¹ Haho Dina, msiha gwa Leya, guya gwelibutile Yakobo, gugile ulola misiha gya giya sii. ² Shekemu mwaana gwa Hamoli, Mmiti, mmata gwa ibaloo,gummonine, gumguhile, gulalile nage, gumdogoche. ³ Mtima gwage gummundile Dina msiha gwa Yakobo, gumbenjiche abisa gugo msiha, gudogomine binywa bisoga. ⁴ Shekemu gusambile Hamoli sage, guganine upe guno msiha gabe mmachanyi. ⁵ haho Yakobo guhuliche ugana gwamdogya Dina msiha gwage. Na baana bage babele uya hamwechi na nyama chage u lubugu. ⁶ Hamoli guchwile, sage na Shekemu, umgile Yakobo, gadogome nage, ⁷ Baana ba Yakobo habahuliche bibyo, bachile uhuma uya ulubugu; nabo bashimwene bisoga, bachigililwe abisa, yulu gwagila bwa buhugi nda Isilaeli wa ulala na msiha gwa Yahobo, inywa ishinaoshiwa ugilwa. ⁸ Hamoli gudogomine nabo, guganine, Mtima gwa Shekemu, mwananyi, gulihumunda kachenyu, ibumbu ino pewe gee gamgonde. ⁹ Mwagondane netu, mutuhe beswe misiha gyenyu, na benywe mwaguhe misiha gyetu. ¹⁰ Na benywe mwisha netu, na gino sii gibi u meeso menyu; shamwe na ugila bya udagulanya moo, mwabe na bumone. ¹¹ Shekemu gubasambile sage na guya msiha na banyume chage, na nagitabwiwe u meeso menyu, na byamwisaba nihana. ¹² Inangwa mwiluluya bumona na mmaso, nigonda nahi bya mwisambila, bibyo mupe guno msiha gabe mmachanyi. ¹³ Baana ba Yakobo babagaile, Shekemu na Hamili sage, wa buyanja, bululi gwamdogya Dina, kachabo, ¹⁴ babasambile, Tushinaosha ugila ino inywa, tumme kacheyu mtu gushigile kumbi; byiba bya abule watuli, ¹⁵ Nambo yulu ya ino ikoko kaa, twihulichana nenyu; wabe nahi beswe, gabegya kumbi mlumyana gegese gwenyu, ¹⁶ mndi haho twimma benywe misiha gyetu, na beswe twiguha misiha gyenyu twishama hamwechi nenyu, na beswe tubi batu bamwechi. ¹⁷ Nambo mushi hutuhulicha na ugya kumbi, bino twimguha kachetu, na beswe twigya lyetu. ¹⁸ Binywa byabo bibele bisoga u meeso ma Hamilo, na umeesoma Shekemu, mwaana gwa Hamoli, ¹⁹ Na guya mmwalubaga gushisingile ugika iya ikoko, bululi gumbendiche guya msiha gwa Yakobo,nage gubele na anyemu uhima bose mnda gya sage. ²⁰ Hamoli na Shekemu mwanage, bagile u mchango gwa mbuga gyabo, baganine, ²¹ Bano batu bali na talala netu, bino na bashame mmino ibaloo, na ugila bya ugalulanya mo; bululi ibnaloo ii yata, yabawilila, na twabaguhe bawamisiha gyabo uba baachio betu, na bawamisiha gyetu twabahe boo. ²² Bibyo wa iyo ihisho imwechi ka bihulichana netu bashame bose wetu, tube batu bamwechi, nambo twigya kumbi kila mlumyana, nahi bano byabagile kumbi. ²³ Wi wii! miyoo gyabo, na bumona bwabo, na nyama chabo chose chishibi bumona bwetu? mndi tuhulichane nabo ka, nabo bishama wetu. ²⁴ Bose babahuliche Hamuli na Shekemu mwanage, bose bene basutobowa uguya mchango gwa mbuga gyage. Bagile kumbi balumyana, bose bene bali hutobowa mnda mchango gwa mbuga gyage. ²⁵ Haluhiile lusugu lwa matatu, habasibele husumwa abisa, baana babili ba Yakobo, Simeoni na Lawi, banyume chage na Dina, baguhile bose gwaumwa ahilu age, bagichwilile mbuga wa uoma, babahagile balumyana bose. ²⁶ Babahagile Hamoni na Shekemu mwanage, wa bwigi bwa ahilu, bamguhile Dina mnda ndu gya Shehemu, boo nuligila. ²⁷ Baana ba Yakobo babigilile biya bitumba byine bihagilwe, bagiwatile kole mbuga bululi badagiche kachabo, ²⁸ Baguhile miyoo gyabo, na ng'ombe chabo, na punda chabo, na bitu byine bibelemnda mbuga, na byine bibele umabala. ²⁹ Baguhile na bumona bwabo bose, na baachi babo, na byose byine bibele mmadu mabo babiguhile kole, ³⁰ Yakobo gubasmbile Simeoni na Lawi, Mwasususla, ungita nanyuke bisone hawingi ha batu ba ino ibaloo, Bakanaani na Bapelezi; na nene, yulu baana babyi m'bacho, bikongolwela, na unjwa bita, nene nihagwa, nene na ndu gyanyi. ³¹ Nabo baganine, Wi wii! gamgilile kachetu na sengu?