¹ Hanyuma ha bihisho bibyo, guya gusunywisha oolo lya Misili, na mmiyi gwage, bamlubile mlumyabo, oolo lya Misili. ² Falao guchigililwe yulu ya baata bage babili, mmulu gwa buunywisha, na mmulu gwa buhiya. ³ Gubabiile mnda ihambo mdu mwa ilume ya basolokoto, mya mnda bulogo, haya hene hahambilwe Yusufu. ⁴ Ilume ya basolokoto, ibiile babo batu uli Yusufu, nage gubagilile, nabo bashamine mamwe masugu mnda bulogo. ⁵ Baloshile malo bose babili, busugu bumwechi gwaomwa na malo mage, na gegese bulumbulwilo bwa malo mage, gumnywisha na gummiila oolo lya Bamisili bene bahambilwe m'bulogo. ⁶ Yusufu gubachwilile halwelo, gubamonine bahulwe saso. ⁷ Gubabudiche baya baulu ba Falao, bene belibele nabo m'bulogo, mndu gya mlumyage, guganine, Yulu yai byenyi byenyu byabungamana lino? ⁸ Bamsambile, Twalota malo na hashi gunaosha umalangula. Yusufu gubasambile, ulangula gushi mgilo gwa Abetcha? Ibumbu ino sambilwe. ⁹ Mmulu gwa bunywisha gulisambile malo mage uli Yusufu, gumsambile, u malo manyi namona, umbele wanyi uli mzabibu. ¹⁰ Na guya mzabibu gulina matabi matatu, nago gwaba nahi guli hutota, gwahusola na bulula, buluba bwage bihele zabibu cha chigechu. ¹¹ Na isengo ya Falao yaba mmaboo manyi, niguhile zabibu, nichihinine mnda isengo ya Falao, nimmele Falao isengo mmaboo mage. ¹² Yusufu gumsambile, Ulangula wage noo uno. Matabi matatu ii masugu matatu. ¹³ Hanyuma ha masugu matatu Falao gwiginuna mswe gobe, gwiuguwicha iyaka u mgilo gobe; na gogwe wimma Falao isengo mmaboo mage, nahi byamubele gamble, byolibele humnywisha. ¹⁴ Bibyo wakengeleche na nene, holihewa bisoga, wangitile bya yano, nihuusaba, wandisambe uli Falao, na upunya mnda gino ndu. ¹⁵ Chigilwe ibalo nigibilwe uhuma mnda sii gya Baeblaniya, na ata bino nishimgile ihisho yoyose yulu bambiye mnda bulogo. ¹⁶ Mmulu gya bahii nage helimonine, ulangula uya ubele usoga, gumsambile Yusufu, Nene byoka biya naba mnda malo manyi, na loola, hali bitanga bitatu bya mikati gihaha hegulu ha mswe gwanyi. ¹⁷ Na mnda itanga ya hegulu, mubele na biliwa byose bya Falao, mgilo gwa mmii; tumonyi tubilile mnda itanga hegulu ha mswe gwanyi. ¹⁸ Yusufu gumgaile, guganine, ulangula wage noo uno; Bitanga bitatu noo masugu matatu. ¹⁹ Hanyuma ha masugu matatu Falao gwiuginuna na uguhunya mswe gobe na uusundiya hegulu ha mti, na tunonyi twiya nyama chobe. ²⁰ Haluhiile lisugu lwa butatu, lusugu lwa ubuswa wage Falao, gugaitile lusugu lwa saso bacha bage bose; guguginune mswe gwa mmulu gwa baunywisha, na gwa mmulu gwa bahii mmiihichi ya bacha bage. ²¹ Gumgiwiche mmulu gwa baunywisha mnda mgilo gwage gwa unywisha, nage gummele Falao isengu mmaboo mage. ²² Bino gumsundiye mmulu gwa bahii, nahi biya bibalangulile Yusufu, ²³ Mndi guya mmulu gwa bunywisha gushi mmengechiche Yusufu. gumgibilile.