¹ Bibyo gulu na sii bihwile, na byose bili na mwego. ² Na lusugu lwa njwii Abetcha ahwile mgilo gwage gose gweligilile; gulitudiche lusugu lwa njwii, guleile ugila mgilo gwage gose gweligilile. ³ Abetcha ahalile mihaa lusugu lwa njwii, guluhaheche wa yulu mnda lusugu lulo Abetcha gulitudiche; guleile ugila mgilo gwage gose gwelibumbile na gweligilile. ⁴ Bibyo noo bibushi bya gulu na sii habibumbilwe. Luya lusugu mlume Abetchahelibumbile gulu na sii ⁵ bishibele naba bihama mlubala, na ata byanyi bya mmabala byuliwa bishinabuda ata, bululi MLUME Abetcha gushi nanyesha mbula mgino sii, na hashi mtu gubilima bitete; ⁶ kunguku giselile mnda sii, gibiile madi heguluhose ha bitete. ⁷ MLUME Abetcha gummitile mtu wa ihwili ya bitete, gummulile mmihyembe luhuda lwa mwego; mtu genuba ichuli-chuli ya mwego. ⁸ MLUME Abetcha guunine lubala lubi lwa mlugulu mwa Edeni, gum'biile mnda lubala gugo mtu gweliitile. ⁹ MLUME Abetcha gumeninye mnda bitete miti gyose gyubenjiwa u meeso na gulinye uliwa; na mti gwa mwego m'bwingi mwa lubala, na mti gwa umana busoga na buube. ¹⁰ Luhumine ludi mnda Edeni lwa ubiila lubala madi, na uhumina haho luligabule miswee gina. ¹¹ China lya lwa lutangi ii Pishoni; noo lulihuchunguluwa ibaloo yose ya Havila, oo noo uli nolo; ¹² na nolo cha gigyo sii ii chibenju ; ubo uli bedola, na bitundu shihamu,. ¹³ Na china lya ludi lwa bubili ii Gihoni; noo lulihuchunguluwa sii gyose gya Kushi. ¹⁴ Na china lya ludi lwa butatu ii Hidekeli; noo luli huhita umbele wa Ashulu. Na ludi lwa buna ii Flati. ¹⁵ MLUME Abetcha gumguhile gugo mtu, gum'biile mnda lubala lwa Edeni, galulime na ululongya. ¹⁶ MLUME Abetcha gumlagile gugo mtu guganine, Biguma bya miti gyose gya mlubala wiiya, ¹⁷ bibyo biguma bya mti gwa umana bisoga na buube ushiye, bululi lusugu loliya biguma bya gugo mti wiwa winene. ¹⁸ MLUME Abetcha guganine, Bishi bisoga guno mtu gabe gee buchima, nimmitila m'bwatilicha gwa uhwanana nage. ¹⁹ MLUME Abetcha guitile uhuma mnda bitete nyama chose cha uhuma mgala, na tunonyi tose twa ha hululu, gummele Adamu yulu gamone na gwibigita wii; bibumwa byose bya bili na mwego china lyeli gitile Adamu lyo nuba noo china lyayo. ²⁰ Adamu gubihele machina mabyo nyama chose cha usugwa, na tunonyi twa ha hululu, na nyama chose cha mgala; haho hashimoneye gwa ubwatilicha Adamu guhwanene nage. ²¹ MLUME Abetcha gumchwishiche adamu tulo tunyemu, nage gulalile; hanyuma guguhile lubachu lwage lumwechi, guwilile nyama byagibele, ²² na luya lubachu lweliguhile uli adamu MLUME Abetcha guluitile mmachana, gumleshile uli Adamu. ²³ Adamu guganine, Bino guno ii uda mnda mauda manyi, na nyama mndanyama chanyi, mndi gwigiswa mmachana, bululi gwaguhwa mnda mlumyana. ²⁴ Wa bibyo mlumyana gwishiga sage na mnage nage gwiumbatilana na mmachage, nabo babi m'bili gumwechi. ²⁵ Nabo babeli buchi bose babili, Adamu na mmachage, na bashimonine abule.