¹ Habele ndala mgiya sii, uhima giya ndala gya gitangi gibele masugu ma Iblahimu. Isaka gumgilile Abimeleki , oolo lya Bafilisiti, uya Geleli. ² MLUME gumtobwele, guganine, ushisale ugya Misili, ushame mnda sii gyandiusambila. ³ Washsme ubugenyi mnda gigyo sii, na nene nibi hamwechi nobe, na uuhalila mihaa, bululi niuha gogwe na ibushi yobe bibaloo binobyose. Nene nigimiya masugu mose ulaha wandilahile na sobe Iblahimu. ⁴ Nibusha ibushi yobe nahi tumbalambala twa hegulu, nene niiha ibushi yobe bino bibaloo byose , na uhitila ibushi yobe mioga gyose gya gino sii gyilihalila mihaa. ⁵ Yulu Iblahimu guhuliche lidi lyanyi, guwashiche malagano, na uonona wanyi, na m'bindo gwanyi, ⁶ Isakagushamine uya Gelali. ⁷ Batu na iyo ihana bam'budiche mwano gwa mmachage. Guganine, Mkachanyi gugu bululi gusinine ugana, Mmachanyi, batu ba giya sii bashichwe umaga wa yulu ya Lebeka; bululi gubele na yenyi ya buhungwe. ⁸ Hesibele mshame masugu meengi uya, Abimeleki, oolo lya Bafilisiti, gulingamine mdilisha, gummonine Isaka gulihumbatila-umbatila Lebeka mmachage ⁹ Abimeleki gumgitile Isaka, guganine, Winene gugu ii mmachobe, yulu yai uganine, Mkachanyi gugu? Isaka gumgaile, Niganine bululi Nashiwe yulu yage. ¹⁰ Abimeleki guganine, Ino iyihisho nai yawatugilila? Hange gumwe mtu gwabalala na mmachobe wa nangu ulanga, gogwe wabatubiya mnda abachi. ¹¹ Haho Abimeleki gusambile batu bose, guganine, gegese gwimuda guno mtu ata na mmachage chigilwe gwihagwa. ¹² Isaka guunine matete mnda giya sii, gusolile guya mwaa bitanga sambi wa kila imwechi, MLUME gummalile Isaka mihaa. ¹³ Na gugo mtu guchwile mona, na uba mtu mmata, gugililile utonywa, na umanyiya abisa, ¹⁴ Gee nuba na bumona bwa miyoo, na bacha beengi. Babo Bafilisiti bammonene buwa. ¹⁵ Na biya bishima byose byabadabile bacha ba sage, masugu ma Iblahimu sage, Bafilisiti babele babihulile, babigiluche bibunduguchu. ¹⁶ Abimeleki gumsambile Isaka, Uhume watuli, bululi gogwe uli na uoma utuhima beswe, ¹⁷ Bibyo Isaka guhumine uya nugubaa itula yage wibetabeta ya Gelali, gushamine haya. ¹⁸ Isaka gugiwile na gubidabile iyaka biya bishima bya madi byabadabile masugu ma sage Iblahimu; yulu baya Bafilisiti babihulile hanyuma ha uwa wa Iblahimu; nage gubigitile machina, ulamana nq machina mabigitile sage. ¹⁹ Bacha ba Isaka badabile mmiya ibetabeta, bapashile ishima yina madi ma usuluwa. ²⁰ Baushi ba Gelali bagumene na baushi ba Isaka baganine, Mano madi mmetu. Haho gee nwigita china lya iya ishima Eseki, bululi bagumene nage. ²¹ Badabile inge ishima, bagumene na iyo iyaka, Guigitile china lyage Sitma. ²² Guhumine ubo gudabile inge ishima, iyo noo yabashigumanine, guigitile china lyage Lehobothi, guganine bino MLUME gwatuitila ihana, na bwswe twibula mnda gino sii. ²³ Gugile uhuma haya ndaa na Beel-shebe. ²⁴ MLUME gumchwilile boka buya busugu, guganine, Nene nili Abetcha a sobe Iblahimu, ushimone booba, bululi nene nili hamwecho nobe, na nene niuhalila mihaa, na ubucha ibushi yobe wa yulu ya Iblahimu mgichi gwanyi. ²⁵ Gugimiye butambikilo uya, guligishile china lya MLUME. gugimiye itula yage uya, na bacha ba Isaki badabile ishima uya. ²⁶ Mndi Abimeleki gumgilile uhma Gelali, hamwechi na Ahuzathi genda lyage, na Fikoli, ilume pambwa yage ya bita, ²⁷ Isaka gubabudiche, Yulu yai mwanjwila, na benywe mwakonywa, ati munyingile wenyu? ²⁸ Baganine, Winene tumonine ugana MLUME gubele hamwechi nobe, na beswe tuganine, tulahanye beswe nobe, na ubiya malagano nobe. ²⁹ na ugana ushitugilile bisone, inangwa beswe tushiuudile gogwe, tushibaugilile bisone ila bisuga kaa, tuuleile ugye lobe wa talala; na gogwe bino uli mmalilwa mihaa na MLUME. ³⁰ Haho gubaitile biliwa biingi nabo nuuya naunywa. ³¹ Bagimene lwelo pee, balahyene boo wa boo, hanyuma Isaka gubaganine, nabo baligilile wabo na talala. ³² Haho loka luya lusugu, bacha ba Isaka, bachwile umsambila mwano gwa iya ishima yababele badabe, bamsambile, Twaimona ili na madi. ³³ Nage guigitile china lyayo Shiba; wa bibyo china lya giya mbuga ii Beel-sheba, ata liino. ³⁴ Esau helibele na myaa maumi mana, gugondile msiha gwa Beeli Mhiti, na Basemathi, msiha gwa Eloni, Mhiti. ³⁵ Mitima gyabo Isaka na Lebeka gigilule na mmonywa wa yulu yabo.