¹ Hanyuma Yakobo gugile mlwendo lwage na uhiya sii gya baanaba mligulu. ² Nage gulingamine, na ulola, hali ishima mlubala, na bihichi bitatu bya miyoo bili bilachu alibu nayo, yulu ha iya ishima basunywisha migoma; na habele liwe lyata lya uunina ishima. ³ Migoma gyose gisusumbila haho, batu basubilingisha lilyo liwe ulihunya hegulu ha ishima na uuginywisha miyoo, hanyuma noo uligiwucha liwe hagulu ha ishima hene halishushama. ⁴ Yakobo gubabudiche, bashiwetu, muli batu ba uhi? Baganine beswe tuli batu ba Halani. ⁵ Gubabudiche, Wi wii! mumgidi Labani, mwaana gwa Naholi? Baganine tumgidi. ⁶ Gubabudiche, Wi wii! Guli poo?Baganine, Guli poo, lolaga, Laeli msiha gwage gulimhuchwa na miyoo. ⁷ Yakobo guganine loola gyili kumyiya meno, mashi naba mengo ma uongole nyama; m'benyisha miyoo, na mugye ugilisha. ⁸ Baganine, tushinaosha, ata ginaongolwa migoma gyose, nambo batu babebilingisha liya liwe hegulu ha ishima, haho noo hatunywisha miyoo madi. ⁹ Na ata helibele hudogoma nabo, Laeli guchwile na miyoo gya sage, yulu gubele hugiusa. ¹⁰ Haho Yakobo helimoniune Laeli msiha gwa Labani, nyumyage gwa mnage, na miyoo gya Labani nyumyage gwa mnage, Yakobo gushenine, na ulibilingisha liya liwe lihume hegulu ha ishima, guginywishiche miyoo gya Labani nyumyage gwa mnage. ¹¹ Yakobo gummumbatile Laeli, guginune lidi lyage na ulila. ¹² Yakobo gummele Laeli mwano gwa ugana gee ii mihwa gwa sage, na ugana gee ii mwaana gwa Lebeka, Haho gugile abilo uha sage mwano. ¹³ Bibyo Labani helihuluche mwano gwa Yakobo, mwaana gwa kachage, gugile abilo umgaa, na umumbatila, na yambi, na umyicha mndu gyage. ¹⁴ Labani gumsambile, chigilwe noo gogwe uda lyanyi na nyama chanyi. Haho Yakobo gushamine wage nahi mwechi gumwechi. ¹⁵ Labani gumsambile Yakobo gogwe uli mihwanyi, mndi, wingilila bunene? Usambile alambwe obe abi ii? ¹⁶ Labani gubele na bawa misiha babili,china lya mmosobu ii Leya, na chinalwa mnunabatu ii Laeli. ¹⁷ Nage Leya meeso mage mabele malema, Bibyo Laeli gubele m'benju na hungwe u yenyi. ¹⁸ Yakobo gumdile Laeli guganine,Niugilila myaa njwi yulu yape Laeli, msiha gobe gwa gucho-gucho. ¹⁹ Labani guganine, Bili bisoga nuuhe gogwe uli uha gunge mtu; ushame wanyi. ²⁰ Yakobo gugilile myaa njwii yulu gahewe Laeli. U meeso mage mabele nahi masugu macho wa yulu ya biya byelim'bendiche. ²¹ Yakobo gumsambila Labani, Ubepe mmachanyi, bululi masugu manyi mahuwilila; nagingile weli. ²² Labani guongwele batu bose ba giya mbuga na uhyicha bililwa saso. ²³ Haho mengo ma busugu gumguhile Leya, msiha gwage, nuuma Yakobo, Nage gugingile weli. ²⁴ Labani gummele Leya mgichi gwage Zilpa, gabe mgichi gwage. ²⁵ Haho haluhiile lwelo, mndi! M Leya. Gumsambila Labani ino iyii yawangila? ²⁶ Nishiugulile yulu ya Laeli? Bululi bwai wambicha? Labani gubanine, Bishibagiliya bino wetu, ugonja mnuna batu hambele ha mmulwa batu; ²⁷ wilicha masugu mage njwii, haho twiuha gono nage wa bugichi bolingilila, ginge myaa njwii. ²⁸ Yakobo gugilile bibyo, guwiliche masugu mage njwii. Nage nuuma Laeli msiha gwage gabe mmachage. ²⁹ Labani gummele Laeli mgichi gwage Bilha gabe mgichi gwage. ³⁰ Gugingile wa Laeli nage, Gummunjile Laeli uhima Leya, gugilile wa yulu ya Laeli, gunge myaa njwii. ³¹ MLUME gumonine ugana Leya gushihuunjwa, gusulile gumo lyage; mndi Laeli gushibele hubuta. ³² Leya gusalile gumo genuubuta mwaana, gummele china lyage, Leubeni, yulu guganine, bululi MLUME gwamona asusu anyi; bino mlumyanyi gwikunda. ³³ Guswalile iyaka gumo nuubuta mwaana, guganine, wa yulu MLUME gwahilicha ugana nene nishiunjilwe, gwapa na guno; gumgitile chinalyage Simeoni. ³⁴ Guswalile iyaka gumo, gubutile mwaana, guganine, Hanobino mlumyanyi gwilungana nanyi, bululi nam'butila mwaana gwa butatu. Wa bibyo gumgitile china lyage Lawi. ³⁵ Guswalile gumo iyaka, gubitile mwaana. Guganine, Luno lwendo nimtona MLUME; wa bibyo gumgitile china lyage Yuda; gee nuuhamba lubuto