¹ Haho Yakobo guhuliche binywa bya baana ba Labani, baganine, Yakobo gwaguha bitundu byose bya setu; na yulu ya bitundu bya setu gwahewa umanyiya uno ose. ² Yakobo gumonine yenyi ya Labani, ugana gushilingamine bisoga nahi mmnakeshi na m'bunge. ³ MLUMNE gumsambile Yakobo, Ugiwile ndaa na sii gya bamasobe na gya ilongo yobe, na nene nibi hamwechi nobe. ⁴ Yakobo gutumine batu, gubagitile Laeli na Leya bachwe mgala uli nyama chage. Gubasambile, ⁵ Namona yenyi ya senyu, gushi huningamina bisoga nahi mna keshi na m'bunge, Bino Abetcha a tata guli hamwechi nanyi. ⁶ Na benywe mugudi ugana wa uoma wiingi nimgilile senyu. ⁷ Na senyu gumbidiche gwagalula alambwe anyi nyendo umi; Na Abetcha ashimleile gakonone. ⁸ Heliganine, Chili na bibala noo chibe alambwe obe, nyama chose chibutile cha bibala. Heliganine, Chili na bibambu noo chibi alambwe obe, haho nyama chose chibutile cha bibambu . ⁹ Bibyo Abetcha amsapile senyu bitundu byage, na uupa nene. ¹⁰ Mndi, nyama hachiswalile magumo, niginune meeso manyi nimonine u malo, na loola malunga mene maundile mabele na mihuli, na bibala, na bibambu. ¹¹ Na malaika ma Abetcha masambile u malo, Yakobo! Nigaile, Nene guno. ¹² Guganine, Ginuna, hano, meeso mobe, wamone; malunga mose mene malihuunda mali na mihuli, na bibala, na bibambu; bululi namona byose byeliugilile Labani. Nene nili Abetcha a Betheli, uya olibiile mauta w'ihanda, uya olilibindile wandi. Bino uchuwe, uhume mnda gino sii, ugiwile u giya sii gyolibushilwe. ¹⁴ Laeli na Leya bagaile, bamsambile, Wi wii! Tuli na ibaa nai na tuli na buhyana nai mnda ndu gya setu? ¹⁵ Gusatibiya nahi bagenyi, bululi gutuguchiche, nage gulile bumona bwetu abisa. ¹⁶ Bululi bumona bose bwa setu bwine bwamsapa Abetcha, bubo bumona noo busili bwetu na baana betu, Mndi, yoyose yine iusambile Abetcha, uigile. ¹⁷ Haho Yakobo, guchiwile, guchininye baana bage na baachi bage hegulu ha ngamiya. ¹⁸ Guguhile nyama chage chose, na bitundu byage byose byelibele gwapata, na nyama chelipashile uya Padan-alamu, yulu gahiya wa sage Isaka mnda sii gya Kanaani. ¹⁹ Haho, Labani gubele mgibe ugeda miyoo gyage maso, na Laeli gugubile miishi gya sage. ²⁰ Yakobo gum'bunjiche Labani, Mshami, bululi gushimsambile ugana gwasina. ²¹ Bibyo gusinine gee na byose byelibele nabyo; guchiwile na udabuwa luudi, gulolile yenyi yage ugya lubi lwa Gileadi. ²² Na lusugu lwa matatu Labani gusambilwe ugana Yakobo gwasina, ²³ guguhile bashiwabo hamwechi nage, gumlamine lwendo lwa masugu njwii. Gum'bangile u loono lwa Gileadi. ²⁴ Abetcha amchilile Labani Mshami, u malo ma busugu, gumsambile, ube lwenge lulume, ushimsambileYakobo inywa ya luhanga lusoga na ata ya buloga. ²⁵ Lanabi gummyile Yakobo, na Yakobo gubele gwagiliya bitula byage u loono, na Labani gubele gwagimiya bitula byagw na bashiwabo u loono Gileadi. ²⁶ Labani gumsambile Yakobo, Waita ii? Wapunja, wabaguha bawa misiha gyanyi nahi kole chawaswa u bita bya ahilu. ²⁷ Bibyo wasina wa lubisagulu na wapunja, na ushisambile, bululi nalagane nobe uligile wa talala, na ng'imbo cha magoma, na binubi? ²⁸ Na ushileile nabaumbatile baana banyi na misiha gyanyi; umane wagila bya buhugi. ²⁹ Nina uosha oose mmuboo wanyi na uuitila bya usona; lino m'busugu Abetcha a sobe asambila, agana, ube lwenge lulume, ushimsambile Yakobo inywa ya luhanga lusoga na ata ya uloga. ³⁰ Bino hano, wachuwa bululi ulihubenja abisa ndu gya sobe. Yulu yai wagiba miishi gyanyi? ³¹ Yakobo gumgaile, gumsambile Labani, Bululi namona booba, niganine ushichwe uusapa bawa misiha bobe wa uoma. ³² Gegese golimona gwagiba miishi gyobe, gee gashibe na mwego. U mbele wa meeso ma bashiwetu uimone yoyose yobe wandi, waiguhe. Bululi Yakobo gushimanine ugana Laeli gwagigiba. ³³ Labani gugingile mnda itula ya Yakobo, na itula ya Leya, na bitula bya bagichi bopi, gushigimonine. Gutoboile mnda itula ya Leya, Gugingile mnda itula ya Laeli. ³⁴ Bibyo Laeli gubele gwagigiba giya miishi, mgibiye ubugandilo bwa ngamiya, na ugishamina. Labani gubabatile itula yose gushigimonine. ³⁵ Nage Laeli gumsambile sage, mlumyanyi ushiba na sungubululi nishinaosha uginyuwa u mbele gyobe, yulu nawaswa na bya baachana. Guengile, na gushigimonine giya miishi. ³⁶ Yakobo gichigililwe, gugumene na Labani. Yakobo gugaile, gusambaile Labani, Iyii abachi anyi? Nabi iyii buube bwanyi, ata wandama biino? ³⁷ Wababata-babata m'byombo byanyi byose; ii yitu nai yawamona ya mnda gyobe? Uibiye hano hambele ha bashiwetu, na bashiwenyu, baagede mlandu hawingi hetu. ³⁸ Myaa gino maumi mopi nashama obe; miyoo gyobe na ata mabuchi mobe ma maota mashihuminye magumo na ata malunga na nyama chobe nishichilile. ³⁹ Yoyose ihagilwe na misohe nishichwile nayo, nene nime iguhile asala ayo, gogwe uisabile mnda uboo wanyi,uba iguhilwe mchuba uba iguhilwe m'busugu. ⁴⁰ Gugo bubele mshaminyi gwanyi; mchuba chuba lioule na m'busugu peho, tulo tupumine mmeeso manyi. ⁴¹ Myaa gino maumi mopi nishamine mndu gyobe; niugilile myaa umi na gina yulu ay bawamisiha bobe bopi, na myaa mtuba u nyama chobe, na gogwe ugalule alambwe anyi nyendo umi. ⁴² Nambo Abetcha a tata, Abetcha a Iblahimu na Booba bwa Isaka, gushisuba jhamwechi nanyi, chigilwe wisuba unyibga maboo hululu.Asusu anyi na migilo gwa maboo manyi Abetcha agimonine, guambila buno busugu. ⁴³ Labani gugaile, gumganine, Yakobo, Babo bawa misiha ii misiha gyanyi, na baana ii baana banyi, na nyama ii nyama chanyi, na byose byolihumona ii byanyi, na nene ninaosha ubagilila ii lino misiha gyanyi na baana babo bababushile? ⁴⁴ Bino! na tubiye malagano , nene na gogwe,mabe ubangisiya hawingi hanyi na gogwe. ⁴⁵ Yakobo guguhile liwe na uligimiya nahi ihanda. ⁴⁶ Yakobo gubasambile bashiwabo, Ungolwe mawe. Baguhile mawe, bamabiile mtala, nabo nuuya haya hoka na mtala. ⁴⁷ Labani guhagitile Yegalsahadutha, bibyo Yakobo guhagitile Galedi. ⁴⁸ Labani guganine, guno mtala ii ubangisiya hawingi hanyi na gogwe hano lino. Wa bibyo hagishilwe china lyage Galedi, ⁴⁹ na Mispa, yulu guganine, Abetcha alole hawingi hanyi na gogwe, mengo matushimonana. ⁵⁰ Ubebasusula bawamisiha banyi, na ubegonda baachi beengi uhima misiha gyanyi, na hashi gunge mtu hamwechi netu, loola, Abetcha noo mangisiyo hawingi hanyi na gogwe. ⁵¹ Labano gumsambile Yakobo, Loola, abandagulu guno na ulingamine na ihanda yandagimiya hawingi hanyi na gogwe. ⁵² Abandagulu ano na abe mangisiyo,na ino ihanda ibe mangisiyo, na ugana nene nishiitowa ano abandagulu uchwa oli,na ata gogwe ushiitowa onu abandgulu na ino ihanda uchwe wandi, wa buube. ⁵³ Abetcha a Iblahimu, na Abetcha a Naholi, Abetcha a sabo, aonone hawingi hetu. ⁵⁴ Yakobo gushinjiche lutangi u loono, gubagishile bashiwabo bachwe uya iliwa, nabo balile iliwa, bashamine busugu bose u loono. ⁵⁵ Labani guchuwile lwelo umayaya, Gubaumbatile baana babe na misiha gyage, gubahalile mihaa; hanyuma Labani gugile, gigiwile wage.