana ya ulilila, gugingile myumba yage gee nuulila mmo. ³¹ Gunawile yenyi, gutobowile, gulichibile, guganinwe, Leswe iliwa. ³² Bambiile iliwa gee buchima, na baya boo buchima, na baya Bamisili bene basuya hamwechi nage boo buchima; bululi Bamisili bashinaya hamwechi na Baeblaniya, yulu m'bisone u Bamisili. ³³ Bashamine umbele wage, m'buswa gwa mtangi ha ihana ya bubuswa bwa butangi, na mnuna batu ha bununa batu bwage,babo batu bagagilwe boo wa boo. ³⁴ Bahililwe ibaa ya iliwa uhuma u bulilo bwa Yusufu, haho gugiluche ibaa ingi ya Binjamini ibe myendo chitano uli bange. Banywine, Baseelele hamwechi nage.