¹ Yakobo guginunine meeso mage, gumonine, na loola Esau gulihuchwa na batu sambi china hamwechi nage. Gubagabulile Leya na Laeli na baya bagichi babili, baana babo. ² Gugabiile na baya bagichi na baana babo umbele, na Leya na baana bage hanyuma habo, Laeli na Yusufu wisula. ³ Gee guhishile hambele habo, guginanine ndaa na hasi nyendo njwii, na ata bimmyile mmulwage. ⁴ Esau guchwile abilo umgaa, gumumbatile na umlalila mioshi, na umma yambi; nabo balilile. ⁵ Esau guginunine meeso mage,gubamonine baya baachana na baana, gubuchiche, m'bananyi bano bali hamwechi nobe? Guganine, Ii baana Abetcha belihele mcha gobe wa keene chage. ⁶ Noo baya bagichi, na na baana babo, bashenine na baginamine. ⁷ Leya nage, na baana bage, bashenine, baginamine, Hanyuma Yusufu na Laeki bashenine na baginamine. ⁸ Esau guganine, Guno mgoma gose gwandabanga guli yulu yai? Yakobo guganine, Yulu nagitabichiwe u meeso ma mlumyanyi. ⁹ Esau guganine, ninacho bee, mnunanyi, choli nacho na chibe chobe. Yakobo guganine, Bishibibyo; nambo nagitabichiwa u meeso mobe, ibumbu ino uguhe mmaso gwanyi mmaboo manyi, uba byandamone yenyo yobe nahi umona yenyi ya Abetcha, wamenje nene. ¹¹ Guha, ibimbu ino, ii miha gyanyi, gwandipashile, bululi Abetcha apele keene chage, na yulu ninabyo bino byose, Gumminyinyiye, Esau gusili guhile. ¹² Hanyuma Esau gumsambile, Beswe tubegya, tubangwe, nene niulombwela. ¹³ Yakobo gumgaile, Mlumyanyi nigidi ugana baana bili bacho-bacho, iyaka moyoo na ng'ombe chili hukokya. Chicho nyama uchigyasha lwendo lwingi chuba ligima chiwa chose. ¹⁴ Ibumbu ino mlumyanyi na gahita hambele ha mcha gwage; na nemne nichigyasha lemba-lemba nahi lwendo lwa nyama chino chili umbele wanyi, na nahi lwendo lwa baana, na niihiya wa mlumyanyi uya Seili. ¹⁵ Esau guganine, Nuushige na bamwe batu banyi bene bali hamwechi nanyi. Yakobo guganine hali ibalo nai? Namone ugitabichiwa ka u meeso ma mlumyanyi. ¹⁶ Bibyo Esau gugiwile loka luya lusugu nugya mndila gyage ndaa na Seili ¹⁷ Yakobo gugililile ndaa na Sukoti. Guligubaile ndu, guchiyengela nyana chage bitula-tula. Wa bibyo iha ihana igitilwe Sukoti. ¹⁸ Yakobo guchwile wa talala ndaa na mbuga gya Shekemu, gili hawingi ha sii gya Kanaani, helihumine uya Padan-alamu; guyengile itula yage umbele wa gigyo mbuga. ¹⁹ Gugulile ibaa ya sii, heligimiile itula yage, gugulile mmaboo ma mwaana gwaHamoli, sage na Shekemu, bihindi sambi bya bomona. ²⁰ Gugimiile uya butambikilo, guhagishile, El-elohe Isilaeli.