¹ Bino Yakobo gumonine ugana Misili uli biliwa, Yakobo gusambile baana bage, Yulu yai muli hulingamine? ² Guganine, Loolwe, nahulicha ugana Misili uli biliwa; salwe, mugye utugulila biliwa, bululi tube na mwego na tushiwe. Bibyo bashiwabo na Yusufu umi basalile Misili yulu bagule biliwa. ⁴ Haho, Benjamini mmunage na Yuusufu, Yakobo gushimmilile hamwechi na bashiwabo, Nilihumona booba bisone binaba weli. ⁵ Baana ba Isilaeli bachwile ugula biliwa mmanga gwabo bachwile, buluili ubele ndalamnda sii gya Bakanaani. ⁶ Nage Yusufu gubele na isuba ya ulola sii, gee noo gubele hubagusha batu bose ba ibaloo. Nabo bashiwabo na Yusufu bachwile, baginamine umbele gyage ndaa na hasi, ⁷ Yusufu gubamonine bashiwabo, gubasungule, haho gulibiile nahi mgenyi wabali. Gudogomine nabo wa binywa bya buhuchi, gubasambile, Benywe mwahuma uhi? Baganine, Twahuma mnda sii gya Bakanaani, yulu tugule biliwa. ⁸ Yusufu gubasungule bashiwabo, bibyo boo bashimsungule gee. ⁹ Yusufu guengeleche malo melibalotele. Gubasambile, Benywe muli Badinji, mwachwa yulu ya umona bulema bwa ibaloo. ¹⁰ Bamsambile, Nangu, mlume, bacha bobe twachwa ugula biliwa. ¹¹ Beswe bose tuli baana ba mtu gumwechi tuli batu ba kiine, beswe; bacha bobe tushi badinji. ¹² Gubasambile, Bishi bibyo, mwachwa umona bulema bwa ibaloo. Bamsambile, bacha bobe tuli babuswa umi na bopi, baana ba mtu gumwechi mnda sii gya Bakanaani; na mnunetu guli hamwechi na setu lino; na gunge gumwechi gushiho. ¹⁴ Yusufu gubasambile, Bibyo noo yulu namsambila muli badinji. ¹⁵ Mwitonjwa wa gino ndila; bili Falao na mwego, mushihuma hano, gusahuchwa guya mnunenyu. Muhile gumwe gwenyu, gagye uguha guya mnunenyu, na benywe mwihambwa, ata na byisungulwa binywa byenyu, nambo muli na kiine benywe; nambo bishi byo, bili Falao na mwego, benywe muli badinji. ¹⁷ Gubabiile bose m'bulogo masugu matatu. ¹⁸ Yusufu gubasambile lusugu lwa matatu, Iswe bino, m'be na mwego,bululi nene nilihumsina Abetcha . ¹⁹ Nambo muli na chigilwe mshiwenyu gumwechi gahambwe m'bulogo, na benywe mugye uguha biliwa ulamana na ndala gya madu menyu. ²⁰ muchwe na mnunenyu wandi; bibyo binywa byenyu byibangisiwa, na mushihagwa. Noo byabagilile. ²¹ Baganinane, Winene beswe tumlibile mshiwetu, bululi tumonine asusu a mtima gwage, helitutendelele, na tushimmuliche wa bibyo asusu ano ahutubanga. ²² Leubani gugaile, gubasambile, Nishimsambile, niganine, mushimgilile bisone mmwalubaga? Ata bibyo mushihuliche; wa bibyo mashi mage malihusabwa iyaka. ²³ Ata bibyo bashimanine ugana Yusufu gulihubahulicha, bululi habele na mtu guugalula madihawingi habo. ²⁴ Gulibagule nabo nuulila. Hanyuma gubagiwilile, na udogoma nabo, gum'bwatile Simeoni ha mmanga gwabo, gummambile u meeso mabo. ²⁵ Yusufu guganine babigiluche biliwa m'bitanga byabo, na umgiwidiche mtu gegese bumona bwage mnda itanga yage, na ubaha pamba gya mndila. ²⁶ Bibyo noo byabagililwe. Babiile biliwa byabo hegulu ha punda chabo, bagile uya, ²⁷ Gumwe gwabo gusulile itanga yage yulu gahe punda gyage iliwa mnda ndu gya bagenyi, gumonine bomona bwage mndi! Buli umlomo gya itanga yage. ²⁸ Gubasambile bashiwabo, Bumona bwanyi bwagiwichiwa, loolwe, buli mo mnda itanga yanyi. Mitima gyabo gichiminye malanga, bagalwilane balihudanda,baganine, Iyii ino yatugila Abetcha? ²⁹ Bahiile uli Yakobo, sabo, mnda sii gya Bakanaani, bammele mwano gya byose byine bigililwe wabali, baganine, ³⁰ Guya mtu guli mlume gwa giya sii gudogomine netu binywa bya buhuchi, gutuganine tuli badinji ba sii. ³¹ Tumsambile, Tuli batu ba winene beswe, tushi badinji. ³² Beswe tuli babuswa umi na bopibaana ba setu gumwechi.Gumwechi gushiho, na mnunetu guli hamwechi na setu lino mnda sii gya Bakanaani. ³³ Guya mtu, mmulu gwa ibaloo, gutusambile, Wa gino ndila niimana ugana benywe muli batu ba chigilwe; mshiwenyu gumwe gomwechi chimshigwe uno wandi, mugye uguha biliwa ulamana na ndala gya madu menyu, ligilwe. ³⁴ Munjwilile na mnunenyu; haho noo handimana ugane benywe mushi badinji, ugana muli batu ba winene; haho nimgiwidicha mshiwenyu, na benywe mwigila bya ugalulanya mnda ino ibaloo. ³⁵ Hababele huhongolola bitanga byabo, mndi! Tuhwaba twa bumona bwa gegese tuli mnda itanga yage. Nabo habatumonine tuhwaba twa bumona bwabo, boo na sabo bamwene booba. ³⁶ Sabo Yakobo gugasambile, Mwahupanana baana babyi; Yusufu gushiho, na Simeoni nage gushiho, na Banjamini mulihubenje umguha nage; bihisho bobyo byose byandemena nene. ³⁷ Leubani gumsambile sage, guganine, Wabahage baana banyi babili nambo nishimgiwicha oli; Upe gee mmaboo manyi, nene nimgiwicha oli. ³⁸ Yakobo guganine, Mwananyi gushigya hamwechi nenyu, yulu mmulwage guwile, nage gwahushigala gee buchima; buube bwahum'banga mnda ndila gyamwigilila haho noo hamwisacha mbwii chanyi ndaa na usinda.