¹ Bibyo ndowa gibele na butundu uhima nyama chose cha mgala cheliitile MLUME Abetcha.Gimsambile mmachana, Gogwe! Bino noo bidogomine Abetcha, Mushiye biguma bya miti gyose gya mlubala? ² Mmachana gugisambile ndowa, Biguma bya miti gya mlubala tunaya; ³ hange biguma bya mti guli m'bwingi na lubala Abetcha aganine, Mushiye na mushiude, mushichwe uwa. ⁴ Ndowa gimsambile mmachana, Chigilwe mushiwa. ⁵ Bululi Abetcha agidi ugana lusugu lwamwiya biguma bya gugo mti, mwibululwa meeso, na benywe mubi nahi Abetcha, m'bemana bisoga na biibe. ⁶ Mmachana helimonine ugana guya mti gulingye wa uliwa, mgubenju u meeso, nago ii mti gwa itima ya meeso na malango, haho guguhile imwe iguma ya guya mti gee nuuya, gummele na mlumyage, nage nuuya. ⁷ Babululwe meeso bose babili balimanine uba bali buchi, bashonine byanyi bya mti, baliitile bichwalaganywa. ⁸ Hanyuma bahuliche lidi lya MLUME Abetcha, gulihugyata mnda mlubala mengo ma chuba usendama; Adamu na mmachage babisamine m'bwingi mwa miti gya mlubala, MLUME Abetcha gashibamone. ⁹ MLUME Abetcha gumgitile Adamu, gumganine , Uli uhi? ¹⁰ Adamu guganine, Nalihulicha lidi lyobe mlubala, namona booba bululi nene nilibuchi; nalibisa. ¹¹ Abetcha aganine, Mnanyi gusambila ugana uli buchi? Wi wii! Gogwe wayaa biguma bya mti gwandiulagilke ushibiye? ¹² Adamu guganine, Gugo mmachana golipele gabe hamwechi nanyi noo gupele buguma bya guya mti, nene nuuya. ¹³ MLUME Abetcha gumganine mmachana, Iyii ino yawagila? Mmachan guganine, Ndowa gyambicha, nene nuuya. ¹⁴ MLUME Abetcha gumganine ndowa, Yulu ya ibalo nai wagila bibyo, waalogwa gogwe uhima nyama chose, na uhima byose bili mnda mgala; wa lugili wigyata, na ihwili wiiya masugu mose ma mwego gobe; ¹⁵ na nene nibiya bumangu hawingi hobe na gugo mmachana, na hawingi ha ibushi yobe na ibushi yage; iyo yiunyuwa mswe, na gogwe wimnyuwa ashidagulu. ¹⁶ Gumsambile mmachana, Wineneniulibiila usuma obe, na ubuta obe; wa busungu wibuta baana; na itima yobe ibi uli mlumyobe, nage gwiutabala. ¹⁷ Gumsambile Adamu, Wa yulu wahulicha lidi lya mmachobe, ulile biguma bya mti gwandiulagile, niganine, Ushibiye; bitete byalogwa yulu yobe; wa usuma wiigilila mgilo liliwa yoliya masugu mobe mose ma mwego gobe. ¹⁸ byookole na miigwa byibuswa yulu yobe, na gogwe wiiya byanyi bya m'bihongelela; ¹⁹ Wa yuda ya yenyi yobe wiiya iliwa, ndaa na byoligiwila u bitete, wabili noo oliguhilwe; buluili gogwe uli ihwili, na gogwe wigiwila wigiwila. ²⁰ Adamu gugitile mmachage china Hawa; bululi gee noo mnabo gwa babe bali na mwego. ²¹ MLUME Abetcha gubaitile Adamu na mmachage bichwalaganywa. ²² MLUME Abetcha guganine, Bino, guno mtu gusili nahi gumwe gwetu, wa umana bisoga na biibe; na bino gashichwe ugolola uboo wage na uguha biguma bya mti gwa mwego, gabeya, na ushama milumbu. ²³ wa bibyo MLUME Abetcha gummuminye mnda lubala lwa Edeni, galime bitete byine byeguhilwe wa bili. ²⁴ Haho gee numchinga mtu,gubiile Makelubi luubi lwa mlugulu lwa lubala lwa Edeni,na ahilu a ahyaa abele hugaluwa ubo na ubo, ugiusa nda gya mti gwa mwego.