¹ Habele hanyuma ha myaa gyose gibili,Falao guloshile malo; na loola, gulimgimanyu ham'bega gwa ludi. ² Na loola, ng'omgo njwii chisoga chinonyu, chidabuwile uhuma mludi, bibele huya byanyi. ³ Na loola chinge ng'ombe njwii chilihudabuwa hanyuma mludi, cha chisone, chigonju, chigimene hoka na chiya ng'ombe u m'bega gwa ludi. ⁴ Hanyuma chiya ng'ombe chisone cha chigonju chilile chiya njwii cha chisoga, chinonyu. Haho Falao nuubyuwa. ⁵ Genulala, guloshile malo lwendo lwa bubili. Loola, mihunga njwii gimenine u belee limwechi, chata, na chisoga. ⁶ Na loola, mihunga njwii gigonju, gigumiwe na mnaga gwa mlugulu, gimenine hanyuma hagyo. ⁷ Hanyuma gigyo mihunga gya gigonju njwii gilile giya mihunga njwii gya gyata gyagigiluchu. Haho Falao gubyuwile mndi m malo ka. ⁸ Ata halwelo mtima gwage gushibele na saso; guhilile batu uongola bagabo bose ba Misili, Na batu bose bene bali na lwengo wine wabali. Falao gubalangulile malo mage, na hashibele guoshiche usambila Falao bibyo bihisho. ⁹ Haho mmulu gwa bumnywisha gumsambile Falao guganine, Naengelecha buube byanyi lino. ¹⁰ Falao guchililwe yulu ya bacha bage, gumbiile nahambwe mnda ndu gya mmulu gwa basolokoto, nene na mmulu gwa bahii. ¹¹ Tuloshile malo busugu bumwechi nene na gee gumwechi gumwechi na ulangulilwa malo mage tumonine. ¹² Na uya tubele na gumwe mmwalubaga; Mmeblaniya, mgichi gwa mmulu gwa basolokoto, tumsambile, nage gutulangulile malo; gumlangulile kila mtu ulamana na malo mage. ¹³ Biya, nahi byeli tulangulile noo byabigiliye; nene nigiwichiwe mnda mgilo gwanyi, nage gusundiwe. ¹⁴ Bibyo Falao guhilile batu umgita Yusufu, bamleshile abilo uhuma mnda bulogo. Gubegile njuli, gugalule bichwalaganywa byage, na ugingila wa Falao. ¹⁵ Falao gumsambile Yusufu, namona malo, na hashi gulihuosha uchilangula; na nene nahulicha mwano gobe, ugana, ubehulicha malo unaosha umalangula. ¹⁶ Yusufu gumgaile Falao, guganine, gushi nene; Abetcha gwimgaa Falao binywa bya talala. ¹⁷ Falao gumsambile Yusufu, Mnda malo manyi nibele mgimanyu u m'bega gwa ludi. ¹⁸ na loola, ng'ombe njwii chili hudabuwa mludi, chinonyu,chisoga,chilihuya byanyi. ¹⁹ Hanyuma, noo ulola, chinge ng'ombe chidabuwile hanyuma hacho, chilema, chisone abisa, chigunju; mnda sii gyose gya Misili nishinamona chinge cha chilema biya. ²⁰ Na chiya ng'ombe cha chigonju, chisone,chilile chiya ng'mbe njwii cha chitangi, cha chinonyu. ²¹ Na hachihwile uchiya hashimanyiye ugana chachiya, mndi chimoneye chisone na haya hatangi, Haho nene nuubyuwa. ²² Hanyuma nimonine mnda mange malo manyi, na loola, mihunga njwii gimenine u belee limwechi, gusoga na gya gugiluchu. ²³ Na loola, mihunga njwii gya gigonju, bihuhu, byabigumu na mnaga gwa mlugulu, gimenine hanyuma hagyo, ²⁴ Na giya mihunga gya bihuhu giminine giya mihunga gya gisoga, Na nene nibasambile baya bagabo, na hashimoneye gunaosha unangulila mo. ²⁵ Yusufu gumsambile Falao, Malo mose ma Falao ii mamwechi, Abetcha aammonya Falao byeligila hano hoka. ²⁶ Chiya ng'ombe njwii cha chisoga ii myaa njwii, na chiya mihunga njwii gya gisoga ii myaa njwii, Malo ii mamwechi. ²⁷ Na chiya ng'ombe njwii, cha chilema, chidabuwile hanyuma hacho ii myaa njwii; na giya mihunga, njwii gya bihuhu gina gigumiwe na mnaga gwa mlugulu, gibi myaa njwii gya mdala. ²⁸ Bibyo noo byandisambile Falao, ugana Abetcha gwammonya Falao byeigila hano hoka. ²⁹ Loola myaa njwii gya buswi gilihuchwa mnda sii gyose gya Misili. ³⁰ Hanyuma hichwa myaa njwii gya ndala hanyuma hagyo; na buswi bubo bose bwigibililwa mnda sii gya Misili, na ndala gyidigya sii. ³¹ Na buya buswi bushimaniya mnda sii yulu ya ndala gyine gilihucha hanu hoka, bululi gibi bushito abisa. ³² Na malo ma Falao biya byamebele nyendo chopi, ii yulu Abetcha aimonya uba ya chigilwe, na Abetcha iihwicha hano hoka. ³³ Bino, Falao mndi gaenge mtu guli na lwenyi na lwengu gam'biye hegulu ha sii gya Misili. ³⁴ Falao na gagile bino, iyaka na gabiye batu ba ugimanina hegulu ha sii, babe huguha ibaa ya bitano mnda ibaloo yose ya Misili, mnda gino myaa gya buswi. ³⁵ Na baongole biliwa byose bya gino myaa njwii gya gisoga gyichwa, baabiye poombo gya biliwa mmaboo ma Falao babibiye bibe biliwa mmabuga mose. ³⁶ Na bibyo biliwa byabe pomboo yulu ya sii, wa yulu ya giya myaa njwii gya ndala, gyine gibi mnda sii gya Misili, ibaloo ishidoge yulu ya ndala. ³⁷ Iyo inywa ibele isoga u meeso ma Falao, na umeeso ma bacha bage bose. ³⁸ Falao gusambile bacha bage, twimona uhi mtu nahi guno, mine gwina mtima gwa Abetcha mnda mwage? ³⁹ Falao gumsambile Yusufu, Bululi Abetcha uununina bibyo byose, hashi gunge gwina lwenyi na lwengu nahi gogwe. ⁴⁰ Bino, gogwe ubi mlochi gwa ndu gyanyi, na wa yulu ya inywa yobe batu banyi bihyililwa. Haya ha iti yanyi ya bwata noo hambi mmela uhima gogwe. ⁴¹ Falao gumsambile Yusufu, Loola, nuubiya hegulu ha sii gyanyi gyose gya Misili. ⁴² Falao guchulile lupete lwage lwa yaala mmuboo wage, nuuchiya Yusufu mmuboo; gumchwiiche na bichwalaganywa alili abenju, na uuchwiya ihogo ya nolo mioshi mwage, ⁴³ Gumchininye hegulu ha abilibili age a bubili elibele nao. Na batu batele bigelegele umbele wage. Bungwe machwi.Bibyo gubiilwe hegulu ha sii gyose gya Misili. ⁴⁴ Falao gumsambile Yusufu, Nene noo Falao, na nambo hashi inywa yobe, mtu gegese gashiginune uboo ata ugulu mnda ibaloo yose ya Misili. ⁴⁵ Falao gumgitile Yusufu, Sefenath-panea; nuugondela Asenathi msiha gwa Potifela, ibuli ya Oni, uba mmachage, Yusufu gugile ubo na uya mnda obaloo yose ya Misili. ⁴⁶ Yusufu nage gubele na myaa maumi matatu, heligimene u meeso ma Falao, oolo lya Misili. Yusufu guhumine umbele wa meeso ma Falao, guhitile mnda ibaloo yose ya Misili. ⁴⁷ Hagibele giya myaa gya buswi, ibaloo ibushile biliwa biingi. ⁴⁸ Yusufu guongwela buliwa bya mioga gyose wa giya myaa njwi mnda ibaloo ya Misili, Gubiile biliwa mnda mabuga, biliwa gya mmabala byine bibele buchungulubu mabuga, gubiile mnda mwamo. ⁴⁹ Yusufu guongwele biliwa nahi isee ya wibega, biingi abisa,, na guleile ubala bululi bwa bwiingi. ⁵⁰ Hambele ha uchwa wa myaa gya ndala, Yusufu gubushile baana bopi, beene Asenathi, msiha gwa Potifala, ibuli ua Oni, belim'butile. ⁵¹ Yusufu gumgishile guya gubutilwe mtangi, Manase,bululi guganine, Abetcha angibilicha asusu anyi ose, na malanga mose ma ndu gya tata. ⁵² Na gwa bubili gumgitile china lyage Eflaimu, yulu guganine, Abetcha apa ibushi mnda sii gya asusu anyi. ⁵³ Myaa giya gya buswi gyo nuuhwa mnda ibaloo ya Misili, ⁵⁴ gitulile uchwa giya myaa njwi gya ndala, nahi biya buiganine Yusufu. Hoo nuuba na ndala mnda bibaloo byose, haho mnda ibaloo yose ya Misili habele na buliwa. ⁵⁵ Na ibaloo yose ya Misili haimonine ndala, batu bamlilile Falaogabahe biliwa, Falao gubasambile Bamisili bose giwe ulu Yusufu; gilwe byeli basambila. ⁵⁶ Ndala gyo nuba mnda sii gyose. Yusufu gusulile pomboo chage chose, nuubagudicha Bamisili,. Ndala nuba bushito mnda ibaloo ya Misili. ⁵⁷ Batu ba sii gyose boo nuuchwa Misili uli Yusufu; yulu bagule biliwa; bululi ndala gisili ginyemu mnda sii gyose.