¹ Nage Laeli helimonine ugana gushihum'butila Yakobo mwaana, Laeli gumonene mshiwabo buwa. Gumsambile Yakobo, Pee mwaana; nambo bishi bibyo niiwa nene. ² Yakobo guchigililwe yulu ya Laeli, guganine, Wi wii! Nene nili ha ihana ya Abetcha, guushibilile lubuto lwa gumo? ³ Guganine, Mgichi gwanyi guno, Bilha, ugimbile weli bululi gabute yulu gabute hegulu ha machwi manyi, na nene napateibushi uhitila gee. ⁴ Haho gummele Bilha mgichi gwage gabe mmachage. Yakobo gugingile weli. ⁵ Nage Bilha guswalile gumo, gum'butile Yakobo mwaana. ⁶ Laeli guganine, Abetcha apa kiine gyanyi, nage gwahulicha lidi lyanyi, genupa mwaana, Wa bibyo gumgitile china lyage Dani. ⁷ Bilha , mgichi gwa Laeli, guswalile gumo iyaka, gum'bitile Yakobo mwaana gwa bubili. ⁸ Laeli guganine, wa mahindi mauulu nahimana na kachanyi, nammima. Gumgitile chinalyage Naftali. ⁹ Leya helimonine ugana gwahuhamba lubuto, gughile Zilpa , mgichi gwage, gummele Yakobo gabe mmachage. ¹⁰ Zilpa, mgichi gwa Leya, gum'butile Yakobo mwaana. ¹¹ Leya guganine, mwamdo gusoga! Gumgitile china lyage Gadi. ¹² Zilpa mgichi gwa Leya, gum'butile Yakobo mwaana gwa bubili. ¹³ Leya guganine, Luhanga lusoga wandi, bululi baachana bingita luhanga lusoga. Gumgitile chinalyage Asheli. ¹⁴ Leubeni gugile masugu ma uesa ngano gunonine mtundu luhwa mlubala, guguletile wa Leya mnage, Haho Laeli gumsambile Leya, Pee na nene chimwe pwaa cha mwanobe. ¹⁵ Nage gumsambile, Wi wii! Iyihisho icho uusapa mlumyanyi; ata bibyo ulihubenja uguha na pwaa cha mwananyi nacho? Laeli gumsambile, Wa yulu ya bibyo lino gwichwa ulala oli buno busugu yulu ya pwaa cha mwanobe. ¹⁶ Yakoboguchwile uhuma ulubala na igolo, Leya guchuwile ugyugaa, guganine, Wichwa wanyi tu, wa bululi nuugula yulu ya pwaa cha mwananyi; Yakobo gulalile wage buya busugu. ¹⁷ Abetcha ammuliche Leya, nage guswalile gumo, Gum;butile Yakobo mwaana gwa butsano. ¹⁸ Leya guganine, Abetcha apa alambwe anyi, bululi namma mlumyanyi mgichi gwanyi. Gumgitile chinalyage Isakali. ¹⁹ Leya guswalile gumo iyaka, gum'bitile Yakobo mwaana gwa mtuba. ²⁰ Leya guganine, Abetcha apa mmaso gubenju, mndi bino mmulmyanyi gwishama nanyi, yulu nam'butila mwana gwa mtuba. Gumgitile china lyage Zabuloni. ²¹ Hanyuma gubutile msiha, gumgitile china lyage Dina. ²² Abetcha ammengeleche Laeli; Abetcha ammuliche, amsulile gumo. ²³ Guswalile gumo, gubushile mwaana, guganine, Abetcha apuminya abule anyi. ²⁴ Gumgitile china lyage Yusufu, guganine MLUME gapee gunge mwaana. ²⁵ Haho Laeli halibishile Yusufu, Yakobo gumsambile Labani, Ubendeya nagye wetu, na wibaloo yanyi. ²⁶ Upe baachi banyi na baana banyi, bandiugilile, naligile lwanyi, bululi ugidi ugila wanyi byandiugilile. ²⁷ Labani gumsambile, Nambo namona yano u meeso mobe, shama, yulu namana ugana uhitila gogwe MLUME gwapalila mihaa. ²⁸ Labani guganine, gana alambwe nai oli hubenja, na nene niuha. ²⁹ Yakobo guganine ugidi gogwe byandiugilile,na bibele nyama chobe wandi. ³⁰ Bululi bumona bobe bubele buchoo handishibele nachwa, nabo bwabula uba bwingi, MLUME guhalile mihaa ose wandigile. Bino hano, mengo nai nilingya bya ndu gyanyi nene mine? ³¹ Labani gum'budiche, nuuhe ii? Yakobo guganine, ushipe atu; ubepisha ino ihisho, nilisha nyama chobe iyaka na uchiusa. ³² Nihita hawingi ha nyama chobe chose lino, na uhunya chiya chose china na bibala-bibala na mihuli-mihuli, na nyama chose cha chihisu uli gigyo miyoo na gili na bibala-bibala na mihuli-mihuli u mamo mabuchi; nacho chibi noo alambwe anyi ³³ Na kiuine gyanyi gyimangisiya masugu nene michwa, holichwa ulola yulu ya alambwe anyi ene ali oli. mabuchi momose mene mali na bibala-bibala na mihuli-mihuli, na miyoo gishi gya gihisu gibemoneya wandi, gyibalwa uba gyagibwa. ³⁴ Labani guganine, loola na bibe bibyo byawagana. ³⁵ Haho Labani guhuminye liya chuba mabuchi ma malunga mabi na bitongecho na bibala, na buchi ma maota mali na bibala na mihuli gyogyose gyina ibala ya ihaha, na miyoo gyosegyina gibele gihisu, gugibiile mmaboo ma mwanage. ³⁶ Gulibagulile na Yakobo lwendo lwa masugu matatu; nage Yakobo guusile nyama cha Labani chine chishigele. ³⁷ Yakobo guguhile maongo ma mlubna ma magisi, na mlozi, na mwalamoni, gubandule bibandu, mihuli gya gihaha gimoneye mnda mamo maongo. ³⁸ Gugimiya mamo maongo meli bandulile na umabiya ubishima bya unywishicha madi, haya hachibele huchwa nyama chinywe; chiswalile magumo hachibele huchwa unywa. ³⁹ Nyama chiswalile magumo u mbele wa mamo maongo, chibutile baana bali na bibambu, na bibala na mihuli. ⁴⁰ Na Yakobo gubagulile baana ba miyoo, nugilosha byenyi bya migoma bilole chiya chibele na bibambu na gyogyose gibele gihisumnda nyama cha Labani, Guchibiile habamba nyama chage, na gishichisumbiche hamwechi na nyama cha Labani. ⁴¹ Bibele hachiswalile magumo nyama cha chiomu, Yakobo gubiile maya maongo u mbele wa meeso ma chicho nyama u bishima yulu chiswale magumo hawingi ha mamo maongo, ⁴² Haya hasuminywe gushibiile iyaka maya maongo. haho chiya chilema chibele cha Labani, na chiya chibele na uoma noo chibelecha Yakobo. ⁴³ Bibyo gugo mtu gugililile abisa, gubele na nyama chiingi, na bagichi, na baacha, na ngamiya, na punda.